Views: 3
ដោយៈ យោធិន / កណ្តាលៈ ជាមួយទូកស្មាច់ម៉ាស៊ីន (អូប័រ) ចំនួន ២១ គ្រឿង ដែលជាអំណោយដ៏ថ្លៃថ្លារបស់ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កងយោធាមួកខៀវកម្ពុជា បានសកម្មក្នុងការហ្វឹកហាត់ ជំនាញផ្នែកសង្គ្រោះប្រជាជន ដែលប្រឈមនឹងគ្រោះមហន្តរាយ ដោយសារទឹកជំនន់ ដែលអាចកើតមានឡើង ជាយថាហេតុ ក្នុងរដូវវវស្សានេះ។
ក្នុងឱកាសអញ្ជើញចុះសួរសុខទុក្ខ និងសំណេះសំណាលជាមួយ កងកម្លាំងយោធាមួកខៀវ ដែលបាននិងកំពុងហ្វឹកហ្វឺន ជំនាញអន្តរាគមន៍ សង្គ្រោះគ្រោះមហន្តរាយ ដោយសារទឹកជំនន់ នៅចំណុចក្រោមស្ពានព្រែកក្តាម ក្នុងភូមិព្រែកក្តាម ឃុំកោះចិន ស្រុកពញាឮ ខេត្តកណ្តាល នាព្រឹកថ្ងៃទី១៨ ខែសីហា ឆ្នាំ២០២២ នាយឧត្តមសេនីយ៍ សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយក មជ្ឈមណ្ឌលជាតិ រក្សាសន្តិភាព បានថ្លែងកោតសរសើរនិងវាយតម្លៃខ្ពស់ នូវរាល់សកម្មភាពប្រឹងប្រែង យកចិត្តទុកដាក់ហ្វឹកហាត់ ជំនាញសង្គ្រោះគ្រោះមហន្តរាយ ក៏ដូចជា គ្រោះថ្នាក់ដោយវិបត្តិ ទឹកជំនន់ ក៏ដូចជា បណ្តាគ្រោះថ្នាក់ ក្នុងពេលធ្វើដំណើរតាមផ្លូវទឹក។
ប្រមុខកងយោធាមួកខៀវកម្ពុជា បានថ្លែងបន្តថាៈ ការហ្វឹកហាត់ជំនាញសង្គ្រោះនាពេលនេះ ធ្វើឡើងស្របទៅនឹងកម្ពុជា ត្រៀមលក្ខណៈក្នុងការបញ្ជូន កងកម្លាំងចូលរួមបេសកកម្មរបស់ អង្គការសហប្រជាជាតិ នាពេលខាងមុខនេះ ហើយក៏ជាការបន្ថែមនូវជំនាញសង្គ្រោះថ្មីមួយទៀត សម្រាប់កងយោធាមួកខៀវ ក្នុងការជួយសង្គ្រោះដល់មនុស្សជាតិ ទាំងក្នុងប្រទេស ក៏ដូចជាក្នុងតំបន់បេសកម្ម របស់អង្គការសហប្រជាជាតិ។
សូមបញ្ជាក់ថាៈ យោងតាមច្បាប់ស្តីពីការគ្រប់គ្រងគ្រោះមហន្តរាយ យុទ្ធសាស្ត្រចតុកោណរបស់រាជរដ្ឋាភិបាល ដំណាក់កាលទី៤ ផែនការយុទ្ធសាស្ត្រអភិវឌ្ឍន៍ជាតិ (ឆ្នាំ២០១៩-២០២៣) និងគោលការណ៍សំខាន់ នៃការកាត់បន្ថយ ហានិភ័យគ្រោះមហន្តរាយដោយសារទឹកជំនន់ ឱ្យកាន់តែមានប្រសិទ្ធភាពថែមទៀត និងដើម្បីការពារអាយុជីវិត និងជីវភាពរស់នៅរបស់ បងប្អូនប្រជាពលរដ្ឋ ថែទាំសុខភាព វប្បធម៌ កេរ្តិ៍ដំណែល ទ្រព្យសម្បត្តិ និងប្រព័ន្ធអេកូឡូស៊ីពីឥទ្ធិពលគ្រោះថា្នក់នៃ គ្រោះមហន្តរាយផ្សេងៗ នៅទូទាំងប្រទេសកម្ពុជា។
