Views: 4
ដោយៈ មុនីរ័ត្ន/ភ្នំពេញៈ ប្រមុខការទូតកម្ពុជានិងប្រទេសអេហ្ស៊ីបានអះអាងថា ប្រទេសទាំងពីរនឹងខិតខំបន្តលើកកម្ពស់ទំនាក់ទំនងនិងកិច្ចសហប្រតិបត្តិការដ៏យូរអង្វែង ។ នេះបើតាមសេចក្តីប្រកាសរបស់ក្រសួងការបរទេសសហប្រតិបត្តិការអន្តរជាតិចេញនៅថ្ងៃនេះ បន្ទាប់ពី លោក ឧបនាយករដ្ឋមន្រ្តី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិកម្ពុជា បានដឹកនាំគណៈប្រតិភូកម្ពុជាអញ្ជើញទៅបំពេញទស្សនកិច្ចផ្លូវការនៅសាធារណរដ្ឋអារ៉ាប់អេហ្ស៊ីប ពីថ្ងៃទី២៩ ដល់ថ្ងៃទី៣០ ខែមីនាឆ្នាំ២០២៣ តាមការអញ្ជើញរបស់ លោក សាមេហ្វ ស៊ូគ្រី ( Sameh SHOUKRY) រដ្ឋមន្រ្តីការបរទេសនៃសាធារណរដ្ឋអារ៉ាប់អេហ្ស៊ីប។
ក្នុងជំនួបទ្វេភាគីនៅថ្ងៃទី៣០ ខែមីនា ឆ្នាំ២០២៣ លោក ឧបនាយករដ្ឋមន្រ្តី និង លោក សាមេហ្វ ស៊ូគ្រី បានកោតសរសើរយ៉ាងខ្លាំងចំពោះវឌ្ឍនភាពនៃទំនាក់ទំនងជាមិត្តភាព និងកិច្ចសហប្រតិបត្តិការដ៏យូរអង្វែង ដែលបានកសាងឡើងដោយ ព្រះករុណា ព្រះបាទសម្តេចព្រះនរោត្តម សីហនុ “ព្រះបរមរតនកោដ្ឋ” នៃព្រះរាជាណាចក្រកម្ពុជា និង លោក ហ្គាម៉ល អាបដែល ណាស័ ( Gamal Abdel Nasser) អតីតប្រធានាធិបតីនៃសាធារណរដ្ឋអារ៉ាប់អេហ្ស៊ីប ដែលជាសមាជិកស្ថាបនិកនៃចលនាមិនចូលបក្សសម័្ពន្ធ។
រដ្ឋមន្រ្តីទាំងពីរបានគូសបញ្ជាក់ អំពីអត្ថន័យនៃដំណើរទស្សនកិច្ចនេះ ដែលធ្វើឡើងស្របពេលនឹងខួបអនុស្សាវរីយ៍ ៧០ ឆ្នាំនៃការបង្កើតទំនាក់ទំនងការទូតរវាងព្រះរាជាណាចក្រកម្ពុជា និងសាធារណរដ្ឋអារ៉ាប់អេហ្ស៊ីប និងបានពិភាក្សាអំពីសក្តានុពលនៃការពង្រឹង និងពង្រីកកិច្ចសហប្រតិបត្តិការក្នុងវិស័យនានា បន្ថែមទៀត។
លោកឧបនាយករដ្ឋមន្រ្តី ប្រាក់ សុខុន និង លោករដ្ឋមន្រ្តីការបរទេស សាមេហ្វ ស៊ូគ្រី ក៏បានឯកភាពពិចារណាបង្កើតឲ្យមាននូវកិច្ចពិគ្រោះយោបល់ទ្វេភាគីរវាងក្រសួងការបរទេសទាំងពីរ ដែល ជា យន្តការមួយ ដើម្បីរិះរកវិធី និងមធ្យោបាយនានា សំដៅពង្រឹងនិងពង្រីកកិច្ចសហប្រតិបត្តិការលើគ្រប់ វិស័យ។ ក្នុងន័យនេះ រដ្ឋមន្រ្តីការបរទេសទាំងពីរ បានឯកភាពជំរុញឲ្យមានការចុះហត្ថលេខាលើអនុស្សរណៈ ស្តីពីកិច្ចពិគ្រោះយោបល់នេះ នាពេលខាងមុខ ។
