Views: 2
ប្រែសម្រួល : កញ្ញាដាលីស (ស្ត្រេតថែមស៍) ៖ នៅក្នុងប្រទេសឥណ្ឌា ពាក់កណ្តាលនៃគម្រោងហេដ្ឋារចនាសម្ពន្ធទាំងអស់ត្រូវបានពន្យារពេលហើយគម្រោងមួយក្នុងចំណោមបួនកំពុងដំណើរការលើសថវិកាប៉ាន់ស្មានរបស់ពួកគេ។ នាយករដ្ឋមន្ត្រី ណារិនដ្រា ម៉ូឌី ជឿថា បច្ចេកវិជ្ជាគឺជាដំណោះស្រាយចំពោះបញ្ហារាំងស្ទះដែលមានអាយុកាលច្រើនឆ្នាំនិងល្បីអសោចទាំងនេះ។
ក្រោមគម្រោងមេតម្លៃ ១០០ ទ្រីលានរូពី (១,១១ ទ្រីលានដុល្លារ) ហៅថា PM Gati Shakti (ជាភាសាឥណ្ឌាមានន័យថាកម្លាំងនៃល្បឿន)រដ្ឋបាលលោកម៉ូឌីកំពុងបង្កើតវេទិកាឌីជីថលដែលរួមបញ្ចូលគ្នារវាងក្រសួងចំនួន១៦។
វេទិកានេះនឹងផ្តល់ជូនវិនិយោគិននិងក្រុមហ៊ុននូវដំណោះស្រាយតែមួយផ្លូវសម្រាប់ការរចនាគម្រោង ការអនុម័តដោយរលូន និងការប៉ាន់ប្រមាណថ្លៃចំណាយកាន់តែងាយស្រួល។
លោក អាមរិត ឡាល់ មីណា (Amrit Lal Meena)លេខាធិការពិសេសផ្នែកភស្តុភារក្នុងក្រសួងពាណិជ្ជកម្មនិងឧស្សាហកម្ម បាននិយាយនៅក្នុងបទសម្ភាសន៍មួយក្នុងទីក្រុងញូវដេល្លី ថា”បេសកកម្មនេះគឺដើម្បីអនុវត្តគម្រោងដោយមិនចំណាយពេលវេលាហួសប្រមាណនិងចំណាយថ្លៃដើមហួសប្រមាណ។ក្រុមហ៊ុនសកលជ្រើសរើសឥណ្ឌាជាមជ្ឈមណ្ឌលផលិតកម្មរបស់ពួកគេគឺជាគោលបំណងនៃគម្រោង”។
គម្រោងការដែលមានល្បឿនលឿននេះនឹងផ្តល់ឱ្យឥណ្ឌានូវអត្ថប្រយោជន៍ ជាពិសេសជាមួយប្រទេសចិន ដែលបន្តបិទទ្វារព្រំដែនភាគច្រើនទៅកាន់ពិភពខាងក្រៅហើយក្រុមហ៊ុនកាន់តែច្រើនឡើងបានប្រកាន់ខ្ជាប់គោលនយោបាយចិនបូកមួយ ពោលគឺ ស្វែងរកប្រទេសផ្សេងទៀតដើម្បីពង្រីកឬទាញយកធនធានពីទីនោះ ដើម្បីធ្វើពិពិធកម្មអាជីវកម្មនិងខ្សែសង្វាក់ផ្គត់ផ្គង់របស់ពួកគេ។
ប្រទេសសេដ្ឋកិច្ចធំទីបីរបស់អាស៊ីមួយនេះមិនត្រឹមតែផ្តល់នូវកម្លាំងពលកម្មថោកប៉ុណ្ណោះទេ ប៉ុន្តែថែមទាំងសម្បូរកម្មករមានទេពកោសល្យ ដែលនិយាយភាសាអង់គ្លេសភាគច្រើនផងដែរបើទោះបីជាហេដ្ឋារចនាសម្ពន្ធអន់បានធ្វើឱ្យវិនិយោគិនភាគច្រើនមិនព្រមចូលមកវិនិយោគក៏ដោយ។
លោក អានស៊ូមែន ស៊ីនហា (Anshuman Sinha)ដៃគូនៅ Kearney India ដែលដឹកនាំការអនុវត្តផ្នែកភស្តុភារនិងហេដ្ឋារចនាសម្ពន្ធ បាននិយាយថា”ក្រៅពីការពិតដែលថាមានលក្ខខណ្ឌតម្រូវខាងនយោបាយរបស់ប្រទេសនានាត្រូវផ្លាស់ទីទៅឆ្ងាយ មធ្យោបាយតែមួយគត់ដើម្បីប្រកួតប្រជែងជាមួយចិនគឺត្រូវមានការប្រកួតប្រជែងលើការចំណាយតាមដែលអ្នកអាចធ្វើបាន។ គម្រោង Gati Shakti គឺនិយាយអំពីការធ្វើឱ្យវាកាន់តែងាយស្រួលក្នុងការមានលំហូរទំនិញនិងសមាសធាតុផលិតកម្មនៅទូទាំងបណ្តោយនិងទទឹងនៃប្រទេស”។
លោកស៊ីនហានិយាយថា សសរស្តម្ភសំខាន់ៗនៃគម្រោងនេះគឺត្រូវកំណត់ក្រុមផលិតកម្មថ្មីដែលមិនមាននាពេលសព្វថ្ងៃ ហើយតភ្ជាប់ទីតាំងទាំងនោះយ៉ាងរលូនទៅនឹងបណ្តាញផ្លូវដែក កំពង់ផែ និងអាកាសយានដ្ឋានរបស់ប្រទេស៕
ក្រោមគម្រោង PM Gati Shakti រដ្ឋបាលលោកម៉ូឌីកំពុងបង្កើតវេទិកាឌីជីថលដែលរួមបញ្ចូលគ្នារវាងក្រសួងចំនួន១៦