បន្ថែមពីលើនេះ វគ្គហ្វឹកហ្វឺននេះ មានរយៈពេលបីសប្តាហ៍ ដោយចាប់ផ្តើមហ្វឹកហ្វឺន ពីថ្ងៃទី៣ ខែសីហា ដល់ថ្ងៃទី២៣ ខែសីហា ឆ្នាំ២០២២ ដោយមានសិក្ខាកាម ចូលរួមចំនួន ៣៥ នាក់ និងយោធាចារ្យ ១០នាក់ ក្នុងនោះមាន ពេទ្យសង្គ្រោះបឋម (First Aid) មកពីជំនាញគ្រប់គ្រងភស្តុភារ ហិរញ្ញវត្ថុ សុខាភិបាល និងសំណង់ និងក្រុមគ្រូបើកបរទូកស្មាច់ (អូប័រ) និងបច្ចេកទេសជួសជុល មកពីជំនាញគ្រប់គ្រងស្តង់ដារ សម្ភារបចេ្ចកទេស ព្រមទាំងនាយទាហាន សម្របសម្រួល របស់នាយកដ្ឋានផែនការ ប្រតិបត្តិការ និងហ្វឹកហ្វឺន នៃមជ្ឈមណ្ឌលជាតិ (NPMEC) ជាច្រើនរូបបានចូលរួម។
ថ្លែងទៅកាន់សិក្ខាកាម នាយឧត្តមសេនីយ៍ សែម សុវណ្ណនី បានមានប្រសាសន៍ថាៈ ដោយសារអាកាសធាតុ មានភ្លៀងធ្លាក់ជាប់ជាប្រចាំផងនោះ ស្ថានភាពទឹកជំនន់ និងមានដោយយថាហេតុ នៅតាមបណ្តាខេត្តមួយចំនួន ជាបន្តបន្ទាប់ ដូចនេះកងកម្លាំងទាំងអស់ ត្រូវត្រៀមលក្ខណៈ ឱ្យបានគ្រប់គ្រាន់ ដើម្បីចេញអន្តរាគមន៍ ២៤ម៉ោង លើ ២៤ម៉ោង តាមបទបញ្ជារបស់រាជរដ្ឋាភិបាល និងការស្នើសុំពីអាជ្ញាធរមូលដ្ឋាន ដើម្បីចុះជួយសង្គ្រោះប្រជាពលរដ្ឋ ដែលរងគ្រោះដោយធម្មជាតិ ដោយយថាហេតុផ្សេងៗ ដែលកើតមានឡើង ក្នុងភូមិសាស្ត្រនានា។
ក្នុងឱកាសនោះដែរ នាយឧត្តមសេនីយ៍ ប្រមុខកងយោធាមួកខៀវកម្ពុជា ក៏បានណែនាំដល់នាយទាហាន នាយទាហានរង និងពលទាហាន ជាសិក្ខាកាមទាំងអស់ ត្រូវបំពេញតួនាទីភារកិច្ច តាមផែនការរបស់រាជរដ្ឋាភិបាល ជាពិសេសសម្តេចតេជោ នាយរដ្ឋមន្ត្រីនៃកម្ពុជា សម្តេចពិជ័យសេនា ទៀ បាញ់ និងលោក ឧបនាយករដ្ឋមន្ត្រី ប្រាក់ សុខុន ប្រធានគណៈកម្មាធិការជាតិ ឲ្យបានខ្ជាប់ខ្ជួន ដើម្បីសម្រេចបានលទ្ធផលល្អ ជូនជាតិ មាតុភូមិ និងប្រជាជន និងថែទាំសុខភាព ឱ្យបានល្អ ៣កុំ ៣ការពារ ដើម្បីជៀសវាង នៃការរីករាលដាលនៃជំងឺកូវីដ-១៩៕/V
