Views: 8
ដោយៈទេព មង្គល / ភ្នំពេញៈ ក្រសួងសុខាភិបាល បានសេចក្តីប្រកាសព័ត៌មានមួយ កាលពីថ្ងៃទី៣០ ខែវិច្ឆិកា ឆ្នាំ២០២២ ស្តីពីករណីរំលូតគភ៌ស្លាប់ក្នុងផ្ទៃ អាយុ ១៨ សប្តាហ៍ នៅមន្ទីរសម្រាកព្យាបាលដើមអង្គ្រង (ព្រៃទទឹង) ស្ថិតក្នុងភូមិលៀក ឃុំព្រះនិពាន្វ ស្រុកគងពិសី ខេត្តកំពង់ស្ពឺ។
ក្រសួងសុខាភិបាល បានប្រកាសថាៈ ក្រោយពីទទួលបានព័ត៌មាន តាមការចុះផ្សាយ ក្នុងបណ្ដាញព័ត៌មានសង្គម ស្ដីពីមានហេតុការណ៍រំលូតគភ៌ក្នុងផ្ទៃស្ត្រី ដែលមានឈ្មោះ សឿន ស្រីអូន អាយុ ២២ឆ្នាំ នៅមន្ទីរសម្រាកព្យាបាលដើមអង្គ្រង (ព្រៃទទឹង) ស្ថិតនៅតាមបណ្ដោយផ្លូវជាតិលេខ៣ ភូមិលៀក ឃុំព្រះនិពាន្ធ ស្រុកគងពិសី ខេត្តកំពង់ស្ពឺ នាថ្ងៃទី២៩ ខែវិច្ឆិកា ឆ្នាំ២០២២ ភ្លាមៗនោះ ក្រសួងសុខាភិបាល បានចាត់បញ្ជូន ក្រុមការងារបច្ចេកទេសរបស់ក្រសួង ដោយរួមសហការជាមួយ អាជ្ញាធរខេត្តកំពង់ស្ពឺ និងមន្ទីរសុខាភិបាល នៃរដ្ឋបាលខេត្តកំពង់ស្ពឺ ចុះពិនិត្យស្រាវជ្រាវករណីកើតហេតុ បណ្តាលមកពីការរំលូតគភ៌ក្នុងផ្ទៃស្ត្រីខាងលើ ដែលក្រសួងសុខាភិបាល សូមបញ្ជាក់ជូន ដូចខាងក្រោមនេះ៖
១. ក្រសួង មានការសោកស្តាយ ជាពន់ពេកនូវហេតុការណ៍រំលូតគភ៌ក្នុងផ្ទៃអាយុ ១៨ សប្តាហ៍ របស់ស្ត្រីដែលមាន ឈ្មោះខាងលើ នៅមន្ទីរសម្រាកព្យាបាល ដើមអង្គ្រង ដោយមន្ទីរសម្រាកព្យាបាលនេះ មានការធ្វេសប្រហែស បានអនុញ្ញាតឱ្យឆ្មប ដែលមាន ការបណ្តុះបណ្ដាល ចេញជាឆ្មបមែន តែឆ្មបរូបនេះ នៅមិនទាន់ទទួលបានការបណ្តុះ បណ្ដាលបន្ថែម ស្តីពីការ រំលូតគភ៌នៅឡើយ ដែលការអនុវត្តនេះ ខុសពីបច្ចេកទេស គោលការណ៍ណែនាំ របស់ក្រសួងសុខាភិបាល ជាពិសេសការណែនាំបច្ចេកទេស ពីមជ្ឈមណ្ឌលជាតិ គាំពារមាតា និងទារក និងបទដ្ឋានគតិយុត្តនានារបស់ក្រសួង និងពីគណៈវិជ្ជាជីវៈឆ្មប ។ បច្ចុប្បន្ននេះ ស្ត្រីរងគ្រោះ កំពុងតែសម្រាកព្យាបាល និងជួយ សង្គ្រោះអាយុជីវិត ដោយយកចិត្តទុកដាក់បំផុត ពីក្រុមគ្រូពេទ្យ នៃមន្ទីរពេទ្យកាល់ម៉ែត និងដោយមានការយកចិត្តទុកដាក់ដ៏ខ្ពង់ខ្ពស់ ជួយគាំទ្រដល់ការព្យាបាល ទាំងស្រុងពី សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ផងដែរ។
២. តាមរយៈការពិនិត្យ និងស្រាវជ្រាវ នាថ្ងៃដដែល ខាងលើនេះ ក្រសួងក៏បានសម្រេច បិទជាបណ្តោះអាសន្ន មន្ទីរសម្រាកព្យាបាល ដើមអង្គ្រង ដើម្បីបន្តនីតិវិធីស្រាវជ្រាវ តាមច្បាប់ជាធរមាន នូវហេតុការណ៍ ដែលបានកើតឡើង គួរឱ្យសោកស្តាយ ជាទីបំផុតនេះ។
៣. ក្រសួង តម្រូវឱ្យមន្ទីរសម្រាកព្យាបាល ដើមអង្គ្រង ដែលមានអាសយដ្ឋានខាងលើ ទទួលខុសត្រូវ ចំពោះមុខច្បាប់ជាធរមាន លើបាតុភាព ដែលបានកើតមានឡើង ដែលបណ្តាលមកពី ការធ្វេសប្រហែសរបស់ខ្លួន។
៤. ចំពោះករណីឆ្មប ដែលបានអនុវត្តការរំលូតគភ៌ក្នុងផ្ទៃ អាយុ ១៨ សប្តាហ៍ របស់ស្ត្រី ខាងលើនេះ ក្រសួងក៏បានចាត់ឱ្យគណៈវិជ្ជាជីវៈឆ្មប ចុះធ្វើការស្រាវជ្រាវជាបន្ត ជាបន្ទាន់ ផងដែរ ដោយអនុលោមតាមច្បាប់ គ្រង់គ្រងអ្នកប្រកបវិជ្ជាជីវៈសុខាភិបាល ដែលមាន ជាធរមាន។ គណៈវិជ្ជាជីវៈឆ្មប ដែលស្ថិតនៅក្រោមសមត្ថកិច្ចរបស់ខ្លួន បានស្រាវជ្រាវ និងពិនិត្យលក្ខណៈបច្ចេកទេសឆ្មប់ យ៉ាងល្អិតល្អន់ ហើយបានសម្រេចដាក់ទណ្ឌកម្ម ខាងវិន័យ ទៅលើឆ្មបឈ្មោះ អ៊ុង ធារិន ដោយផ្អាកការប្រកបវិជ្ជាជីវៈឆ្មប ជាបណ្ដោះអាសន្ន (រយៈពេល ២ ឆ្នាំ) យោងតាមមាត្រាទី១៥ នៃច្បាប់ស្តីពីការគ្រប់គ្រង អ្នកប្រកបវិជ្ជាជីវៈ វិស័យសុខាភិបាល។
សារជាថ្មីម្តងទៀត ក្រសួងសុខាភិបាល មានការសោកស្តាយយ៉ាងខ្លាំង នូវហេតុការណ៍ ដែលបានកើតមានឡើង លើករណីស្ត្រីខាងលើនេះ និងសូមប្រសិទ្ធិពរ ជូនដល់ក្មួយស្រី សឿន ស្រីអូន សូមឱ្យឆាប់បានជាសះស្បើយ៕/V