Views: 1
ប្រែសម្រួល : កញ្ញាដាលីស (ប៊ីប៊ីស៊ី) ៖ក្រុមអាជ្ញាកណ្តាលស្រីសុទ្ធនឹងទទួលបន្ទុកចាត់ចែងការប្រកួតវើលខាប់ផ្នែកបុរសជាលើកដំបូងនៅក្នុងការប្រកួតវគ្គចែកពូលនៅថ្ងៃព្រហស្បតិ៍ទី១ធ្នូរវាងកូស្តារីកានិងអាល្លឺម៉ង់។
លោកស្រី ស្តេហ្វានី ហ្វ្រាបផាត (Stephanie Frappart) នឹងក្លាយជាស្ត្រីដំបូងគេដែលធ្វើជាអាជ្ញាកណ្តាលនៅវើលខាប់បុរស។
ស្ត្រីជនជាតិបារាំងរូបនេះបានក្លាយជាមន្ត្រីស្ត្រីដំបូងគេនៅក្នុងការប្រកួតវើលខាប់នេះនៅពេលដែលលោកស្រីត្រូវបានចុចឈ្មោះធ្វើជាមន្ត្រីទីបួនសម្រាប់ការប្រកួតរវាងម៉ិកស៊ិកនិងប៉ូឡូញកាលពីថ្ងៃអង្គារសប្តាហ៍មុន។
លោកស្រីហ្វ្រាបផាតបានប្រាប់ BBC Sport មុនពេលការប្រកួតថា “យើងដឹងពីសម្ពាធ។ ប៉ុន្តែខ្ញុំគិតថាយើងនឹងមិនផ្លាស់ប្តូរខ្លួនយើងនោះទេ។ ចូរស្ងប់អារម្មណ៍ ផ្តោតអារម្មណ៍ ហើយកុំគិតច្រើនពេកអំពីប្រព័ន្ធផ្សព្វផ្សាយ និងអ្វីៗទាំងអស់ គ្រាន់តែផ្តោតលើទីលានបានហើយ”។
លោកស្រីហ្វ្រាបផាតនឹងត្រូវបានចូលរួមដោយលោកស្រី នូហ្សា ប៊ែក (Neuza Back) ជនជាតិប្រេស៊ីល និង លោកស្រី ការ៉ែន ឌាស មេឌីណា (Karen Diaz Medina)ជនជាតិម៉ិកស៊ិកនៅកីឡដ្ឋាន Al Bayt នៅថ្ងៃព្រហស្បតិ៍។
នៅពេលសួរថាតើលោកស្រីធ្លាប់មានយោបល់ពីកីឡាករ អ្នកចាត់ការទូទៅ ឬអ្នកគាំទ្រដោយសារលោកស្រីជាស្ត្រីដែរឬទេ លោកស្រីហ្វ្រាបផាតបាននិយាយថា “តាំងពីខ្ញុំចាប់ផ្តើមមក ខ្ញុំតែងតែត្រូវបានគាំទ្រដោយក្រុម ក្លិប និងកីឡាករ។ ខ្ញុំតែងតែត្រូវបានស្វាគមន៍នៅក្នុងកីឡដ្ឋាន ដូច្នេះខ្ញុំមានអារម្មណ៍ថាដូចជាអាជ្ញាកណ្តាលម្នាក់ទៀតនៅក្នុងទីលានដែរ។ ខ្ញុំត្រូវបានស្វាគមន៍ជានិច្ច ដូច្នេះខ្ញុំគិតថាខ្ញុំនឹងត្រូវបានស្វាគមន៍ដូចកាលពីមុនចឹងដែរ”។
លោកស្រីបានក្លាយជាស្ត្រីដំបូងគេដែលធ្វើជាអាជ្ញាកណ្តាលក្នុងការប្រកួតក្របខណ្ឌ Champions League សម្រាប់បុរសក្នុងឆ្នាំ ២០២០។
អាជ្ញាកណ្តាលវ័យ ៣៨ ឆ្នាំរូបនេះក៏ជាស្ត្រីដំបូងគេដែលទទួលបន្ទុកការប្រកួតក្នុង Uefa បុរសដ៏សំខាន់មួយដែរ នៅពេលដែល Liverpool និង Chelsea ជួបគ្នាក្នុងពានរង្វាន់ European Super Cup ឆ្នាំ ២០១៩ ។
ស្ត្រីបីនាក់គឺលោកស្រី ហ្វ្រាបផាត លោកស្រី សាលីម៉ា មូកានសានហ្គា (Salima Mukansanga) របស់រ៉វ៉ាន់ដា និងលោកស្រី យ៉ូស៊ីមី យ៉ាម៉ាស៊ីតា (Yoshimi Yamashita) របស់ជប៉ុន គឺ ស្ថិតក្នុងចំណោមមន្ត្រីចំនួន ៣៦ នាក់ដែលត្រូវបានជ្រើសរើសឱ្យទទួលបន្ទុកការប្រកួតនៅក្នុងប្រទេសកាតា៕
លោកស្រីហ្វ្រាបផាតនឹងកាត់សេចក្តីការប្រកួតរវាងកូស្តារីកានិងអាល្លឺម៉ង់នៅថ្ងៃព្រហស្បតិ៍
