Views: 1
ប្រែសម្រួល : កញ្ញាដាលីស (chinadailyhk) ៖ មេឃគឺជាដែនកំណត់សម្រាប់បណ្តាក្រុមហ៊ុនផលិតរថយន្តខណៈក្រុមហ៊ុនភាគច្រើនកំពុងស្វែងរកទីផ្សារចរាចរណ៍ផ្លូវអាកាសក្នុងទីក្រុងដែលកំពុងរីកចម្រើនយ៉ាងឆាប់រហ័ស ដោយប្រើប្រាស់លំហអាកាសសម្រាប់ការតភ្ជាប់ចម្ងាយខ្លីនិងមធ្យម ជាពិសេសពីលើនិងរវាងទីក្រុងធំៗ។
កាលពីសប្តាហ៍មុន ក្រុមហ៊ុន Volkswagen Group China បានបង្ហាញគំរូឡានហោះនិងចុះចតបញ្ឈរត្រង់ដើរដោយថាមពលអគ្គិសនីដំបូងរបស់ខ្លួន ឬហៅថាឡានហោះដូចដែលគេនិយមហៅជាទូទៅ។
ក្រុមហ៊ុនបាននិយាយថា ម៉ូដែលនេះ ដែលផ្អែកលើដំណោះស្រាយការបើកបរស្វ័យប្រវត្តិបច្ចុប្បន្ននិងបច្ចេកវិជ្ជាអាគុយគឺជាផ្នែកមួយនៃយុទ្ធសាស្ត្ររបស់ខ្លួនក្នុងការស្វែងរកនិងបង្កើតអ្វីដែលថ្មីនៅក្នុងឡានហោះជាលក្ខណៈបុគ្គលដើរដោយថាមពលអគ្គិសនីទាំងស្រុងនិងមាននិរន្តរភាព។
ម៉ូដែលនេះមានការរចនាស្លាបរាងអក្សរ X ដែលមានបណ្តោយប្រវែង ១១,២ ម៉ែត្រ និងទទឹង ១០,៦ ម៉ែត្រ ដំណើរការដោយស្លាបចក្រ ៨ សម្រាប់ការហោះបញ្ឈរត្រង់ និង ស្លាបរុញល្បឿនចំនួន ២សម្រាប់ការហោះហើរផ្ដេក។
ក្រុមហ៊ុន Volkswagen Group China បាននិយាយថា ខ្លួននឹងធ្វើការសាកល្បងហោះហើរជាច្រើនលើកនៅចុងឆ្នាំនេះ ដើម្បីបង្កើនប្រសិទ្ធភាពរបស់ឡានហោះគំរូនេះ។ឡានគំរូដែលល្អប្រសើរនឹងត្រូវឆ្លងកាត់ការហោះហើរសាកល្បងកម្រិតខ្ពស់បន្ថែមទៀតនៅចុងរដូវក្តៅឆ្នាំ ២០២៣។
ក្រុមហ៊ុនបាននិយាយថា នាពេលអនាគត ឡានហោះអគ្គិសនីនិងស្វ័យប្រវត្តិពេញលេញរបស់ខ្លួនអាចផ្ទុកអ្នកដំណើរ ៤ នាក់ បូករួមទាំងអីវ៉ាន់បានចម្ងាយរហូតដល់ ២០០ គីឡូម៉ែត្រ។
ក្រុមហ៊ុននិយាយថា នៅក្នុងប្រទេសចិន ឡាននេះគ្រោងនឹងដើរតួនាទីយ៉ាងសំខាន់ក្នុងអនាគតនៃការដឹកជញ្ជូនតាមទីក្រុង និងឆ្លងទីក្រុងធំៗ ដែលមានការកកស្ទះខ្លាំង៕
ឡានហោះរបស់ក្រុមហ៊ុន Volkswagen Group China នឹងធ្វើការសាកល្បងហោះហើរជាច្រើនលើកនៅចុងឆ្នាំនេះ
