Views: 6
ប្រែសម្រួល : កញ្ញាដាលីស (ដេល្លីម៉េល) ៖ ហ្វាំងឡង់បានបិទព្រំដែនរបស់ខ្លួនចំពោះអ្នកទេសចររុស្ស៊ីចាប់ពីពាក់កណ្តាលអធ្រាត្រយប់មិញ (ឈានចូលថ្ងៃសុក្រទី៣០កញ្ញានេះ)បន្ទាប់ពីលំហូរចូលដ៏ធំនៃបុរសវ័យធ្វើទាហាន ដែលភៀសខ្លួនចេញពីប្រទេសបន្ទាប់ពីបទបញ្ជាកេណ្ឌទ័ពរបស់លោកពូទីន។
ចរាចរណ៍អ្នកដំណើរនៅតាមព្រំដែននឹងត្រូវរឹតត្បិតយ៉ាងខ្លាំង ដោយជនស៊ីវិលរុស្ស៊ីដែលមានទិដ្ឋាការទេសចរណ៍មិនត្រូវបានអនុញ្ញាតឱ្យចូលប្រទេសតំបន់ន័រឌីក (Nordic) នេះទៀតទេ។
រដ្ឋមន្ត្រីការបរទេសលោក ផេកកា ហាវីស្តូ (Pekka Haavisto) បាននិយាយថា “ការសម្រេចចិត្តជាគោលការណ៍នេះមានគោលបំណងទប់ស្កាត់ទាំងស្រុងនូវទេសចរណ៍រុស្ស៊ីទៅកាន់ហ្វាំងឡង់ និងការឆ្លងកាត់ពាក់ព័ន្ធតាមរយៈហ្វាំងឡង់”។
រដ្ឋាភិបាលបានបង្ហាញលេសនៃការសម្រេចចិត្តរបស់ខ្លួនដោយនិយាយថាការបន្តមកដល់នៃភ្ញៀវទេសចររុស្ស៊ីនៅក្នុងប្រទេសហ្វាំងឡង់កំពុងបង្កគ្រោះថ្នាក់ដល់ទំនាក់ទំនងអន្តរជាតិរបស់ប្រទេស ដោយមិនបានបញ្ជាក់បន្ថែមនោះទេ។
លោកបានបន្ថែមថា ការចូលមកជាលក្ខណៈគ្រួសារ ព្រមទាំងការងារនិងការសិក្សា នឹងនៅតែត្រូវបានអនុញ្ញាត។
លោកហាវីស្តូបាននិយាយថា បទបញ្ជាកេណ្ឌទ័ពមានឥទ្ធិពលយ៉ាងសំខាន់លើការសម្រេចចិត្តរបស់គាត់។
នៅដើមខែនេះ ហ្វាំងឡង់បានកាត់បន្ថយចំនួនទិដ្ឋាការ ដែលចេញឱ្យពលរដ្ឋរុស្ស៊ី រួមទាំងសម្រាប់គោលបំណងទេសចរណ៍។
មានតែមួយភាគដប់នៃចំនួនទិដ្ឋាការធម្មតាប៉ុណ្ណោះត្រូវបានចេញនៅក្នុងចំណាត់ការមួយដែលគេមើលឃើញថាជាការបង្ហាញសាមគ្គីភាពជាមួយអ៊ុយក្រែន៕
បុរសរុស្ស៊ីវ័យធ្វើទាហានសម្រុកចេញទៅហ្វាំងឡាំងតាមព្រំដែនគោក
