Views: 2
ប្រែសម្រួល : កញ្ញាដាលីស (ដេល្លីម៉េល) ៖ សេតវិមានបាននិយាយកាលពីថ្ងៃអង្គារទី១៦សីហាថា ជំទាវទីមួយអាម៉េរិក លោកស្រី ជីល បៃដិន បានធ្វើតេស្តិ៍វិជ្ជមានកូវីដ១៩ និង វិវត្តរោគសញ្ញាស្រាល ពោលគឺពីរសប្តាហ៍បន្ទាប់ពីស្វាមីរបស់លោកស្រី លោក ចូ បៃដិន បានឆ្លងវីរុសនេះជាលើកទីពីរ។
នាយកទំនាក់ទំនងរបស់លោកស្រី ឈ្មោះ អេលីហ្សាបេត អាឡិចសាន់ឌឺ (Elizabeth Alexander) បាននិយាយនៅក្នុងសេចក្តីថ្លែងការណ៍មួយថា ភរិយារបស់ប្រធានាធិបតីអាយុ ៧១ ឆ្នាំរូបនេះបានធ្វើតេស្តិ៍អវិជ្ជមានកាលពីថ្ងៃចន្ទ ប៉ុន្តែមាន “រោគសញ្ញាដូចគ្រុនផ្តាសាយនៅពេលល្ងាច”។
លោកស្រីអាឡិចសាន់ឌឺបាននិយាយថា ការធ្វើតេស្តិ៍អង់ទីហ្សែនរហ័សជាបន្តបន្ទាប់គឺអវិជ្ជមាន ប៉ុន្តែការធ្វើតេស្តិ៍ PCR លម្អិតបន្ថែមទៀតគឺវិជ្ជមាន។
ជំទាវទីមួយបានលេបថ្នាំគ្រាប់ Paxlovid ហើយនឹងធ្វើចត្តាឡីស័កយ៉ាងហោចណាស់ប្រាំថ្ងៃ។
លោកស្រីអាឡិចសាន់ឌឺបានបន្ថែមថា “លោកស្រីត្រូវបានចាក់វ៉ាក់សាំងពីរដង ដូសជំរុញពីរដង ហើយមានរោគសញ្ញាស្រាលប៉ុណ្ណោះ”។
ជំនួយការរូបនេះបាននិយាយថា លោកស្រី ជីល បៃដិន បានធ្វើតេស្តិ៍វិជ្ជមាននៅពេលវិស្សមកាលនៅរដ្ឋខារ៉ូលីណាខាងត្បូង ជាកន្លែងដែលលោកស្រីកំពុងស្នាក់នៅផ្ទះឯកជនមួយហើយនឹងត្រឡប់ទៅសេតវិមានវិញ បន្ទាប់ពីការធ្វើតេស្តិ៍អវិជ្ជមានពីរលើកជាប់ៗគ្នា៕
លោកស្រីជីល បៃដិន តេស្តិ៍វិជ្ជមានកូវីដអំឡុងការសម្រាកវិស្សមកាលនៅរដ្ឋខារ៉ូលីណាខាងត្បូង
