Views: 12
ដោយៈសុវណ្ណកុម្ភៈ/ភ្នំពេញ ៖ មហាសន្និបាតOCAចាប់ពីថ្ងៃទី១ដល់៥ខែតុលាឆ្នាំ២០២២ខាងមុខនៅសណ្ឋាគារសុខា រ៉េស៊ីដង់ រាជធានីភ្នំពេញ។លោកបណ្ឌិត ថោង ខុន ប្រធានគណៈកម្មការរៀបចំមហាសន្និបាតក្រុមប្រឹក្សាកីឡាអូឡាំពិកអាស៊ី លើកទី៤១ (41st OCAGeneralAssembly)បានដឹកនាំកិច្ចប្រជុំដើម្បីត្រួតពិនិត្យវឌ្ឍនភាព ការងារចុងក្រោយសម្រាប់ការត្រៀមរៀបចំមហាសន្និបាតដ៏ធំនេះកាលពីថ្ងៃទី២៩ខែកញ្ញា។
រូបភាព ( លោកបណ្ឌិត ថោង ខុន ប្រធានគណៈកម្មការរៀបចំមហាសន្និបាតក្រុមប្រឹក្សាកីឡាអូឡាំពិកអាស៊ី លើកទី៤១ (41st OCAGeneralAssembly)បានដឹកនាំកិច្ចប្រជុំដើម្បីត្រួតពិនិត្យវឌ្ឍនភាព ការងារចុងក្រោយសម្រាប់ការត្រៀមរៀបចំមហាសន្និបាតដ៏ធំនេះកាលពីថ្ងៃទី២៩ខែកញ្ញា )
កិច្ចប្រជុំចុងក្រោយកាលម្សិលមិញនេះមានការចូលរួមពីតំណាងក្រុមប្រឹក្សាកីឡាអូឡាំពិកអាស៊ីគឺ លោក Tony Tarraf ប្រធានផ្នែកអភិវឌ្ឍន៍អត្តពលិក និងគម្រោងពិសេសរបស់ OCAបានធ្វើការវាយតម្លៃខ្ពស់ចំពោះការ
ត្រៀមលក្ខណៈសម្បត្តិធ្វើម្ចាស់ផ្ទះរបស់កម្ពុជាដែលបានត្រៀមខ្លួនរួចរាល់ ដើម្បីរៀបចំមហាសន្និបាត OCA នាដើមខែតុលាខាងមុខ។
កិច្ចប្រជុំត្រួតពិនិត្យការងាររបស់គ្រប់គណៈកម្មការជំនាញពិសេសពាក់ព័ន្ធការទទួលបដិសណ្ឋារកិច្ច ការស្នាក់នៅហូបចុកនិងដោះស្រាយគ្រប់បញ្ហាបន្ដិចបន្ដួចក្រោមកិច្ចសហការរវាងគណៈកម្មការអន្ដរក្រសួងជាមួយគ្រប់ក្រសួងស្ថាប័ននិងអាជ្ញាធររាជធានីភ្នំពេញ ក៏ដូចជាអាជ្ញាធរខណ្ឌជ្រោយចង្វារដើម្បីធានាបានការរៀបចំ មហាសន្និបាតនេះ ប្រកបដោយភាពជោគជ័យ សុវត្ថិភាព និងភាពកក់ក្ដៅ ដល់ភ្ញៀវចូលរួមទាំងអស់។
លោក វ៉ាត់ ចំរើន អគ្គលេខាធិការគណៈកម្មាធិការជាតិរៀបចំស៊ីហ្គេមឆ្នាំ២០២៣ (CAMSOC)បញ្ជាក់ថា ការងាររៀបចំការដឹកជញ្ជូនការទទួលបដិសណ្ឋារកិច្ចពីអាកាសយានដ្ឋានសម្រាប់ភ្ញៀវទាំងអស់ទាំងភ្ញៀវ កម្រិតVVIP,VIPនិងប្រតិភូទាំងអស់គឺបានរៀបចំរួចហើយ។
