លោក ហ៊ុន ម៉ានិត នាយទាហាន នៃកងយោធពលខេមរភូមិន្ទ ក្រសួងការពារជាតិ អត្តលេខ ០៧៥៥៥៥ នាយករង នាយកដ្ឋានស្រាវជ្រាវចារកិច្ច នៃអគ្គបញ្ជាការដ្ឋាន ដែលត្រូវជាកូនប្រុសទី២របស់សម្ដេចអគ្គមហាសេនាបតីតេជោ នាយឧត្តមសេនីយ៍ផុតលេខផ្កាយមាស៥ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា និងត្រូវជាប្អូនប្រុសរបស់ឯកឧត្តម នាយឧត្តមសេនីយ៍ ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការ នៃបញ្ជាការដ្ឋានកងទ័ពជើងគោក ទទួលបានការដំឡើងឋានន្តរស័ក្ដិ ថ្នាក់វរសេនីយ៍ឯក ( ស័ក្ដិ៥ ) តាំងពីនៅមានអាយុ៣០ឆ្នាំ ដោយអនុក្រឹត្យលេខ ៤៤អនក្រ.តត ចុះថ្ងៃទី១៣ ខែមករា ឆ្នាំ២០១២ ។
លោកវរសេនីយ៍ឯក ហ៊ុន ម៉ានិត ទទួលបានការដំឡើងឋានន្តរស័ក្ដិ ថ្នាក់ឧត្តមសេនីយ៍ត្រី ( ផ្កាយ១ ) ដោយព្រះរាជក្រឹត្យលេខ នស/រកត/០៦១៣/៦៤៩ ចុះថ្ងៃទី១២ ខែមិថុនា ឆ្នាំ២០១៣ ។
លោកឧត្តមសេនីយ៍ត្រី ហ៊ុន ម៉ានិត ទទួលបានការតែងតាំងជា នាយករងខុទ្ទកាល៍យសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា មានឋានៈស្មើ អគ្គនាយក បន្ថែមលើមុខងារបច្ចុប្បន្ន ដោយព្រះរាជក្រឹត្យលេខ នស/រកត/០៩១៣/៩១៤ ចុះថ្ងៃទី២៧ ខែកញ្ញា ឆ្នាំ២០១៣ ពោលគឺចាប់ផ្ដើមឡើងឋានៈជា « ឯកឧត្តម » ។
ឯកឧត្តម ឧត្តមសេនីយ៍ត្រី ហ៊ុន ម៉ានិត ទទួលបានការដំឡើងឋានន្តរស័ក្ដិ ឧត្តមសេនីយ៍ទោ ( ផ្កាយ២ ) ដោយព្រះរាជក្រឹត្យលេខ នស/រកត/០៥១៥/៤០០ ចុះថ្ងៃទី០៨ ខែឧសភា ឆ្នាំ២០១៥ ។
ឯកឧត្តម ឧត្តមសេនីយ៍ទោ ហ៊ុន ម៉ានិត ទទួលបានការតែងតាំងជា នាយក នាយកដ្ឋានស្រាវជ្រាវចារកិច្ច នៃអគ្គបញ្ជាការដ្ឋាន ដោយអនុក្រឹត្យលេខ ៩៩៧អនក្រ.តត ចុះថ្ងៃទី១៦ ខែកញ្ញា ឆ្នាំ២០១៥ ។
ឯកឧត្តម ឧត្តមសេនីយ៍ទោ ហ៊ុន ម៉ានិត ទទួលបានការតែងតាំងជា អគ្គនាយក នៃអគ្គនាយកដ្ឋានស្រាវជ្រាវចារកិច្ច នៃក្រសួងការពារជាតិ នាថ្ងៃទី២៣ ខែសីហា ឆ្នាំ២០១៧ ។
ឯកឧត្តម ឧត្តមសេនីយ៍ទោ ហ៊ុន ម៉ានិត ក្នុងមុខតំណែងជា នាយករងខុទ្ទកាល័យនាយករដ្ឋមន្ដ្រី ទទួលបានការដំឡើងឋានៈស្មើ រដ្ឋលេខាធិការ បន្ថែមលើមុខងារបច្ចុប្បន្ន ដោយព្រះរាជក្រឹត្យលេខ នស/រកត/០៩១៧/៦៩៦ ចុះថ្ងៃទី២៩ ខែកញ្ញា ឆ្នាំ២០១៧ ។
ឯកឧត្តម ឧត្តមសេនីយ៍ទោ ហ៊ុន ម៉ានិត ទទួលបានការដំឡើងឋានន្តរស័ក្ដិ ឧត្តមសេនីយ៍ឯក ( ផ្កាយ៣ ) ដោយព្រះរាជក្រឹត្យលេខ នស/រកត/១០១៧/៧០១ ចុះថ្ងៃទី០៦ ខែតុលា ឆ្នាំ២០១៧ ។
ឯកឧត្តម ឧត្តមសេនីយ៍ឯក ហ៊ុន ម៉ានិត ក្នុងមុខតំណែងជា នាយករងខុទ្ទកាល័យនាយករដ្ឋមន្ដ្រី ទទួលបានការដំឡើងឋានៈស្មើ រដ្ឋមន្ដ្រី បន្ថែមលើមុខងារបច្ចុប្បន្ន ដោយព្រះរាជក្រឹត្យលេខ នស/រកត/១២២២/១៥២៧ ចុះថ្ងៃទី០៦ ខែធ្នូ ឆ្នាំ២០២២ ។
ឯកឧត្តម ឧត្តមសេនីយ៍ឯក ហ៊ុន ម៉ានិត ទទួលបានការតែងតាំងមុខតំណែងជា មេបញ្ជាការរង នៃបញ្ជាការដ្ឋានកងទ័ពជើងគោក បន្ថែមលើមុខងារបច្ចុប្បន្ន ដោយអនុក្រឹត្យលេខ ២៧៧អនក្រ.តត ចុះថ្ងៃទី១៧ ខែមីនា ឆ្នាំ២០២៣ ពោលគឺនៅពេលមានអាយុ៤១ឆ្នាំ ៕
