Views: 6
ដោយ៖ សុវណ្ណកុម្ភៈ/ភ្នំពេញ៖ នាថ្ងៃទី០៥ ខែធ្នូ ឆ្នាំ២០២២ ក្រុមប្រឹក្សាកីឡាក្រសួងមហាផ្ទៃបានបើកកិច្ចប្រជុំបូកសរុប វាយតម្លៃលទ្ធផលការងារការ ចូលរួមប្រកួតកីឡាជាតិ លើកទី៣ ឆ្នាំ២០២២ ក្រោមអធិបតីភាពលោក សរ សិទ្ធិ អនុរដ្ឋលេខាធិការក្រសួងមហាផ្ទៃ ទទួលជួយការងារដឹកនាំ អគ្គលេខាធិការដ្ឋាន ក្រុមប្រឹក្សាកីឡាក្រសួងមហាផ្ទៃ។
លទ្ធផលដែលក្រសួងមហាផ្ទៃទទួលបានពីការប្រកួតកីឡាជាតិលើកទី៣ គឺឈរនៅចំណាត់ថ្នាក់លេខ១ ដោយដណ្តើមបានមេដាយសរុបចំនួន២១១គ្រឿង ក្នុងនោះ មេដាយមាស១០៣គ្រឿង មេដាយប្រាក់៥៨គ្រឿង និងមេដាយសំរឹទ្ធ៥០គ្រឿង ។
លោកឧត្តមសេនីយ៍ទោយិតភីរៈអគ្គលេខាធិការនៃអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ បានបង្ហាញពីជោគជ័យ នៃការដណ្តើមបានមេដាយមាស ប្រាក់ និងសំរឹទ្ធ របស់អត្តពលិករបស់ក្រសួងមហាផ្ទៃជាច្រើនគ្រឿងដែលបានចំណាយពេលជាង១០ថ្ងៃចូលរួមការប្រកួតព្រឹត្តិការណ៍កីឡាជាតិលើកទី៣ និងកីឡាជនពិការជាតិ លើកទី១ ឆ្នាំ២០២២នេះ ។
ក្នុងព្រឹត្តិការណ៍ប្រកួតកីឡាជាតិលើកទី៣ដែលបានបញ្ចប់ទៅហើយនោះអគ្គលេខាធិការដ្ឋាននៃក្រុមប្រឹក្សាកីឡាក្រសួងមហាផ្ទៃបានបញ្ជូនប្រតិភូប្រតិភូរងគ្រូបង្វឹកកីឡាករ កីឡាការិនីសរុបចំនួន៤៦១នាក់ដើម្បីចូលរួមប្រកួតប្រជែងដណ្តើមមេដាយ។ក្នុងព្រឹត្តិការណ៍ជាតិដ៏ធំមួយនេះ ក៏មានការចូលរួមពីកីឡាករ កីឡាការិនី មកពីតាមបណ្តារាជធានីខេត្តទាំង២៥ និងក្រសួងចំនួន៣រួមមានៈ ក្រសួងមហាផ្ទៃ ក្រសួងការពារជាតិ និងក្រសួងសេដ្ឋកិច្ច និងហិរញ្ញវត្ថុផងដែរ ។
លោកសរ សិទ្ធិអនុរដ្ឋលេខាធិការក្រសួងមហាផ្ទៃទទួលជួយការងារដឹកនាំអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃបានពាំនាំនូវការលើកទឹកចិត្តនិងកោតសរសើរដ៏ខ្ពង់ខ្ពស់ពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួង និងនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិនិងជាអនុប្រធានទី១ក្រុមប្រឹក្សាកីឡាក្រ
សួងមហាផ្ទៃ ចំពោះលទ្ធផលដែលអត្តពលិកក្រសួងមហាផ្ទៃ ធ្វើបាននៅពេលនេះ។
លោកបានមានប្រសាសន៍ទៀតថា ឆ្លងកាត់ការចូលរួមលើកនេះ ក្រុមការងារទាំងមូល រួមមានប្រតិភូប្រតិភូរងគ្រូបង្វឹកកីឡាករកី ឡាការិនីទទួលបាននូវបទពិសោធន៍ជាច្រើនពីការប្រកួតទន្ទឹមនេះដែរយើងក៏ត្រូវខិតខំសិក្សាស្វែងយល់បន្ថែមទៀតដើម្បីសម្រេចនិងឈានឱ្យដល់គោលដៅថ្មីប្រកបដោយផ្លែផ្កាដើម្បីត្រៀមចូលរួមដណ្តើមជោគជ័យពីព្រឹត្តិការណ៍ប្រកួតកីឡាលើកក្រោយៗទៀត។
លោកក៏បានក្រើនរំលឹកដល់មន្ត្រីដឹកនាំការចូលរួមការប្រកួតទាំងអស់ត្រូវប្រកាន់ខា្ជប់ឱ្យបាននូវក្រមសីលធម៍សុភវិនិច្ឆ័យប្រកបដោយតម្លាភាពនិងមិនត្រូវបង្ហាញពីកំហុសឆ្គងណាមួយនាឱកាសដឹកនាំការចូលរួមប្រកួតនោះទេដើម្បីជៀសវាសឱ្យបាននូវការវាយតម្លៃពីមជ្ឈដ្ឋានខាងក្រៅដ្បិតការប្រកួតតែងមានចាញ់និងមានឈ្នះដូច្នេះហើយបើមានបញ្ហាណាមួយមិនប្រក្រតីនោះយើងត្រូវតវ៉ាប៉ុន្តែត្រូវប្រកាន់ខ្ជាប់ឱ្យបាននូវលក្ខណៈបច្ចេកទេសនានានិងក្រមសីលធម៌ សេចក្តីថ្លៃថ្នូររបស់កងកម្លាំងនគរបាលជាតិ ៕/R