Views: 5
ដោយៈបូកគោ / កំពត: កាលពីម៉ោង ៨ យប់ ថ្ងៃទី២៧ ខែកញ្ញា ឆ្នាំ២០២២ ក្រុមហ៊ុនស៊ីណូហាយដ្រូ បានបើកទ្វារបង្ហូរទឹកចេញពី អាងស្តុកទំនប់វារីអគ្គិសនីកំចាយ ព្រោះទឹកឡើងដល់កម្ពស់ជាង ១៤៨ ម៉ែត្រ។
បុគ្គលិកក្រុមហ៊ុនស៊ីណូហាយដ្រូ បានរាយការណ៍ថា នៅវេលាម៉ោង៨យប់ថ្ងៃទី២៧ ខែកញ្ញា ក្រុមការងារបច្ចេកទេស បានសម្រេចបើកបង្ហូរទឹកចេញពី អាងទំនប់វារីអគ្គិសនី កំចាយ។ ការបើកបង្ហូរនេះ គឺបានបង្ហើបទ្វារទឹកមួយ ក្នុងចំណោមទ្វារទាំងប្រាំ ដោយលើកកម្ពស់ មួយម៉ែត្រ ពីបាតទំនប់។ប្រភពដដែល បានបញ្ជាក់ថាៈ គ្រាដែលចាប់ផ្តើមបើកបង្ហូរចេញនេះ គឺកម្រិតទឹក បានឡើង ដល់កម្ពស់ ១៤៨,៦៤ ម៉ែត្រ។ ចំណែកទឹកហូរចូលអាងស្តុក មានចំណុះ ១៤៧,៨២ ម៉ែត្រត្រីគុណ ក្នុងមួយវិនាទី។
សូមបញ្ជាក់ថា កាលពីរសៀល ថ្ងៃទី២៧ ខែកញ្ញា ឆ្នាំ២០២២ គណៈកម្មាធិការ គ្រប់គ្រងគ្រោះមហន្តរាយខេត្តកំពត ជូនដំណឹងដល់សាធារណជន មានខ្លឹមសារថា ចាប់ពីថ្ងៃទី២៨ ខែកញ្ញា រហូតដល់ថ្ងៃទី៤ ខែតុលា ឆ្នាំ២០២២ នៅលើផ្ទៃសមុទ្រ អាចនឹងមានភ្លៀងលាយឡំជាមួយខ្យល់កន្ត្រាក់ បោកបក់ខ្លាំង បង្កជារលកសមុទ្រ ខ្ពស់ៗ។ ស្ថានភាពអាកាសធាតុ បែបនេះ ភ្លៀងនឹងនៅតែធ្លាក់បន្តបន្ទាប់ ពិសេស តំបន់ទំនប់វារីអគ្គិសនីកំចាយ ដោយទឹកក្នុងអាងទំនប់ សម្រាប់រសៀល ថ្ងៃទី២៧ ខែកញ្ញា ឆ្នាំ២០២២ មានកម្ពស់ ១៤៨,៦៩ ម៉ែត្រ។ ម្ល៉ោះហើយ ក្រុមការងារបច្ចេកទេសរបស់ ក្រុមហ៊ុនស៊ីណូហាយដ្រូ កំចាយ គ្រោងនឹងបើកទ្វាររំដោះទឹក តាមលក្ខណៈបច្ចេកទេស ដែលធ្វើឲ្យកម្រិតទឹក ក្នុងព្រែកកំពង់បាយ មានកម្ពស់លើសពីធម្មតា។ ដូច្នេះសូមបងប្អូន ប្រជាពលរដ្ឋ ដែលរស់នៅអមសងខាង ដងព្រែកកំពង់បាយ និងបងប្អូនប្រជានេសាទ ជ្រាបជាព័ត៌មាន៕ V / N
