លោក ហ៊ុន ម៉ាណែត ដែលទទួលបានចំណេះដឹងថ្នាក់បណ្ឌិត ពីសាកលវិទ្យាល័យ West Point សហរដ្ឋអាមេរិក ត្រូវជាកូនប្រុសសម្ដេចអគ្គមហាសេនាបតីតេជោ នាយឧត្តមសេនីយ៍ផុតលេខផ្កាយមាស៥ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា ត្រូវបានបំពាក់ឋានន្តរស័ក្ដិ ថ្នាក់វរសេនីយ៍ឯក ( ស័ក្ដិ៥ ) តាំងពីនៅមានអាយុ៣០ឆ្នាំ ដំណាលគ្នានឹងការតែងតាំងមុខតំណែងជា ប្រធាននាយកដ្ឋានពិសេស នៃលេខាធិការដ្ឋានជាតិកម្លាំងពិសេសប្រឆាំងភេរវកម្ម និងជាមេបញ្ជាការ នៃបញ្ជាការដ្ឋានជាតិកម្លាំងពិសេសប្រឆាំងភេរវកម្ម នៃគណៈកម្មាធិការជាតិប្រឆាំងភេរវកម្ម ( គ.ជ.ប.ភ ) ដោយអនុក្រឹត្យលេខ ៧៥អនក្រ.តត ចុះថ្ងៃទី២៩ ខែមករា ឆ្នាំ២០០៨ ។
លោកវរសេនីយ៍ឯក ហ៊ុន ម៉ាណែត ក្នុងក្របខ័ណ្ឌជានាយអាវុធហត្ថ នៃកងយោធពលខេមរភូមិន្ទ ក្រសួងការពារជាតិ អត្តលេខ ០៣៣៨៨៣ ទទួលបានការដំឡើងឋានន្តរស័ក្ដិ ថ្នាក់ឧត្តមសេនីយ៍ត្រី ( ផ្កាយ១ ) ដោយព្រះរាជក្រឹត្យលេខ នស/រកត/០១០៩/០៦៩ ចុះថ្ងៃទី២៦ ខែមករា ឆ្នាំ២០០៩ ។
លោកឧត្តមសេនីយ៍ត្រី ហ៊ុន ម៉ាណែត ទទួលបានការតែងតាំងជា មេបញ្ជាការរង នៃបញ្ជាការដ្ឋានអង្គរក្ស និងជានាយរងសេនាធិការចម្រុះ អគ្គបញ្ជាការដ្ឋាន នៃកងយោធពលខេមរភូមិន្ទ បន្ថែមលើមុខងារបច្ចុប្បន្ន ដោយអនុក្រឹត្យលេខ ៩៦៤អនក្រ.តត ចុះថ្ងៃទី១៣ ខែកញ្ញា ឆ្នាំ២០១០ ។
លោកឧត្តមសេនីយ៍ត្រី ហ៊ុន ម៉ាណែត ទទួលបានការតែងតាំងជា មេបញ្ជាការរង នៃបញ្ចាការដ្ឋានកងទ័ពជើងគោក បន្ថែមលើមុខងារបច្ចុប្បន្ន ដោយអនុក្រឹត្យលេខ ១១៥០អនក្រ.តត ចុះថ្ងៃទី៣០ ខែវិច្ឆិកា ឆ្នាំ២០១០ ។
លោកឧត្តមសេនីយ៍ត្រី ហ៊ុន ម៉ាណែត ទទួលបានការដំឡើងឋានន្តរស័ក្ដិ ថ្នាក់ឧត្តមសេនីយ៍ទោ ( ផ្កាយ២ ) ដោយព្រះរាជក្រឹត្យលេខ នស/រកត/១២១០/៩២១ ចុះថ្ងៃទី០១ ខែធ្នូ ឆ្នាំ២០១០ ។
លោកឧត្តមសេនីយ៍ទោ ហ៊ុន ម៉ាណែត ទទួលបានការដំឡើងឋានន្តរស័ក្ដិ ថ្នាក់ឧត្តមសេនីយ៍ឯក ( ផ្កាយ៣ ) ដោយព្រះរាជក្រឹត្យលេខ នស/រកត/០៦១៣/៦៧១ ចុះថ្ងៃទី១៩ ខែមិថុនា ឆ្នាំ២០១៣ ។
លោកឧត្តមសេនីយ៍ឯក ហ៊ុន ម៉ាណែត ទទួលបានការតែងតាំងជា អគ្គមេបញ្ជាការរង នៃកងយោធពលខេមរភូមិន្ទ បន្ថែមលើមុខងារបច្ចុប្បន្ន ដោយព្រះរាជក្រឹត្យលេខ នស/រកត/០៧១៨/៦៩៥ ចុះថ្ងៃទី០៦ ខែកក្កដា ឆ្នាំ២០១៨ ពោលគឺចាប់ផ្ដើមឡើងមានឋានៈជា « ឯកឧត្តម » ។
ឯកឧត្តម ឧត្តមសេនីយ៍ឯក ហ៊ុន ម៉ាណែត ទទួលបានការតែងតាំងជា មេបញ្ជាការ នៃបញ្ជាការដ្ឋានកងទ័ពជើងគោក បន្ថែមលើមុខងារបច្ចុប្បន្ន ដោយព្រះរាជក្រឹត្យលេខ នស/រកត/០៩១៨/៩៣៣ ចុះថ្ងៃទី០៦ ខែកញ្ញា ឆ្នាំ២០១៨ ។
ឯកឧត្តម ឧត្តមសេនីយ៍ឯក ហ៊ុន ម៉ាណែត ទទួលបានការដំឡើងឋានន្តរស័ក្ដិ នាយឧត្តមសេនីយ៍ ( ផ្កាយ៤ ) ដោយព្រះរាជក្រឹត្យលេខ នស/រកត/០៣២៣/៤៥៤ ចុះថ្ងៃទី១៧ ខែមីនា ឆ្នាំ២០២៣ ពោលគឺនៅពេលមានអាយុ៤៥ឆ្នាំ ៕