Views: 4
ប្រែសម្រួល : កញ្ញាដាលីស (ដេល្លីម៉េល) ៖ ក្រុមមន្ត្រី ដែលគាំទ្រដោយវិមានក្រឹមឡាំងក្នុងប្រទេសអ៊ុយក្រែន បានអំពាវនាវទៅកាន់ប្រធានាធិបតី វ្ល៉ាឌីមៀ ពូទីន កាលពីថ្ងៃពុធទី២៨កញ្ញាឱ្យកាត់យកតំបន់ដែលស្ថិតនៅក្រោមការគ្រប់គ្រងរបស់ពួកគេ បន្ទាប់ពីទឹកដីទាំងនោះបានបោះឆ្នោតប្រជាមតិគាំទ្រការចូលទៅជាផ្នែកនៃទឹកដីរុស្ស៊ីទោះជាវាត្រូវបានថ្កោលទោសដោយរដ្ឋាភិបាលក្រុងគៀវនិងលោកខាងលិចថាជា “ការក្លែងបន្លំ”។
ទាហានរបស់សាធារណរដ្ឋលូហ្កាន់សខ៍ ក្នុងតំបន់ខាគីវ
តំបន់ផ្តាច់ខ្លួនបួននៅអ៊ុយក្រែនខាងកើតនិងខាងត្បូងទើបធ្វើប្រជាមតិផ្តាច់ខ្លួនចូលរុស្ស៊ី
អ៊ុយក្រែនបានអំពាវនាវឱ្យសហភាពអឺរ៉ុបដាក់ទណ្ឌកម្មបន្ថែមទៀតលើរុស្ស៊ី និង អង្គការណាតូឱ្យបញ្ជូនអាវុធបន្ថែមទៀតទៅសមរភូមិជួរមុខ បន្ទាប់ពីពួកមន្ត្រីបន្តុបដោយវិមានក្រឹមឡាំងបានបញ្ចេញលទ្ធផលឆ្នោតកាលពីល្ងាចថ្ងៃអង្គារ។ការអំពាវនាវនេះបានកើតឡើង បើទោះបីជាមានការព្រមានម្តងហើយម្តងទៀតពីរដ្ឋាភិបាលក្រុងមូស្គូថា ខ្លួនអាចប្រើប្រាស់អាវុធនុយក្លេអ៊ែររបស់ខ្លួនដើម្បីការពារទឹកដីពីការវាយលុករបស់អ៊ុយក្រែន ដែលបានវាយដណ្តើមមកវិញនូវទឹកដីជាច្រើនក្នុងខែនេះរួចទៅហើយ។
ប្រធានាធិបតី វ៉ូឡូឌីមៀ ហ្សេលេនស្គី បាននិយាយថា “អ៊ុយក្រែនមិនអាចហើយនឹងមិនអត់ធ្មត់ចំពោះការប៉ុនប៉ងណាមួយរបស់រុស្ស៊ីដើម្បីដណ្តើមយកផ្នែកណាមួយនៃទឹកដីរបស់យើងទេ”។
សហរដ្ឋអាម៉េរិកបានប្រកាសកញ្ចប់សព្វាវុធនិងការផ្គត់ផ្គង់ថ្មីកាលពីថ្ងៃពុធដែលមានតម្លៃ ១,១ ពាន់លានដុល្លារ រួមមានប្រព័ន្ធគ្រាប់រ៉ុក្កែតបាញ់ត្រង់ៗ គ្រាប់យុទ្ធភ័ណ្ឌ រថពាសដែក និងរ៉ាដា។
គណៈកម្មាការអឺរ៉ុបបានស្នើដាក់ទណ្ឌកម្មថ្មី សំដៅលើការនាំចេញរបស់រុស្ស៊ីដែលមានតម្លៃប្រាំពីរពាន់លានអឺរ៉ូ ការកំណត់តម្លៃប្រេង ការធ្វើបញ្ជីខ្មៅការធ្វើដំណើរដែលបានពង្រីក និងការបង្កកទ្រព្យសម្បត្តិ។
សហភាពអឺរ៉ុបបានថ្កោលទោសការបោះឆ្នោត “ខុសច្បាប់” នេះ ហើយនិយាយថា លទ្ធផលត្រូវបាន “ក្លែងបន្លំ” ខណៈសេតវិមាននិងអធិការបតីអាល្លឺម៉ង់ លោក អូឡាហ្វ សូល (Olaf Scholz) បាននិយាយថា ពួកគេនឹង “មិន” ទទួលស្គាល់លទ្ធផលឆ្នោតនោះឡើយ។
នាយករដ្ឋមន្ត្រីអង់គ្លេសលោកស្រី លីស ត្រាស់ (Liz Truss) និងសមភាគីកាណាដារបស់លោកស្រី លោក ចាស្ទីន ទ្រូដូ បានប្តេជ្ញាមិនគោរពការបោះឆ្នោតនិងផ្តល់ការគាំទ្របន្ថែមទៀតដល់រដ្ឋាភិបាលក្រុងគៀវ។
ខេត្តលូហានសខ៍គឺជាតំបន់គ្រប់គ្រងដោយរុស្ស៊ីដំបូងគេក្នុងប្រទេសអ៊ុយក្រែនដែលបានអំពាវនាវដល់លោកពូទីនឱ្យជួយអន្តរាគមន៍ ដោយតំបន់ភាគខាងត្បូងដែលទើបនឹងដណ្តើមបាននាពេលថ្មីៗនេះគឺ ខេត្តហ្សាប៉ូរីហ្សហ្សានិងខេត្តឃើសុនបានអំពាវនាវឱ្យបោះឆ្នោតប្រជាមតិជាបន្តបន្ទាប់។
មានតែខេត្តដូណិតសខ៍មួយប៉ុណ្ណោះ ដែលមិនទាន់អំពាវនាវជាផ្លូវការឱ្យពូទីនកាត់យកទឹកដី។
ការអំពាវនាវទៅកាន់លោកពូទីនគឺតំណាងឱ្យចំណុចរបត់មួយនៅក្នុងការលុកលុយរយៈពេលប្រាំពីរខែ ខណៈក្រុមមន្ត្រីរុស្ស៊ីនៅទីក្រុងមូស្គូបានលើកឡើងថាពួកគេអាចប្រើប្រាស់អាវុធនុយក្លេអ៊ែរនៅក្នុងប្រទេសអ៊ុយក្រែន ហើយលោកពូទីនបានកោះហៅទាហានបម្រុងរាប់សែននាក់ដើម្បីពង្រឹងអំណាចរបស់វិមានក្រឹមឡាំងនៅក្នុងទឹកដីទាំងនោះ៕
កម្មករម្នាក់ពិនិត្យមើលការខូចខាតនៅជិតទីធ្លាផ្លូវរថភ្លើងនៃស្ថានីយរថភ្លើងដឹកជញ្ជូនទំនិញក្នុងក្រុងខាគីវ ដែលត្រូវបានបំផ្លាញមួយផ្នែកដោយការវាយប្រហារដោយមីស៊ីល