ឆ្លើយតបទៅនឹងការរីកចម្រើននៃទំនាក់ទំនង លោក សាមេហ្វ ស៊ូគ្រី បានជម្រាបជូនលោកឧបនាយករដ្ឋមន្ត្រី ប្រាក់ សុខុន ថាអេហ្ស៊ីបនឹងពិចារណាបើកស្ថានទូតរបស់ខ្លួននៅភ្នំពេញ ។
នៅក្នុងជំនួបនោះ លោក រដ្ឋមន្រ្តីការបរទេសទាំងពីរបានកត់សម្គាល់ថា ទំហំពាណិជ្ជកម្មទ្វេភាគីនៅមានកម្រិតនៅឡើយ និងបានគូសបញ្ជាក់អំពីភាពចាំបាច់ក្នុងការជំរុញកិច្ចសហប្រតិបត្តិការលើវិស័យពាណិជ្ជកម្ម និងសេដ្ឋកិច្ច ព្រមទាំងបានជំរុញឲ្យមានការប្រាស្រ័យទាក់ទងគ្នារវាង ក្រសួងពាក់ព័ន្ធរបស់ប្រទេសទាំងពីរ។ ឯកឧត្តមឧបនាយករដ្ឋមន្រ្តី ប្រាក់ សុខុន បានអំពាវនាវឲ្យប្រទេសអេហ្ស៊ីបទាញយកប្រយោជន៍នៃភាពទាក់ទាញ និងសក្តានុពលរបស់កម្ពុជា ក្នុងក្របខណ្ឌនៃកិច្ចព្រមព្រៀងពាណិជ្ជកម្មសេរីអាស៊ានកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ កិច្ចព្រមព្រៀងពាណិជ្ជកម្ម សេរីកម្ពុជា–ចិន កិច្ចព្រមព្រៀងពាណិជ្ជកម្មសេរីកម្ពុជា–សាធារណរដ្ឋកូរ៉េ និងច្បាប់វិនិយោគថ្មីរបស់កម្ពុជា។
រដ្ឋមន្រ្តីការបរទេសទាំងពីរ បានឯកភាពឲ្យក្រសួងទេសចរណ៍នៃប្រទេសទាំងពីរប្រើប្រាស់សក្តានុពលនៃប្រទេសរៀងៗខ្លួន ដើម្បីជំរុញកិច្ចសហប្រតិបត្តិការទេសចរណ៍ និងពិចារណារៀបចំអនុស្សរណៈនៃការយោគយល់គ្នាលើវិស័យនេះ។
ឯកឧត្តមឧបនាយករដ្ឋមន្រ្តី បានថ្លែងអំណរគុណដល់រដ្ឋាភិបាលអេហ្ស៊ីប ដែលបានផ្តល់អាហារូបករណ៍ដល់និស្សិតកម្ពុជាទៅសិក្សានៅប្រទេសអេហ្ស៊ីប រួមទាំងនិសិ្សតចំនួន ៩២ នាក់ សម្រាប់ឆ្នាំសិក្សា ២០២២–២០២៣ និងបានស្នើភាគីអេហ្ស៊ីបពិចារណារផ្តល់អារូបករណ៍លើមុខជំនាញបច្ចេកទេស បន្ថែម ទៀត រួមទាំងក្នុងកសិកម្ម និងឌីជីថលនូបីយកម្ម ដែលសំណើនេះទទួលបានការឯកភាពពីសមភាគីអេហ្ស៊ីប។
លោក សាមេហ្វ ស៊ូគ្រី ក៏បានឯកភាពចែករំលែកនូវបទពិសោធន៍ល្អៗនៅក្នុងវិស័យកសិកម្ម និងបើកចំហរសម្រាប់ការបណ្តុះបណ្តាល និងទំនាក់ទនងដោយផ្ទាល់រវាងអ្នកកជំនាញរបស់ប្រទេសទាំងពីរ។
