Views: 3
ប្រែសម្រួល : កញ្ញាដាលីស (ដេល្លីម៉េល) ៖ យន្តហោះចម្បាំងបានចុះចតនិងហោះចេញពីនាវាផ្ទុកយន្តហោះអាម៉េរិកលាន់សំឡេងថ្លង់ស្ទើរបែកត្រចៀកដែលជាផ្នែកមួយនៃសមយុទ្ធគ្រោងទុកជាយូររបស់អង្គការណាតូនៅសមុទ្រមេឌីទែរ៉ាណេដើម្បីសម្ញែងកម្លាំងយោធា ខណៈរុស្ស៊ីកំពុងធ្វើសង្គ្រាមនៅអ៊ុយក្រែន។
ឧត្តមនាវីឯកអាម៉េរិកលោក ខឺត រេនសរ (Curt Renshaw) មេបញ្ជាការនៃក្រុមប្រយុទ្ធនៃនាវាផ្ទុកយន្តហោះទី៨ បានប្រាប់អ្នកយកព័ត៌មាននៅសប្តាហ៍នេះក្នុងដំណើរទស្សនកិច្ចនៅលើនាវា USS Harry S. Truman ថា “ខ្ញុំចង់ឱ្យពួកយើងត្រៀមខ្លួនតាមដែលអាចធ្វើទៅបាន”។
“យើងពិនិត្យមើលសមត្ថភាពរបស់រុស្ស៊ី ហើយយើងពិនិត្យមើលសមត្ថភាពរបស់យើងផ្ទាល់ហើយបន្ទាប់មកយើងហ្វឹកហាត់ដើម្បីទប់ទល់នឹងអ្វីដែលពួកគេអាចធ្វើបាននិងដើម្បីការពារខ្លួននិងការពារដៃគូនិងសម្ពន្ធមិត្ត”។
នាវាផ្ទុកយន្តហោះអាម៉េរិកនេះកំពុងចូលរួមក្នុងសមយុទ្ធឈ្មោះ Neptune Shield 2022 ដែលជាសកម្មភាពហ្វឹកហ្វឺនរបស់អង្គការណាតូនៅសមុទ្រមេឌីទែរ៉ាណេ និងសមុទ្របាល់ទិកក្នុងខែនេះ ដោយមានការចូលរួមចាប់ពីប្រទេសអ៊ីតាលី ប៉ូឡូញ និងតួកគីរហូតដល់ចក្រភពអង់គ្លេសនិងសហរដ្ឋអាម៉េរិក។គោលដៅគឺដើម្បីជម្នះការលំបាកក្នុងការរួមបញ្ចូលគ្នានូវទីបញ្ជាការនិងការគ្រប់គ្រងសព្វាវុធជើងអាកាស សមុទ្រ និងជើងគោកពីប្រទេសផ្សេងៗគ្នានៅក្នុងសម្ពន្ធមិត្តយោធាណាតូ។
ប្រតិបត្តិការនេះបានគ្រោងធ្វើឡើងពីរឆ្នាំមកហើយ ប៉ុន្តែការឈ្លានពានរបស់រុស្ស៊ីលើអ៊ុយក្រែនកាលពីចុងខែកុម្ភៈបានធ្វើឱ្យប៉ះពាល់លើព្រឹត្តិការណ៍ជាច្រើន។
ថ្លែងនៅក្នុងដែនសមុទ្រមេឌីទែរ៉ាណេរវាងកោះក្រេតនិងលីប៊ី លោករេនសរដឹងយ៉ាងច្បាស់ពីរបៀបដែលការបង្ហាញសាច់ដុំនេះជះផលប៉ះពាល់ទៅផ្នែកម្ខាងទៀតនៃទ្វីបអឺរ៉ុប។
អមជុំវិញខ្លួនដោយយន្តហោះចម្បាំង F-18 Super Hornet ដែលតម្រង់ជួរនៅលើនាវា លោករេនសរនិយាយថា “ចូរមើលទៅយន្តហោះប្រយុទ្ធទាំងអស់នេះទៅ មើលជុំវិញខ្លួនអ្នក! ពិតណាស់ពួកវាគឺជាគ្រឿងប្រដាប្រដាទប់ទល់”។
“ខ្ញុំគិតថាគ្មាននរណាម្នាក់ឆ្កួតមកវាយប្រហារយើងឬប្រព្រឹត្តគឃ្លើនដាក់សម្ពន្ធមិត្តណាមួយនោះទេ ប្រសិនបើអ្នកគិតអំពីសមត្ថភាពដែលយើងមាន”៕
សមយុទ្ធឈ្មោះ Neptune Shield 2022 សម្ញែងសាច់ដុំនៅសមុទ្រមេឌីទែរ៉ាណេ
