Views: 10
ប្រែសម្រួល : កញ្ញាដាលីស (ដេល្លីម៉េល) ៖ ក្រុមហ៊ុន Toyota Motor Corp បានលក់រថយន្តចំនួន ១០,៥ លានគ្រឿងក្នុងឆ្នាំ ២០២២ដោយបានការពារតំណែងរបស់ខ្លួនជាក្រុមហ៊ុនផលិតរថយន្តដែលលក់ដាច់បំផុតរបស់ពិភពលោកក្នុងរយៈពេលបីឆ្នាំជាប់គ្នា។
ការលក់ជាសកលសម្រាប់ក្រុមនេះ រួមទាំងក្រុមហ៊ុនផលិតរថយន្តដឹកទំនិញ Hino Motors និងក្រុមហ៊ុនផលិតរថយន្តខ្នាតតូច Daihatsuរបស់ Toyota បានធ្លាក់ចុះត្រឹម ០,១ ភាគរយ ខណៈការលក់នៅក្រៅប្រទេសរហូតដល់ទៅ ៨,៦ លានគ្រឿងបានជួយទូទាត់ការធ្លាក់ចុះ ៩,៦ ភាគរយនៅក្នុងទីផ្សារក្នុងស្រុករបស់ខ្លួន ដែលលក់បានត្រឹម ១,៩ លានគ្រឿង។
គូប្រជែងលំដាប់ទីពីរគឺក្រុមហ៊ុន Volkswagen Group កាលពីដើមខែនេះបានរាយការណ៍ពីការលក់ទាបបំផុតរបស់ខ្លួនក្នុងរយៈពេលជាងមួយទសវត្សរ៍ គឺលក់បាន ៨,៣ លានគ្រឿងខណៈការបិទខ្ទប់ទប់ស្កាត់កូវីដនៅក្នុងប្រទេសចិននិងសង្គ្រាមនៅអ៊ុយក្រែនបានធ្វើឱ្យខ្សែសង្វាក់ផ្គត់ផ្គង់ក្រឡាប់ចាក់។
ខណៈឧបសគ្គផ្គត់ផ្គង់ទាក់ទងនឹងបន្ទះឈីបមួយចំនួននៅតែមានសម្រាប់ Toyotaផងដែរនោះ ក្រុមហ៊ុនផលិតរថយន្តជប៉ុននេះបាននិយាយថាតម្រូវការខ្លាំងនៅអាស៊ីនិងការកើនឡើងនៃសមត្ថភាពផលិតនិងការបង្កើនប្រសិទ្ធភាពនៅអាស៊ីនិងអាម៉េរិកខាងជើងបានជួយឱ្យក្រុមហ៊ុនជំរុញផលិតកម្មសកល ៥ ភាគរយក្នុងឆ្នាំ ២០២២។
ក្រុមហ៊ុន Toyota ក្នុងខែវិច្ឆិកាបានកែប្រែការព្យាករណ៍ផលិតកម្មរបស់ខ្លួនសម្រាប់ឆ្នាំហិរញ្ញវត្ថុបច្ចុប្បន្នរហូតដល់ចុងខែមីនាពី ៩,៧ លានគ្រឿង មកត្រឹម ៩,២ លានគ្រឿង៕