រដ្ឋមន្រ្តីទាំងពីររូប បានសំដែងនូវសេចក្តីសោមនស្សរីករាយចំពោះលទ្ធផលជាផ្លែផ្កាដ៏ត្រចះត្រចង់ នៃដំណើរទស្សនកិច្ចផ្លូវការរបស់លោក ឧបនាយករដ្ឋមន្រ្តី ជាពិសេស ការចុះហត្ថលេខាលើឯកសារ សំខាន់ៗ ចំនួន ៣ ដូចជា (១) អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការវប្បធម៌ (២) អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការលើផ្នែកបុរាណវិទ្យា សារមន្ទីរនិងបេតិកភណ្ឌ និង (៣) អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការរវាងវិទ្យាស្ថានជាតិការទូត និងទំនាក់ទំនងអន្តរជាតិកម្ពុជា និងវិទ្យាស្ថានសិក្សាការទូតអេហ្ស៊ីប។
ចំពោះកិច្ចសហប្រតិបតិ្តការក្នុងក្របខណ្ឌពហុភាគី រដ្ឋមន្រ្តីការបរទេសទាំងពីរបានកត់សម្គាល់ដោយក្តីសោមនស្សរីករាយចំពោះទស្សនវិស័យដូចគ្នារវាងប្រទេសទាំងពីរលើបញ្ហាតំបន់ និងអន្តរជាតិជាច្រើន និងបានប្តេជ្ញាចិត្តចំពោះពហុភាគីនិយម សន្តិភាពសកលលោក សន្តិសុខ ស្ថិរភាព និងការអភិវឌ្ឍ ព្រមទាំងផ្តល់ការគាំទ្រគ្នាទៅវិញទៅមក និងពង្រឹងកិច្ចសហប្រតិបត្តិការនៅក្នុងអង្គការអន្តរជាតិនានា និងប្រតិបត្តិការរក្សាសន្តិភាព។ លោក ឧបនាយករដ្ឋមន្រ្តី បានថ្លែង អំណរគុណចំពោះសមភាគីអេហ្ស៊ីប ដែលបានអះអាងសាជាថ្មីនូវការគាំទ្រពេញទំហឹងរបស់អេហ្ស៊ីបចំពោះ បេក្ខភាពកម្ពុជា ដើម្បីក្លាយជាសមាជិកសងេ្កតការណ៍នៃអង្គការសហប្រតិបតិ្តការអ៊ីស្លាម (Organization of Islamic Cooperation –OIC) ។
លោកឧបនាយករដ្ឋមន្រ្តី ប្រាក់ សុខុន និងលោក ក៏បានផ្លាស់ប្តូរយោបល់លើបញ្ហាតំបន់ និងអន្តរជាតិមួយចំនួន ដែលជាកង្វល់ និងប្រយោជន៍រួម។
លោកឧបនាយករដ្ឋមន្រ្តី ប្រា ក់ សុខុន បានអញ្ជើញ លោក សាមេហ្វ ស៊ូគ្រី មកបំពេញទស្សនកិច្ចផ្លូវការនៅព្រះរាជាណាចក្រកម្ពុជា នៅពេលវេលាសមស្របទៅវិញទៅមក ហើយ លោក បានទទួលយកនូវការអញ្ជើញនេះដោយក្តីសោមនស្សរីករាយ។
លោកឧបនាយករដ្ឋមន្ត្រី ប្រាក់ សុខុន ក៏បានឆ្លៀតពេលស្នាក់នៅទីក្រុងគែរ ជួបសំណេះសំណាល ជាមួយនិស្សិតកម្ពុជាចំនួន៧០នាក់ ដែលកំពុងសិក្សានៅប្រទេសអេហ្ស៊ីប នៅស្ថានឯកអគ្គរាជទូតកម្ពុជា៕/PC
