Views: 2
ដោយ: សុក្ខារិន / ខេត្តពោធិសាត់: ស្របតាមអនុសាសន៍ដ៏ថ្លៃថ្លារបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ជូនជនរួមជាតិស្តីអំពី «បឹងទន្លេសាប» នាថ្ងៃទី២៧ ខែឧសភា ឆ្នាំ២០២២ ម្សិលមិញនេះ រដ្ឋបាលខេត្តពោធិ៍សាត់ បានបើកកិច្ចប្រជុំ“ការងារកាត់ឆ្វៀលដីតំបន់២ និងតំបន់៣ ជូនប្រជាពលរដ្ឋ” ដែលដឹកនាំកិច្ចប្រជុំដោយ លោក អិត សេដ្ឋា រដ្ឋលេខាធិកាក្រសួងក្រសួងរៀបចំដែនដី នគរូបនីយកម្ម និងសំណង់ និង លោក ជាវ តាយ អភិបាលខេត្តពោធិ៍សាត់ និងដោយមានការចូលរួមពីមន្ទីរជំនាញពាក់ព័ន្ធ និងអាជ្ញាធរមូលដ្ឋានឃុំ-និងស្រុកទាំង៣ ដែលនៅជាប់បឹងទន្លេសាប។
កិច្ចប្រជុំនោះមានគោលបំណងពិភាក្សា និងដោះស្រាយបញ្ហាប្រឈមនានា ដើម្បីរៀបចំជារបាយការណ៍ និងទិន្នន័យលម្អិត ជាក់លាក់ ពីចំនួនផ្ទៃដីទីតាំងដែលពលរដ្ឋរស់នៅអចិន្ត្រៃយ៍ អាស្រ័យផលរាប់សិបឆ្នាំមកហើយ ដីដែលពលរដ្ឋអាស្រ័យផលយ៉ាងតិចបំផុត១០ឆ្នាំ ឬដីដែលមិនមែនជាដីលិចទឹក នៅក្នុងតំបន់២ និងតំបន់៣ ដែលត្រូវកាត់ឆ្វៀលជូនប្រជាពលរដ្ឋ ដើម្បីដាក់ជូនលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្មពិនិត្យ។
បើតាមរបាយកាណ៍បឋមពីមន្ទីរ រៀបចំដែនដី នគរូបនីយកម្ម សំណង់និងសុរិយោដី ខេត្តពោធិ៍សាត់ បានបង្ហាញថា សំណើរសុំកាត់ឆ្វៀលដីជូនប្រជាពលរដ្ឋដែលរស់នៅអចិន្ត្រៃយ៍ និងអាស្រ័យផលក្នុងតំបន់៣មុនឆ្នាំ២០១២ ស្របតាមរបាយវាស់វែងជាក់ស្តែង សរុបមានចំនួន ៣ពាន់៤រយ និង៤៨,៧៧ ហិចតា ស្មើរនិង១៣៩៩ ក្បាលដី មានប្រជាពលរដ្ឋអាស្រ័យផលចំនួន១៦៥៨គ្រួសារ គ្របដណ្តប់ក្នុងស្រុកចំនួន៣ គឺស្រុកក្រគរមាន៤ឃុំ ស្រុកកណ្តៀងមាន៤ឃុំ និងស្រុកបាកានមាន៣៕
