Views: 2
ប្រែសម្រួលៈបំណង(ដេល្លីម៉េល)៖ កូរ៉េខាងជើងបានបាញ់សាកល្បងកាំជ្រួចផ្លោងកាលពីថ្ងៃសៅរ៍ទី០១តុលា ដែលជាការបាញ់បង្ហោះលើកទីបួនក្នុងរយៈពេលតែមួយសប្តាហ៍ ដោយបង្កការថ្កោលទោសភ្លាមៗពីគូប្រជែងរបស់ខ្លួន។
ក្នុងការស្តីបន្ទោសខ្លាំងៗមិនធម្មតា ប្រធានាធិបតីកូរ៉េខាងត្បូងលោក យូន ស៊ុកយ៉ូល បាននិយាយថា «ការងប់ងុលរបស់កូរ៉េខាងជើងជាមួយនឹងសព្វាវុធនុយក្លេអ៊ែរ»កាន់តែផុងជ្រៅទៅដែលនាំអោយប្រជាជនខ្លួនឯងរងទុក្ខ ហើយលោកបានព្រមានអំពី«ចម្លើយតបលើសលប់»ចេញពីកូរ៉េខាងត្បូងនិងអាម៉េរិកបើសិនជាកូរ៉េខាងជើងប្រើសព្វាវុធដូច្នេះ។
លោកយូន បាននិយាយថា «កូរ៉េខាងជើងមិនបានបោះបង់ភាពងប់ងុលរបស់ខ្លួនជាមួយនឹងសព្វាវុធនុយក្លេអ៊ែរនិងកាំជ្រួចទេ ទោះជាអន្តរជាតិប្រឆាំងជំទាស់ជាប្រចាំអស់៣០ឆ្នាំមកនេះ។ការអភិវឌ្ឍសព្វាវុធនុយក្លេអ៊ែរនឹងរុញប្រជាជនកូរ៉េខាងជើងអោយធ្លាក់ទៅក្នុងការឈឺចាប់បន្ថែម។បើសិនជាកូរ៉េខាងជើងប៉ុនប៉ងប្រើសព្វាវុធនុយក្លេអ៊ែរវានឹងប្រឈមចម្លើយតបដាច់ណាត់យ៉ាងលើសលប់ពីសម្ពន្ធភាពកូរ៉េខាងត្បូងនិងអាម៉េរិក ព្រមទាំងពីយោធារបស់យើង»។
ប្រធានាធិបតីកូរ៉េខាងត្បូងលោក យូន ស៊ុកយ៉ូល ព្រមានអំពីចម្លើយតបលើសលប់និងដាច់ខាត
សម្តីព្រមាននេះមុខជានឹងធ្វើអោយមេដឹកនាំកូរ៉េខាងជើង គីម ជុងអ៊ុន ក្រោធខឹង ដែលកាលពីខែកក្កដាបានចោទប្រកាន់ថារដ្ឋាភិបាលលោកយូនដឹកនាំដោយ«ក្រុមឆ្កួតនឹងការប្រឈមមុខគ្នា»និង«ពួកបងធំ»។
ការបាញ់កាំជ្រួចបន្តបន្ទាប់នេះត្រូវបានគេមើលឃើញថាជាចម្លើយតបទៅនឹងសមយុទ្ធយោធាកងទ័ពជើងទឹករវាងកូរ៉េខាងត្បូង អាម៉េរិក និងជប៉ុនក្នុងបំណងទប់ទល់នឹងកូរ៉េខាងជើង។
បញ្ជាការឥណ្ឌូប៉ាស៊ីហ្វិករបស់អាម៉េរិកបាននិយាយថា ការបាញ់បង្ហោះទាំងនេះរំលេច«ផលប៉ះពាល់»នៃសព្វាវុធមហាប្រល័យខុសច្បាប់របស់កូរ៉េខាងជើងនិងកម្មវិធីកាំជ្រួចរបស់វា៕
ការបាញ់បង្ហោះនេះបានកើតឡើងក្រោយពីកងកម្លាំងកូរ៉េខាងត្បូងនិងអាម៉េរិករួមទាំងជប៉ុនធ្វើសមយុទ្ធយោធារួមគ្នានៅក្នុងដែនទឹកនៅឯនាយឆ្នេរខាងកើតរបស់កូរ៉េខាងត្បូងដែលមានការចូលរួមពីនាវាដឹកយន្តហោះមួយផង
