Views: 5
ប្រែសម្រួល : កញ្ញាដាលីស (បាល់ទាត់) ៖ ខាងក្រោមនេះជាការប្រកួត ២ គូសម្រាំងសម្រាប់ការប្រកួតជម្រុះយូរ៉ូ ២០២៤ សម្រាប់ថ្ងៃសៅរ៍។
* បែលហ្ស៊ិកស៊ុតចូលជាមធ្យម ៣ គ្រាប់ក្នុង ៣ ប្រកួតនៃការប្រកួត ៤ លើកចុងក្រោយរបស់ពួកគេ ដោយឈ្នះ ៣-០ ពីរដង។
* អាហ្សែបៃហ្សង់បានរបូត ១០ គ្រាប់ក្នុងការប្រកួតជម្រុះ Euro 2024 ចំនួន៣លើករបស់ពួកគេមកទល់ពេលនេះ។
* Romelu Lukaku រកបាន៧គ្រាប់ក្នុងការបង្ហាញខ្លួន៤លើកចុងក្រោយសម្រាប់បែលហ្ស៊ិក។
អាហ្សែបៃហ្សង់រកបានត្រឹមតែ១ពិន្ទុប៉ុណ្ណោះពីការប្រកួតជម្រុះ Euro 2024 ចំនួន៣លើកមកទល់ពេលនេះ ហើយពួកគេអាចចាញ់ទក់សាច់ទៀតនៅពេលដែលក្រុមបែលហ្ស៊ិកដែលស៊ុតបំប៉ោងសំណាញ់គ្មានត្រាប្រណីធ្វើដំណើរមកកាន់ទីក្រុង Baku ។
ក្រុមម្ចាស់ផ្ទះ ដែលគេចាត់ទុកជាក្រុមខ្សោយសម្រាប់ការប្រកួតថ្ងៃសៅរ៍នេះ បានរបូត ១០ គ្រាប់ក្នុងការប្រកួតចំនួន ៣ លើកមកទល់ពេលនេះ ហើយរកបានតែ១ពិន្ទុគត់ក្នុងផ្ទះទល់នឹងអេស្តូនីក្នុងខែមិថុនា។ ពួកគេបានចាញ់អូទ្រីស ៤-១ និង ចាញ់ស៊ុយអែត ៥-០ ហើយត្រូវប្រឈមមុខនឹងក្រុមដែលមានប្រយុទ្ធគុណភាពនៅថ្ងៃសៅរ៍នេះ។
ការទទួលជ័យជម្នះ ៣-០ របស់បែលហ្ស៊ិកនៅទឹកដីអេស្តូនីក្នុងខែមិថុនា បានធ្វើឱ្យប្រទេសនេះមាន ៧ ពិន្ទុពីលទ្ធភាព ៩ ពិន្ទុពេញក្នុងវគ្គជម្រុះ។
ពួកគេបានស៊ុតបញ្ចូលទីជាមធ្យម ៣ គ្រាប់ក្នុង ៣ ប្រកួតនៃការប្រកួត៤លើកចុងក្រោយរបស់ពួកគេ។ ដោយគិតពីរបៀបដែលអាហ្សែបៃហ្សង់ចាប់ផ្តើម ក្រុមភ្ញៀវគួរតែអាចស៊ុតចូលពួកគេចាប់ពី៣គ្រាប់ឡើងទៅ។
Romelu Lukaku ត្បិតលេងកម្រិតក្លិបមិនល្អ ប៉ុន្តែកម្រិតជម្រើសជាតិរូបគេនៅតែអាចរកគ្រាប់បាល់បានងាយៗដដែល។ រូបគេរកបាន ៧៥ គ្រាប់ក្នុងការបង្ហាញខ្លួន ១០៨ ប្រកួតសម្រាប់ប្រទេសរបស់ខ្លួន ហើយនៅតែជាការគំរាមកំហែងដ៏ធំ។ កីឡាករវ័យ ៣០ ឆ្នាំរូបនេះបានស៊ុតបញ្ចូលទីនៅក្នុងការបង្ហាញខ្លួនទាំង ៤ លើករបស់បែលហ្ស៊ិកចាប់តាំងពីការប្រកួត World Cup ដោយស៊ុតបញ្ចូលទីបាន ៧ គ្រាប់សរុប។
លទ្ធផលទស្សនទាយ បែលហ្ស៊ិកឈ្នះ ៣-០។
* អង់គ្លេសឈ្នះ៤ប្រកួតចុងក្រោយដោយគ្រាប់បាល់សរុប ១៥-១។
* អ៊ុយក្រែនរកបាន ៧ គ្រាប់ក្នុង ៣ ប្រកួតចុងក្រោយរបស់ពួកគេ។
* Harry Kane រកបាន ៣ គ្រាប់ក្នុង ៣ ប្រកួតសម្រាប់ក្រុមថ្មី Bayern Munich។
អង់គ្លេសក្នុងវគ្គជម្រុះក្រោមការដឹកនាំរបស់លោក Gareth Southgate គឺពិតជាខ្លាំងក្លាណាស់ ហើយពួកគេបានបង្ហាញវាម្តងទៀតនៅក្នុងយុទ្ធនាការជម្រុះ Euro 2024 នេះ ដោយបានយកឈ្នះការប្រកួតទាំង ៤ របស់ពួកគេ។
