កាលពីអំឡុងចុងឆ្នាំ២០២២កន្លងទៅ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា បានចុះហត្ថលេខានៅលើអនុក្រឹត្យលេខ ២៥៤អនក្រ.តត ចុះថ្ងៃទី០៥ ខែធ្នូ ឆ្នាំ២០២២ សម្រេចកាត់ឆ្វៀលដីទំហំ ៦ហិកតា ០៦អា ១១សង់ទីអា ស្ថិតនៅភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ ចេញពីដែនគម្របព្រៃឈើ ឆ្នាំ២០០២ ធ្វើអនុបយោគជាដីឯកជនរបស់រដ្ឋ និងប្រគល់ជាកម្មសិទ្ធិជូនលោកជំទាវ ថេង អាយអាន្នី និងលោកជំទាវ ម៉ុក ប៉ូប៉ុនរិទ្ធ ខណៈក្នុងខ្លឹមសារនៃអនុក្រឹត្យ បានបញ្ជាក់ថា លោកជំទាវទាំងពីរ គឺជាប្រជាពលរដ្ឋ ។
លោកជំទាវ ថេង អាយអាន្នី គឺជាភរិយារបស់សពសម្ដេចវិបុលបញ្ញា សុខ អាន អតីតឧបនាយករដ្ឋមន្ដ្រី រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រី ដ៏មានឥទ្ធិពល (ជាម្ដាយរបស់ឯកឧត្តម សុខ ពុទ្ធិវុធ រដ្ឋលេខាធិការ នៃក្រសួងប្រៃសណីយ៍ និងទូរគមនាគមន៍ ដែលឯកឧត្តម សុខ ពុទ្ធិវុធ ត្រូវជាស្វាមីរបស់លោកជំទាវ ហ៊ុន ម៉ាលី កូនស្រីរបស់ប្រមុខរាជរដ្ឋាភិបាលកម្ពុជា) និងលោកជំទាវ ម៉ុក ប៉ូប៉ុនរិទ្ធ គឺជាភរិយារបស់ឯកឧត្តម បណ្ឌិត ពេជ សោភ័ន រដ្ឋមន្ដ្រីប្រតិភូអមនាយករដ្ឋមន្ដ្រី និងជារដ្ឋលេខាធិការ នៃក្រសួងការងារ និងបណ្ដុះបណ្ដាលវិជ្ជាជីវៈ (ជាម្ដាយរបស់លោកជំទាវ ពេជ ចន្ទ័មុន្នី ដែលលោកជំទាវ ពេជ ចន្ទ័មុន្នី ត្រូវជាភរិយារបស់ឯកឧត្តម នាយឧត្តមសេនីយ៍ ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការ នៃបញ្ជាការដ្ឋានកងត័ពជើងគោក កូនប្រុសច្បងរបស់ប្រមុខរាជរដ្ឋាភិបាលកម្ពុជា) ពោលគឺ លោកជំទាវទាំងពីរជាដន្លងស្រីរបស់នាយករដ្ឋមន្ដ្រី នៃព្រះរាជាណាចក្រកម្ពុជា ។
មិនទាន់បានដឹងអំពីមូលហេតុពិតប្រាកដ ដែលនាំឲ្យលោកជំទាវទាំងពីរនាក់ជាដន្លងស្រីរបស់នាយករដ្ឋមន្ដ្រី នៃព្រះរាជាណាចក្រកម្ពុជា ទទួលបានដីទំហំជាង៦ហិកតា ស្ថិតនៅស្រុកព្រៃនប់ ខេត្តព្រះសីហនុ ដែលរាជរដ្ឋាភិបាលកម្ពុជា កាត់ឆ្វៀលចេញពីដែនគម្របព្រៃឈើ ឆ្នាំ២០០២ ធ្វើជាកម្មសិទ្ធិនោះនៅឡើយទេ ពីព្រោះមិនអាចទំនាក់ទំនងសាមីខ្លួន និងមន្ដ្រីពាក់ព័ន្ធសុំការបំភ្លឺបញ្ជាក់បាន ៕
