Views: 1
ប្រែសម្រួល : កញ្ញាដាលីស (ដេល្លីម៉េល) ៖ រដ្ឋមន្ត្រីការបរទេសអាម៉េរិក លោក អានថូនី ប្លីងកិន និងសមភាគីណាតូកំពុងជួបជុំគ្នាក្នុងប្រទេសរ៉ូម៉ានីនៅថ្ងៃអង្គារនេះដើម្បីប្រមូលការគាំទ្រជាបន្ទាន់សម្រាប់អ៊ុយក្រែន រួមទាំងការចែកចាយគ្រឿងបន្លាស់អគ្គិសនីសម្រាប់បណ្តាញបញ្ជូនថាមពលដែលរងការបំផ្លិចបំផ្លាញនៅប្រទេសហែកហួរដោយសង្គ្រាមនេះ។
បណ្តាញអគ្គិសនីរបស់អ៊ុយក្រែនត្រូវបានវាយប្រហារទូទាំងប្រទេសចាប់តាំងពីដើមខែតុលាដោយការបាញ់មីស៊ីលពីរុស្ស៊ីនៅក្នុងអ្វីដែលក្រុមមន្ត្រីអាម៉េរិកហៅថាជាយុទ្ធនាការរបស់រុស្ស៊ីដើម្បីយករដូវរងាធ្វើជាអាវុធ។
នៅមុនកិច្ចប្រជុំ អគ្គលេខាធិការអង្គការណាតូ លោក ជែន ស្តូលធិនបឺក (Jens Stoltenberg)ក៏បាននិយាយផងដែរថា ប្រធានាធិបតីរុស្ស៊ី លោក វ្ល៉ាឌីមៀ ពូទីន”កំពុងព្យាយាមប្រើរដូវរងាធ្វើជាអាវុធប្រឆាំងនឹងអ៊ុយក្រែន” ហើយថាសម្ពន្ធមិត្តរបស់ណាតូនិងអ៊ុយក្រែន “ត្រូវតែត្រៀមខ្លួនសម្រាប់ការវាយប្រហារបន្ថែមទៀត”។
កិច្ចប្រជុំនៅរដ្ឋធានីប៊ូការ៉េស (Bucharest) ទំនងជាឃើញណាតូសន្យានូវការគាំទ្រថ្មីដែលមិនមានគ្រោះថ្នាក់ដល់អ៊ុយក្រែន គឺមានដូចជា ប្រេងឥន្ធនៈ ម៉ាស៊ីនភ្លើង ការផ្គត់ផ្គង់វេជ្ជសាស្ត្រ ឧបករណ៍សម្រាប់រដូវរងា និងឧបករណ៍បំផ្ទុះដ្រូន។ មន្ត្រីអាម៉េរិកបាននិយាយថា លោកប្លីងកិននឹងប្រកាសជំនួយដ៏ច្រើនរបស់សហរដ្ឋអាម៉េរិកសម្រាប់បណ្តាញថាមពលអ៊ុយក្រែន។
សម្ពន្ធមិត្តនីមួយៗក៏ទំនងជានឹងប្រកាសពីការផ្គត់ផ្គង់សម្ភារៈយោធាថ្មីៗសម្រាប់អ៊ុយក្រែនផងដែរ ជាពិសេសប្រព័ន្ធការពារដែនអាកាស ដែលរដ្ឋាភិបាលក្រុងគៀវកំពុងស្វែងរកយ៉ាងខ្លាំងដើម្បីការពារផ្ទៃមេឃរបស់ខ្លួន ប៉ុន្តែណាតូក្នុងនាមជាអង្គការមួយ នឹងមិនផ្តល់ឱ្យនោះទេ ដើម្បីបញ្ចៀសការអូសទាញចូលទៅក្នុងសង្គ្រាមកាន់តែទូលំទូលាយជាមួយរុស្ស៊ីដែលប្រដាប់ដោយអាវុធនុយក្លេអ៊ែរ។
ក្រុមរដ្ឋមន្ត្រី រួមជាមួយនឹងសមភាគីអ៊ុយក្រែន លោក ឌីមីត្រូ គូឡេបា (Dmytro Kuleba) ក៏នឹងសម្លឹងមើលទៅឆ្ងាយជាងនេះផងដែរ។
លោកស្តូលធិនបឺកបាននិយាយកាលពីថ្ងៃសុក្រសប្តាហ៍មុនថា “ក្នុងរយៈពេលវែងជាងនេះ យើងនឹងជួយអ៊ុយក្រែនក្នុងការផ្លាស់ប្តូរពីឧបករណ៍សម័យសូវៀតទៅជាឧបករណ៍ស្តង់ដារទំនើប គោលលទ្ធិ និងការហ្វឹកហ្វឺនរបស់ណាតូ”៕
រដ្ឋមន្ត្រីការបរទេសអាម៉េរិក លោក អានថូនី ប្លីងកិន (ឆ្វេង) និង អគ្គលេខាធិការអង្គការណាតូ លោក ជែន ស្តូលធិនបឺក ជួបប្រជុំនៅទីក្រុងប៊ូការ៉េសរបស់រ៉ូម៉ានីនៅថ្ងៃអង្គារនេះ