ក្រុមតោកំណាចទាំងបីបានចាប់ផ្តើមជាមួយនឹងជ័យជម្នះ ២-១ នៅទឹកដីអ៊ីតាលី មុនពេលឈ្នះ ២-០ ក្នុងផ្ទះទល់នឹងអ៊ុយក្រែន។
អង់គ្លេសបានឈ្នះពីរដងទៀតលើម៉ាល់តានិងម៉ាសេដូនីខាងជើង ដោយស៊ុតចូលទីសរុបដល់ទៅ ១១ គ្រាប់។
កូនក្រុមរបស់លោក Southgate កំពុងឈរលើកំពូលតារាង ប៉ុន្តែនឹងមិនចង់លេងបន្ធូរដៃឱ្យម្ចាស់ផ្ទះអ៊ុយក្រែននៅថ្ងៃនេះទេ ត្បិតនឹងបញ្ចូលកីឡាករថ្មីៗច្រើននាក់ក៏ដោយ។
កីឡាករដូចជា Levi Colwill នៅតំបន់ការពារ Eberechi Eze នៅខ្សែបម្រើ និង Eddie Nketiah នៅខ្សែប្រយុទ្ធ ត្រូវបានផ្តល់ឱកាសក្នុងក្រុមអង់គ្លេស បើទោះបីជាអ្នកគាំទ្រមួយចំនួនខកចិត្តចំពោះការបន្តដាក់ Jordan Henderson, Harry Maguire និង Kalvin Phillips នៅកៅអីបម្រុងក៏ដោយ។
ការដាក់បញ្ចូលកីឡាករក្មេងៗទាំងបីនាក់នោះបង្ហាញពីភាពស្មោះត្រង់របស់លោក Southgate ចំពោះក្រុមស្នូលរបស់ជម្រើសជាតិ ហើយប្រហែលជាគួរឱ្យភ្ញាក់ផ្អើលដែលពួកគេមិនមានឱកាសច្រើន ត្បិតក្រុមជម្រើសជាតិអាយុក្រោម ២១ ឆ្នាំបានឈ្នះជើងឯកអឺរ៉ុបនៅរដូវក្តៅនេះក្តី។
ទោះយ៉ាងណា អង់គ្លេសគួរតែអាចកត់ត្រាជ័យជម្នះជាលើកទី៥ជាប់ៗគ្នានៅពេលដែលពួកគេជួបគូប្រកួតមួយនេះ។
អ៊ុយក្រែនបានងើបឡើងវិញយ៉ាងល្អពីបរាជ័យដ៏ខកចិត្ត ២-០ របស់ពួកគេលើក្រុមអង់គ្លេស ដោយស្មើ ៣-៣ ជាមួយអាល្លឺម៉ង់ មុនពេលទទួលជ័យជម្នះលើក្រុមម៉ាសេដូនីខាងជើងនិងម៉ាល់តា ហើយពួកគេបច្ចុប្បន្នកំពុងឈរនៅលេខ ២ តាមពីក្រោយក្រុមអង់គ្លេសក្នុងពូល។
ក្រុមម្ចាស់ផ្ទះ ដែលនឹងលេងការប្រកួតនេះក្នុងទឹកដីប៉ូឡូញ ទំនងជានឹងត្រូវប្រកួតជម្រុះ២លើកជាប់ៗគ្នាជាមួយនឹងក្រុមជម្រើសជាតិអ៊ីតាលីសម្រាប់ក្រុមលេខ ២ ក្នុងពូល ហើយមើលទៅមានឱកាសខ្ពស់ជាងអ៊ីតាលី។
សមាជិកក្រុមអ៊ុយក្រែនភាគច្រើនលេងក្នុងលីកកំពូលទាំងប្រាំ ដោយ Viktor Tsygankov និង Artem Dovbyk ទាំងពីរនាក់កំពុងលេងល្អនៅក្លិប Girona ក្នុង La Liga ខណៈខ្សែការពារកណ្តាលវ័យក្មេង Illya Zabarnyi បានជាប់ឈុតធំរបស់ Bournemouth នៅអាយុ ២១ ឆ្នាំរួចទៅហើយ។
ក្រុមរបស់លោក Serhiy Rebrov កំពុងតែរីកចម្រើន និងលេងបាល់បានល្អខ្លាំងណាស់ តែទោះយ៉ាងណា កម្រិតរបស់ពួកគេនៅមិនទាន់អាចយកឈ្នះលើអង់គ្លេសបានទេ តែអាចស៊ុតចូលអង់គ្លេសយ៉ាងហោច១គ្រាប់ដែរ។
លទ្ធផលទស្សនទាយ អង់គ្លេសឈ្នះ ៣-១៕
អង់គ្លេសកំពុងខ្លាំង មានសង្ឃឹមខ្ពស់ថានឹងបំបាក់អ៊ុយក្រែននៅទឹកដីប៉ូឡូញ