មកទល់ពេលនេះគឺមានប្រតិភូចំនួន៣០៦នាក់ហើយដែលជាភ្ញៀវផ្លូវការត្រៀមចូលរួមមហាសន្និបាត OCA នៅកម្ពុជាដែលមកពីបណ្ដាប្រទេសសមាជិក និងចលនាអូឡាំពិកអាស៊ី៤៥ប្រទេសបូករួមទាំងប្រទេសចូល រួមសង្កេតការណ៍១០ប្រទេសទៀតហើយក៏មានសែរាជវង្សដែលជាព្រះអង្គម្ចាស់នឹងយាងចូលរួមទៀតផងដែល សុទ្ធតែមានឋានៈខ្ពង់ខ្ពស់ក្នុងជួរាជរដ្ឋាភិបាលពិសេសមកពីបណ្ដាប្រទេសមជ្ឈឹមបូព៌ាក្នុងនោះក៏មានព្រះអង្គម្ចាស់រជ្ជទាយាទរបស់ប្រទេសប៊ូតាន់ ។ កត្តានេះហើយដែលធ្វើឲ្យកម្ពុជា បានត្រៀមខ្លួន និងយកចិត្តទុកដាក់ខ្ពស់ ក្នុងការងារទទួលបដិសណ្ឋារកិច្ច។
លោកបានបន្ថែមថា នេះជាពេលវេលាដែលយើងត្រូវស្វែងរកការគាំទ្រពីចលនាអូឡាំពិកក្នុងទ្វីបអាស៊ីរបស់យើង
ដើម្បីឱ្យកម្ពុជាក្លាយជាប្រទេសដែលធ្វើម្ចាស់ផ្ទះស៊ីហ្គេមនិងអាស៊ានប៉ារ៉ាហ្គេម ឆ្នាំ២០២៣និងធ្វើម្ចាស់ផ្ទះកីឡា យុវជនអាស៊ីឆ្នាំ២០២៩ឱ្យទទួលបានជោគជ័យ។អ្វីដែលយើងចង់បានយើងដឹងហើយការយកចិត្តទុកដាក់ដ៏ខ្ពង់ខ្ពស់របស់សម្ដេចតេជោនាយករដ្ឋមន្ដ្រី និងសម្ដេចពិជ័យសេនា ទៀ បាញ់បានយកចិត្តទុកដាក់និងផ្ដល់នូវភាព កក់ក្ដៅ ក្នុងការចង្អុលបង្ហាញ និងការរៀបចំការទទួលភ្ញៀវនេះឲ្យបានល្អ ថ្លៃថ្នូរក្នុងនាមម្ចាស់ផ្ទះប្រកបដោយ កិត្តិយសជាតិផ្សព្វផ្សាយទៅក្រៅប្រទេសឲ្យកេរ្ដិ៍ឈ្មោះកម្ពុជាកាន់តែលេចត្រដែត និងជំរុញការអភិវឌ្ឍន៍ជាតិ សេដ្ឋកិច្ច សង្គមរបស់យើងថែមទៀត។
អ្វីដែលពិសេសគឺការផ្ដល់កិត្តិយសដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជាដែលនឹង អញ្ជើញថ្លែងសន្ទរកថាបើកមហាសន្និបាតនាថ្ងៃទី៤ខែតុលាដើម្បីបង្ហាញនូវសុច្ឆន្ទៈដ៏ខ្លាំងក្លារបស់រាជរដ្ឋាភិបាលក្នុងការកសាងក៏ដូចជាជំរុញចលនាកីឡាជាតិនិងចលនាកីឡាអូឡាំពិកហើយក៏ជាសន្ទរកថាគន្លឹះបង្ហាញជូននូវសក្ដានុពលរបស់រាជរដ្ឋាភិបាលចំពោះនយោបាយកីឡាជាតិជាមួយចលនាអូឡាំពិកអន្ដរជាតិដើម្បីកសាងសង់ ពិភពលោកមួយដ៏ល្អប្រសើរ តាមពាក្យស្លោករបស់អូឡាំពិក “Sports Build Better World” ដែលបានន័យថា កីឡាគឺបានកសាងពិភពលោកមួយឲ្យមានសុខដុមរមនាផងដែរ។
តាមរយៈនេះ កម្ពុជាបានត្រៀមធ្វើការងារជាច្រើន ទាំងការងារកីឡា នយោបាយកីឡា ការទូតកីឡាក៏ដូចជាការ ទាក់ទាញនូវចំណាប់អារម្មណ៍របស់ប្រតិភូនិងភ្ញៀវចូលរួមទាំងអស់។ជាក់ស្ដែងក្រៅពីដំណើរការនូវមហាសន្និបាតខាងលើក៏នឹងមានរៀបចំនូវពិព័រណ៍ទេសចរណ៍និងដំណើរទស្សនកិច្ចទស្សនាទេសចរណ៍ទៅតំបន់អង្គរទៀតផង៕សរន / N
