Views: 15
ប្រែសម្រួល : កញ្ញាដាលីស (ដេល្លីម៉េល) ៖ ទីបំផុតសភាតំណាងរាស្ត្រអាម៉េរិកបានបោះឆ្នោតជ្រើសរើសប្រធានថ្មីកាលពីថ្ងៃពុធ ដោយបញ្ចប់សប្តាហ៍នៃការឈ្លោះគ្នាដ៏ជូរចត់របស់គណបក្សសាធារណរដ្ឋ ដែលបានធ្វើឱ្យសភាជាប់គាំងនៅគ្រាដែលកំពុងមានវិបត្តិក្នុងឆាកអន្តរជាតិនិងក្នុងស្រុក។
លោក ម៉ៃ ចនសុន (Mike Johnson) ដែលជាសម្ពន្ធមិត្តគេស្គាល់តិចតួចរបស់លោក ដូណាល់ ត្រាំ ដែលបានដឹកនាំកិច្ចខិតខំប្រឹងប្រែងផ្នែកច្បាប់ដើម្បីផ្តួលរំលំការបោះឆ្នោតឆ្នាំ ២០២០ បានទទួលការគាំទ្រជាឯកច្ឆន្ទពីគណបក្សរបស់គាត់ដើម្បីដឹកនាំសភាជាន់ទាប ដែលបានជាប់គាំងចាប់តាំងពីលោក ខេវិន ម៉ាកកាធី (Kevin McCarthy) ត្រូវបានបណ្តេញចេញក្នុងរដ្ឋប្រហារពីសំណាក់ពួកស្តាំនិយមកាលពីថ្ងៃទី៣ ខែតុលា។
លោកចនសុនបាននិយាយខណៈលោកកាន់ញញួរប្រធាន យ៉ាងដូច្នេះថា “ខ្ញុំគិតថាប្រជាជនអាម៉េរិកទាំងអស់នៅពេលមួយធ្លាប់មានមោទនភាពយ៉ាងខ្លាំងចំពោះស្ថាប័ននេះ ប៉ុន្តែឥឡូវនេះវាស្ថិតក្នុងគ្រោះថ្នាក់។ ហើយយើងមានការប្រឈមនៅចំពោះមុខយើងនាពេលនេះក្នុងការកសាងនិងស្ដារឡើងវិញនូវទំនុកចិត្តនោះ។”
“វាជាភាពស្រស់ស្អាតរបស់អាម៉េរិកដែលអនុញ្ញាតឱ្យក្មេងពន្លត់អគ្គិភ័យដូចរូបខ្ញុំមកទីនេះ ហើយបម្រើក្នុងបន្ទប់សភាដ៏ពិសិដ្ឋ ដែលបុរសនិងស្ត្រីដ៏អស្ចារ្យធ្លាប់បានបម្រើការមុនពួកយើងទាំងអស់គ្នា។”
លោកចនសុននឹងក្លាយជាប្រធានសភាដែលមានបទពិសោធន៍តិចបំផុតនៅក្នុងយុគសម័យក្រោយសង្គ្រាមស៊ីវិល ដោយមិនធ្លាប់ធ្វើជាប្រធានគណៈកម្មាធិការ ឬកាន់តួនាទីជាអ្នកដឹកនាំជាន់ខ្ពស់នោះទេ។
គាត់នឹងប្រឈមមុខស្ទើរតែភ្លាមៗនូវលទ្ធភាពនៃការបិទរដ្ឋាភិបាលដែលអាចគំរាមកំហែងដល់ការងាររបស់គាត់ លុះត្រាតែគាត់អាចកាត់បន្ថយកិច្ចព្រមព្រៀងថវិកាឆ្នាំ ២០២៤ ជាមួយគូប្រជែងចាស់វស្សាដូចជា មេដឹកនាំសំឡេងភាគច្រើននៃព្រឹទ្ធសភា លោក ឆាក់ ស៊ូមឺ (Chuck Schumer) និងប្រធានាធិបតី ចូ បៃដិន។
លោកចនសុនក៏ត្រូវគេរំពឹងថានឹងដឹកនាំសន្និសីទដែលបាក់បែកយ៉ាងខ្លាំងរបស់គាត់ឆ្លងកាត់ការឈ្លោះគ្នាបែកផ្សែងនាពេលខាងមុខអំពីការផ្តល់មូលនិធិសម្រាប់អ៊ុយក្រែន និងអ៊ីស្រាអែលផងដែរ។
ភ្លាមៗបន្ទាប់ពីសុន្ទរកថារបស់គាត់ គាត់បានណែនាំសេចក្តីសម្រេចចិត្តមួយដែលគាំទ្រសម្ពន្ធមិត្តមជ្ឈិមបូព៌ារបស់អាម៉េរិកក្នុងជម្លោះរបស់ខ្លួនជាមួយពួកសកម្មប្រយុទ្ធហាម៉ាស។ វាបានទទួលការគាំទ្រពីតំណាងរាស្ត្រទាំងអស់លើកលែងតែសមាជិកគណបក្សប្រជាធិបតេយ្យប្រាំបួនរូបនិងសមាជិកគណបក្សសាធារណរដ្ឋតែម្នាក់ប៉ុណ្ណោះដែលជំទាស់។
លោកចនសុនបានប្រាប់សមាជិកសភាថា “យើងទាំងអស់គ្នាដឹងថាពិភពលោកកំពុងស្ថិតក្នុងភាពចលាចល ប៉ុន្តែអាម៉េរិកដ៏រឹងមាំគឺល្អសម្រាប់ពិភពលោកទាំងមូល។ យើងជាពន្លឺនៃសេរីភាព។”
លោកបៃដិនបានអបអរសាទរប្រធានសភាថ្មី ហើយប្តេជ្ញាថានឹងធ្វើការជាមួយគាត់ ដោយបន្ថែមថា សហរដ្ឋអាម៉េរិកឥឡូវនេះត្រូវការ “ផ្លាស់ទីទៅមុខយ៉ាងឆាប់រហ័សដើម្បីដោះស្រាយតម្រូវការសន្តិសុខជាតិរបស់យើងនិងដើម្បីចៀសវាងការបិទរដ្ឋាភិបាល”៕
លោក ម៉ៃ ចនសុន ស្បថកាន់តំណែងប្រធានសភាអាម៉េរិកកាលពីថ្ងៃពុធ