Views: 21
ប្រែសម្រួលៈបំណង(ដេល្លីម៉េល)៖ ជប៉ុននឹងបន្ថែមទណ្ឌកម្មលើរុស្ស៊ីក្រោយពីជំនួបក្រុមប្រទេសG7កាលពីសប្តាហ៍មុនបានព្រមព្រៀងគ្នាថានឹងបង្កើនការដាក់ទណ្ឌកម្មលើរដ្ឋាភិបាលទីក្រុងមូស្គូ ចំពោះការបង្កសង្គ្រាមនៅអ៊ុយក្រែន នេះបើតាមការអះអាងរបស់នាយខុទ្ទកាល័យនាយករដ្ឋមន្ត្រីជប៉ុនលោក ហ៊ីរ៉ូកាហ្ស៊ុយ ម៉ាតស៊ូណូ(Hirokazu Matsuno)កាលពីថ្ងៃសុក្រទី២៦ឧសភា។
នាយខុទ្ទកាល័យនាយករដ្ឋមន្ត្រីជប៉ុនលោក ហ៊ីរ៉ូកាហ្ស៊ុយ ម៉ាតស៊ូណូ
លោក ម៉ាតស៊ូណូ ដែលជាអ្នកនាំពាក្យកំពូលរបស់រដ្ឋាភិបាលទីក្រុងតូក្យូ ក៏បានថ្កោលទោសវិធានការរបស់រុស្ស៊ីក្នុងការបញ្ជូនសព្វាវុធនុយគ្លេអ៊ែរកលយុទ្ធទៅដាក់តាំងនៅក្នុងប្រទេសសម្ពន្ធមិត្តបេឡារូសដោយថា វានឹងរឹតតែធ្វើសភាពការណ៍កាន់តែតានតឹង។
លោកបានប្រាប់សន្និសីទកាសែតមួយថា «ក្នុងនាមជាប្រទេសតែមួយគត់ដែលធ្លាប់រងគ្រោះពីការទម្លាក់គ្រាប់បែកបរមាណូក្នុងអំឡុងសង្គ្រាម ជប៉ុនមិនដែលទទួលយកការគំរាមកំហែងប្រើនុយគ្លេអ៊ែររុស្ស៊ីទេ »។
សូមបញ្ជាក់ថា ក្រុមមេដឹកនាំG7 រួមមានអាម៉េរិក កាលពីសប្តាហ៍មុនបានបង្ហាញការប្តេជ្ញាចិត្តរបស់ខ្លួនក្នុងការបន្តគាំទ្រអ៊ុយក្រែនជាមួយនឹងការបន្ថែមជំនួយយោធាដល់អ៊ុយក្រែន និងបង្កើនការដាក់ទណ្ឌកម្មលើរុស្ស៊ុ។
ក្នុងកិច្ចសម្របសម្រួលជាមួយG7 ជប៉ុននឹងបង្កកទ្រព្យរបស់ក្រុមហ៊ុនចំនួន៧៨និងបុគ្គលចំនួន១៧រូប រួមមាននាយទាហាននៅរុស្ស៊ីនិងហាមការនាំចេញរបស់ក្រុមហ៊ុនរុស្ស៊ីចំនួន៨០ នេះបើតាមសេចក្តីប្រកាសរបស់ក្រសួងការបរទេសជប៉ុនកាលពីថ្ងៃសុក្រ។
ជប៉ុនក៏នឹងហាមការផ្គត់ផ្គង់សេវាសំណង់និងវិស្វកម្មទៅកាន់រុស្ស៊ី ។
អាម៉េរិកកាលពីថ្ងៃព្រហស្បតិ៍ក៏បានថ្កោលទោសការបញ្ជូនសព្វាវុធនុយគ្លេអ៊ែរកលយុទ្ធរបស់រុស្ស៊ីទៅកាន់បេឡារូស តែមិនឃើញហេតុផលណាដែលអាម៉េរិកត្រូវកែសម្រួលស្ថានភាពនុយគ្លេអ៊ែររបស់ខ្លួនទេ៕