Views: 9
ប្រែសម្រួលៈបំណង(ដេល្លីម៉ែល)៖កិច្ចពិភាក្សាជាមួយកូរ៉េខាងជើងមិនគួរជាឆាកសម្តែងនយោបាយឡើយតែជាការចូលរួមចំណែកបង្កើតសន្តិភាពជាដុំកំភួន នេះបើតាមប្រសាសន៍របស់ប្រធានាធិបតីកូរ៉េខាងត្បូងយូន ស៊ុកយ៉ូលកាលពីថ្ងៃពុធទី១៧សីហា នៅពេលតែប៉ុន្មានម៉ោងក្រោយពីកូរ៉េខាងជើងបាញ់កាំជ្រួចបណ្តែតចំនួនពីរដើមចូលក្នុងសមុទ្រ។
ថ្លែងនៅសន្និសីទកាសែតមួយដើម្បីកត់សំគាល់ការចូលកាន់តំណែងបាន១០០ថ្ងៃ លោកយូនមិនបាននិយាយអំពីការបាញ់កាំជ្រួចមុននេះទេ តែលោកយូនបានបញ្ជាក់ជាថ្មីអំពីបំណងផ្តល់ជំនួយសេដ្ឋកិច្ចជាដំណាក់ៗដល់កូរ៉េខាងជើង បើសិនជាអាជ្ញាធរទីក្រុងព្យុងយ៉ាងសុខចិត្តលះបង់ចោលនុយក្លេអ៊ែរនិងថាលោកបានអំពាវនាវអោយមានការចរចាជាមួយកូរ៉េខាងជើង។
លោកថា «ការចរចាណាមួយរវាងមេដឹកនាំកូរ៉េខាងជើងនិងខាងត្បូងឬការចរចារវាងមន្ត្រីថ្នាក់ការងារ មិនគួរជាការសម្តែងនយោបាយតែគួរជាការចូលរួមបង្កើតសន្តិភាពធំដុំនៅលើឧបទ្វីបកូរ៉េនិងនៅអាស៊ីឦសាន»។
ការលើកឡើងនេះទំនងជាចង់រិះគន់ដល់ជំនួបកំពូលរបស់អ្នកដឹកនាំកូរ៉េខាងត្បូងមុនលោក មូន ជែអ៊ីន មេដឹកនាំកូរ៉េខាងជើងគីម ជុងអ៊ុន និងអតីតប្រធានាធិបតីអាម៉េរិកលោក ដូណាល់ ត្រាំ។
កូរ៉េខាងជើងកាលពីថ្ងៃពុធបានបាញ់កាំជ្រួចពីរដើមនៅពេលតែមួយថ្ងៃបន្ទាប់ពីកូរ៉េខាងត្បូងនិងអាម៉េរិកបានចាប់ផ្តើមសមយុទ្ធយោធារួមគ្នាជាមុននៅមុនការហ្វឹកហាត់បាញ់គ្រាប់ពិត ដែលត្រូវបានផ្អាកក្នុងអំឡុងពេលលោកមូនធ្វើជាប្រធានាធិបតី។
លោកយូនបានបញ្ជាក់ថា កូរ៉េខាងត្បូងមិនធានាសន្តិសុខសំរាប់កូរ៉េខាងជើងទេបើរដ្ឋាភិបាលទីក្រុងព្យុងយ៉ាងមិនបោះបង់ចោលសព្វាវុធនុយក្លេអ៊ែរ តែរដ្ឋាភិបាលទីក្រុងសេអ៊ូលក៏មិនចង់អោយមានការផ្លាស់ប្តូរស្ថានភាពជាក់ស្តែងនៅកូរ៉េខាងជើងដោយប្រើកម្លាំងដែរ។
ការសាកល្បងកាំជ្រួចបន្តបន្ទាប់និងការអភិវឌ្ឍនុយក្លេអ៊ែររបស់កូរ៉េខាងជើងបាននាំអោយមានការជជែកពិភាក្សាគ្នាអំពីថាតើកូរ៉េខាងត្បូងគួរស្វះស្វែងរកឬអភិវឌ្ឍសព្វាវុធនុយក្លេអ៊ែរដោយខ្លួនឯងដែរឬទេ។តែលោកយូនកាលពីថ្ងៃ១៧សីហានេះបាននិយាយថាលោកតាំងចិត្តអនុវត្តសន្ធិសញ្ញាមិនរីកសាយសព្វាវុធនុយក្លេអ៊ែរ និងធ្វើការជាមួយសហរដ្ឋអាម៉េរិកដើម្បីបង្កើន«របាំងការពារ»ទល់នឹងការគំរាមពីកូរ៉េខាងជើងអោយកាន់តែធំឡើង៕
ប្រធានាធិបតីកូរ៉េខាងត្បូងធ្វើសន្និសីទកាសែតកត់សំគាល់ការកាន់តំណែង១០០ថ្ងៃរបស់លោក។លោកបានបញ្ជាក់ថាកូរ៉េខាងត្បូងមិនមានផែនការស្វះស្វែងរកសព្វាវុធនុយក្លេអ៊ែរផ្ទាល់ខ្លួនទេនៅក្នុងការប្រឈមមុខទល់នឹងសមត្ថភាពនុយក្លេអ៊ែររបស់កូរ៉េខាងជើង តែនឹងពឹងលើអាម៉េរិកអោយជួយ
