Views: 16
ដោយ៖ ដេប៉ូ / ភ្នំពេញ៖ ក្រសួងការងារ និងបណ្តុះបណ្តាវិជ្ជាជីវៈ បានចេញសេចក្តីបំភ្លឺ មួយ ពាក់ព័ន្ធទៅនឹងដំណោះស្រាយវិវាទការងារ នៅក្រុមហ៊ុនណាហ្គាវើលដ៍ ដែលគិតរហូតមកដល់ពេលនេះ នៅមិនទាន់បញ្ចប់នៅឡើយ។
បើយោងតាមសេចក្តីបំភ្លឺ របស់ការិយាល័យ អ្នកនាំពាក្យក្រសួងការងារ នៅថ្ងៃទី ១ ខែ តុលា ឆ្នាំ២០២២ នេះ បានបញ្ជាក់ពីសាវតានៃវិវាទ និងដំណោះស្រាយរបស់ ក្រសួងការងារ និងបណ្តុះបណ្តាលវិជ្ជាជីវៈ ផងដែរ។
ក្រសួងការងារ បានបញ្ជាក់ក្នុងសេចក្តីបំភ្លឺរបស់ខ្លួនថាៈ តាមរយៈយន្តការគណៈកម្មការ សម្រាប់ដោះស្រាយបញ្ហា កូដកម្ម បាតុកម្ម នៅតាមគ្រប់មុខសញ្ញា បានកោះអញ្ជើញ ភាគីទាំងពីរ មកចរចាទល់មុខគ្នា បាន ១៨លើក (បន្ទាប់ពីតំណាងអតីតបុគ្គលិក បាននៅក្រៅឃុំជាបណ្ដោះអាសន្ន) និងជួបចរចាដោយឡែកជាច្រើនលើកផងដែរ ដើម្បី ស្វែងរកលទ្ធភាពជម្រើសដំណោះស្រាយ។ ប៉ុន្តែ វិវាទនេះ មិនបានសះជាឡើយ ដោយចំណុចដែលមិនសះជា និងគ្មានដំណោះស្រាយនោះ គឺភាគីអតីតបុគ្គលិក នៅតែបន្តទាមទារឱ្យក្រុមហ៊ុន ត្រូវតែទទួលយកអតីតបុគ្គលិក ដែលនៅសេសសល់ ឱ្យចូលធ្វើការវិញ ចំណែកក្រុមហ៊ុន បានបន្តបដិសេធ លើការទាមទារនេះ ដោយយល់ព្រម អនុវត្តការទូទាត់សំណង ស្របតាមច្បាប់ ជាធរមានជំនួសវិញ។ តាមច្បាប់ ក្រសួងមិនអាចបង្ខំឱ្យភាគីណាមួយ ត្រូវតែយល់ព្រម តាមអ្នកផ្សះផ្សាវិវាទ ឡើយ។ ការព្រម ឬមិនព្រមទទួលយក អតីតបុគ្គលិក ឱ្យចូលធ្វើការវិញ គឺអាស្រ័យទៅលើ ការសម្រេចចិត្តរបស់ភាគីនិយោជក ស្របតាមនីតិវីធីច្បាប់។
ក្រសួងការងារ បានឱ្យដឹងថាៈ គិតត្រឹមថ្ងៃទី១ ខែតុលា ឆ្នាំ២០២២ នេះ មានអតីតបុគ្គលិក សរុបចំនួន ២៤៤នាក់ ក្នុងចំណោម ៣៧៣ នាក់ បានយល់ព្រម ទទួលយកការទូទាត់ នូវប្រាក់បំណាច់បញ្ចប់កិច្ចសន្យាការងារ ជាមួយក្រុមហ៊ុន ដែលធ្វើឱ្យចំនួន អតីតបុគ្គលិក ដែលមិនព្រមទទួលយកសំណង នៅសល់ត្រឹមតែចំនួន ១២៩នាក់ ប៉ុណ្ណោះ។ ចំពោះអតីតបុគ្គលិក ដែលនៅសេសសល់ ក្រសួងនឹងរៀបចំ កិច្ចប្រជុំ នៅថ្ងៃទី៦ ខែតុលា ឆ្នាំ២០២២ ដើម្បីបន្តសម្របសម្រួល ដោះស្រាយវិវាទ ការងារនេះ។
ទាក់ទិនក្នុងរឿងនេះ ក្រសួងការងារ បានលើកឡើងថាៈ ”ចំពោះបញ្ហាដែលជាប់គាំងកន្លងមកនេះ គឺមិនមែនជាការព្រងើយកន្តើយរបស់ក្រសួងឡើយ”។
ជាមួយគ្នានេះ ក្រសួងការងារ បានឱ្យដឹងដែរថាៈ សម្រាប់បងប្អូនអតីតបុគ្គលិក ដែលមិនទាន់មានការងារថ្មី ហើយមានបំណងស្វែងរកការងារធ្វើ សូមទាក់ទងមក ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាល វិជ្ជាជីវៈ ដែលមាន អាសយដ្ឋាន ស្ថិតនៅមហាវិថីសហព័ន្ធរុស្ស៊ី សង្កាត់ទឹកល្អក់១ ខណ្ឌទួលគោក រាជធានីភ្នំពេញ ឬទំនាក់ទំនង តាមរយៈទូរសព្ទលេខ 077 232 378 / 016 786 655 ឬតាមរយៈគេហទំព័រ www.nea.gov.kh និងហ្វេសប៊ុក www.facebook.com/neakhmer ដើម្បីក្រសួងស្វែងរកការងារថ្មី ជូនដូចអតីតបុគ្គលិកមួយចំនួន បានធ្វើកន្លងមក៕ V / N
