Views: 24
ប្រែសម្រួលៈបំណង(ស្ពុតនិច)៖ ហ្វីលីពីននិងអាម៉េរិកនឹងធ្វើសមយុទ្ធជើងទឹកប្រចាំឆ្នាំឈ្មោះថាSamasamaចាប់ពីថ្ងៃ០២ដល់១៣តុលានៅប៉ែកខាងត្បូងនៃកោះលូហ្សុន(Luzon) នេះបើតាមប្រកាសរបស់យោធាហ្វីលីពីនកាលពីថ្ងៃពុធ។
យោធាហ្វីលីពីនបាននិយាយនៅក្នុងសេចក្តីថ្លែងការណ៍មួយថា « កងទ័ពជើងទឹកហ្វីលីពីនត្រៀមរៀបចំសមយុទ្ធយោធាហ្វីលីពីន-អាម៉េរិកឈ្មោះថា SAMASAMAចាប់ពីថ្ងៃ០២តុលាដល់១៣តុលានៅតំបន់ប្រតិបត្តិការកងទ័ពជើងទឹកលូហ្សុន។SAMASAMAជាលំហាត់យោធាទ្វេភាគីរវាងកងទ័ពជើងទឹកអាម៉េរិកនិងកងទ័ពជើងទឹកហ្វីលីពីន»។
សេចក្តីថ្លែងការណ៍បានបន្តទៀតថា សមយុទ្ធនេះនឹងបង្កើនសមត្ថភាពសង្គ្រាមជើងទឹករបស់ហ្វីលីពីន ដូចជាកងកម្លាំងប្រយុទ្ធបុកគោកឡើងច្រាំងសំរាប់ប្រតិបត្តិការសន្តិសុខសមុទ្រ និងគាំទ្រសង្គ្រាមប្រឆាំងនាវាមុជទឹក សង្គ្រាមលើដី អាកាសព្រមទាំងសង្គ្រាមអេឡិចត្រូនិច»។
សមយុទ្ធនេះក៏មានការចូលរួមពីកងនាវាទៅពីជប៉ុន អូស្ត្រាលី កាណាដានិងអង់គ្លេសផងដែរ។
ការប្រកាសធ្វើសមយុទ្ធនេះកើតឡើងតែមួយថ្ងៃក្រោយពីអ្នកនាំពាក្យក្រសួងការបរទេសចិនបានព្រមានកុំអោយហ្វីលីពីនបង្ករឿងនៅតំបន់ជម្លោះនៅសមុទ្រចិនខាងត្បូងក្រោយសារព័ត៌មានហ្វីលីពីនបាននិយាយថា កងកម្លាំងពិសេសហ្វីលីពីនបានរើចេញខ្សែពោងបណ្តែតទឹកដែលកងឆ្មាំសមុទ្រចិនបានដាក់ដើម្បីរារាំងកុំអោយពួកនេសាទហ្វីលីពីនចូលនេសាទនៅក្នុងបឹងទឹកប្រៃមួយនៅទីនោះ។
ទាំងចិននិងហ្វីលីពីនអះអាងអធិបតេយ្យភាពនៅតំបន់ទឹករាក់ស្កាបូរ៉ូហ្វ សូល(Scarborough Shoal)ដ៏សំបូរមច្ឆា។
កាលពីថ្ងៃពុធម្សិលមិញ កងឆ្មាំសមុទ្រហ្វីលីពីនបានអំពាវនាវអោយពួកអ្នកនេសាទរបស់ខ្លួនបន្តការនេសាទនៅតំបន់Scarborough Shoalនិងនៅកន្លែងដទៃទៀតនៅក្នុងសមុទ្រចិនខាងត្បូង ដោយខ្លួនសន្យាបង្កើនការល្បាតនៅទីនោះ។
អ្នកនាំពាក្យកងឆ្មាំសមុទ្របាននិយាយថា នាវាហ្វីលីពីនមិនអាចនៅទីនោះជាប្រចាំទេ តែប្តេជ្ញាការពារសិទ្ធិអ្នកនេសាទនៅក្នុងតំបន់សេដ្ឋកិច្ចផ្តាច់មុខរបស់ខ្លួន ហើយ«យើងនឹងបង្កើនការល្បាតនៅកន្លែងដែលមានអ្នកនេសាទហ្វីលីពីន»៕
សហគមន៍នេសាទនៅក្រុងម៉ាស៊ីនឡុក ក្នុងខេត្ត ហ្សាំបាឡេស របស់ហ្វីលីពីន