Views: 2
ប្រែសម្រួលៈបំណង(ស្ត្រេតថែមស៍)៖ កូរ៉េខាងជើងទំនងជាបានបាញ់កាំជ្រួចបណ្តែតជាច្រើនដើមចេញពីឆ្នេរខាងកើតរបស់ខ្លួនកាលពីថ្ងៃពុធទី២២មីនា នេះបើតាមការផ្សាយរបស់ទីភ្នាក់ងារសារព័ត៌មានយ៉ុនហាប់របស់កូរ៉េខាងត្បូង។
គេនៅមិនទាន់ដឹងថាតើកាំជ្រួចប៉ុន្មានដើមត្រូវបានបាញ់ចេញ តែយ៉ុនហាប់បាននិយាយថា ពួកវាអាចជាកាំជ្រួចបណ្តែតយុទ្ធសាស្ត្រចម្ងាយឆ្ងាយ។
កូរ៉េខាងជើងនៅប៉ុន្មានសប្តាហ៍ចុងក្រោយនេះបានបង្កើនការសាកល្បងបាញ់កាំជ្រួច រួមទាំងកាំជ្រួចផ្លោងឆ្លងទ្វីបនិងហាត់វាយប្រហារដោយសព្វាវុធនុយគ្លេអ៊ែរលើគោលដៅដែលសន្មតជារបស់កូរ៉េខាងត្បូងនិងអាម៉េរិក។
ការបាញ់កាំជ្រួចនេះកើតឡើងចំពេលអាម៉េរិកនិងកូរ៉េខាងត្បូងត្រៀមធ្វើសមយុទ្ធបាញ់គ្រាប់ពិតធំបំផុតនៅខែមិថុនា ក្នុងការបង្ហាញកម្លាំងទៅកាន់កូរ៉េខាងជើង។ ក្រសួងការពារជាតិកូរ៉េខាងត្បូងបានបញ្ចេញអោយដឹងកាលពីថ្ងៃពុធថា សមយុទ្ធបាញ់គ្រាប់ពិតនេះជាផ្នែកនៃព្រឹត្តិការណ៍បន្តបន្ទាប់មួយ ដើម្បីកត់សំគាល់ខួបទី៧០នៃសម្ពន្ធភាពកូរ៉េខាងត្បូងនិងអាម៉េរិក។
ក្រសួងបាននិយាយថា «យើងរៀបចំផែនការប្រារព្វខួបដោយផ្តោតលើ«ការបង្កើតសន្តិភាពតាមរយៈកម្លាំង» ផ្អែកលើសមត្ថភាពរារាំងយុទ្ធសាស្ត្រ និងជំហរយោធារួមគ្នាដ៏រឹងមាំរបស់យើង ចំពេលកូរ៉េខាងជើងបង្កើនការគំរាមប្រើនុយគ្លេអ៊ែរនិងកាំជ្រួច»។
តាមពិតកូរ៉េខាងត្បូងអាម៉េរិកបាននិងកំពុងធ្វើសមយុទ្ធយោធារួមគ្នាជាច្រើនប្រភេទនៅប៉ុន្មានសប្តាហ៍មកនេះ រួមមានសមយុទ្ធទ័ពអាកាស និងសមុទ្រ ដែលមានការចូលរួមពីយន្តហោះទម្លាក់គ្រាប់ចម្ងាយឆ្ងាយB-1Bនិងសមយុទ្ធបើកនាវាឡើងគោកទ្រង់ទ្រាយធំបំផុតផងដែរ៕
កូរ៉េខាងជើងតែងបាញ់កាំជ្រួចព្រមានដើម្បីជាប្រតិកម្មចំពោះសមយុទ្ធរួមគ្នារវាងកូរ៉េខាងត្បូងនិងអាម៉េរិក
