Views: 2
ប្រែសម្រួលៈបំណង(ស្ត្រេតថែមស៍)៖បុរសម្នាក់ក្នុងឈុតសម្លៀកបំពាក់ប្រយុទ្ធនិងពាក់អាវការពារគ្រាប់ផង បានធ្វើការប្រហារមិនរើសមុខនៅផ្ទះមួយនិងមន្ទីរពេទ្យមួយនៅទីក្រុងរ៉ត់ធឺដាំរបស់ហូឡង់កាលពីថ្ងៃព្រហស្បតិ៍ ដោយសម្លាប់ក្មេងស្រីអាយុ១៤ឆ្នាំម្នាក់និងម្តាយរបស់នាង ព្រមទាំងគ្រូងបង្រៀនម្នាក់។
ប៉ូលិសហូឡង់បាននិយាយថា ពួកគេនៅស៊ើបអង្កេតរកហេតុផលនៅពីក្រោយការវាយប្រហារពីរនេះប្រព្រឹត្តដោយបុរសវ័យ៣២ឆ្នាំ ដែលបានដុតមន្ទីរពេទ្យនិងផ្ទះ។
មេប៉ូលិសលោកហ្វ្រេដ វេសធឺបេក(Fred Westerbeke )បានប្រាប់អ្នកយកព័ត៌មានថា ជនល្មើសបានសំរុកចូលក្នុងផ្ទះមួយនៅទីក្រុងកំពង់ផែរបស់ហូឡង់និងបាញ់ប្រហារ ដោយសម្លាប់ស្ត្រីវ័យ៣៩ឆ្នាំម្នាក់និងបង្ករបួសកូនស្រីអាយុ១៤ឆ្នាំ ។ក្មេងស្រីនេះបានស្លាប់ដោយរបួសនៅពេលក្រោយមក។
បុរសនេះបានបន្តចូលទៅក្នុងថ្នាក់រៀនមួយនៅមន្ទីរពេទ្យសកលវិទ្យាល័យមួយ និងបាញ់សម្លាប់គ្រូងបង្រៀនអាយុ៤៦ឆ្នាំម្នាក់ មុនចាប់ផ្តើមដុតទីតាំងនោះដោយបង្កការភិតភ័យក្នុងចំណោមមនុស្សនៅទីនោះ។
ប៉ូលិសបានសំរុកចូលមន្ទីរពេទ្យនៅពេលបុគ្គលិកពេទ្យសំរុកចេញពីអាគារ ដោយខ្លះរុញទាំងអ្នកជំងឺនៅក្នុងរទេះចេញមកផង។
ជនសង្ស័យត្រូវបានប៉ូលិសឃាត់ខ្លួននៅពេលក្រោយមកនិងរដ្ឋអាជ្ញាបាននិយាយថា ជនសង្ស័យបានសហការជាមួយប៉ូលិសក្រោយការចាប់ខ្លួនតែពេលនេះលោកមិនអាចបញ្ជាក់អំពីហេតុផលដែលបណ្តាលអោយមានការបាញ់ប្រហារនេះនៅឡើយទេ។
អាជ្ញាធរបាននិយាយថា ជនសង្ស័យមានកាំភ្លើងតែមួយនិងប្រហែលជាមិនមានជនសមគំនិតផ្សេងទេ នៅពេលប៉ូលិសបាននិយាយថា ជនសង្ស័យជាសិស្សនៅមន្ទីរពេទ្យ និងធ្លាប់ជាប់ចោទពីបទប្រព្រឹត្តអំពើព្រៃផ្សៃលើសត្វ។
ទីក្រុងរ៉ត់ធឺដាំ ធ្លាប់ជាទីកន្លែងបាញ់ប្រហារ ដែលភាគច្រើនជាប់ពាក់ព័ន្ធនឹងក្រុមជួញដូរថ្នាំញៀនប្រជែងគ្នា។នៅឆ្នាំ២០១៩ មនុស្សបីនាក់ត្រូវបានបាញ់សម្លាប់នៅក្នុងរថយន្តក្រុងមួយនៅទីក្រុងអ៊ូត្រេច(Utrecht) ដោយបង្កអោយមានការតាមប្រមាញ់មនុស្សដ៏ធំមួយ។
នៅឆ្នាំ២០១១ ប្រទេសបានធ្លាក់ក្នុងការតក់ស្លុតនៅពេលបុរសម្នាក់សម្លាប់មនុស្សប្រាំមួយនាក់និងបង្ករបួស១០នាក់ទៀតក្នុងការបាញ់ប្រហារនៅក្នុងផ្សារមួយ៕