Views: 10
ដោយ៖ សុវណ្ណកុម្ភៈ/ភ្នំពេញ៖ កីឡាករពិការភាព យ៉ុន មួយ បានចំណាយពេលស្ទើរតែ៥ឆ្នាំក្នុងការលេងកីឡាតែទីបំផុតគេសម្រេចនូវមហិច្ឆតាររប់ខ្លួនដោយដណ្ដើមបានមេដាយប្រាក់១គ្រឿង និងសំរិទ្ធ១គ្រឿង ពីព្រឹត្តិការណ៍អាស៊ានប៉ារ៉ាហ្គេមលើកទី១១ នៅទីក្រុងសូឡូប្រទេស
ឥណ្ឌូនេស៊ីដែលទើបតែបញ្ចប់ទៅនាពេលថ្មីៗនេះ ។
កីឡាករ យ៉ុន មួយ ទទួលបានមេដាយ ២គ្រឿង លើប្រភេទកីឡាហែលទឹក ក្នុងនោះមេដាយប្រាក់ លើវិញ្ញាសាហែលសេរី ចម្ងាយ ២០០ម៉ែត្រ ប្រភេទ SM8 និងមេដាយសំរឹទ្ធ វិញ្ញាសាហែលមេអំបៅ ចម្ងាយ ៥០ម៉ែត្រ ប្រភេទ S8។
អតីតកាលរបស់គេគឺលេងកីឡាអត្តពលកម្មតែគេប្ដូរមកលេងកីឡាហែលទឹកនៅក្នុងឆ្នាំ២០១៨ និងបានប៉ុនប៉ងច្រើនលើកច្រើនសារ ក្នុងការចូលរួមប្រកួតកីឡាអាស៊ានប៉ារ៉ាហ្គេម តែខកខានដោយសារវិបត្តិជំងឺកូវីដ-១៩។
កីឡាករយ៉ុនមួយបាននិយាយថារូបគេពិតជាមានមោទនភាព ដោយសារតែការប្រកួតនេះ ជាការប្រកួតលើកដំបូងរបស់គេ អាចទទួលបានរហូតទៅដល់មេដាយ ២គ្រឿង។ រូបគេធ្លាប់តែចូលរួមព្រឹត្តិការណ៍យុវជន ប៉ុន្តែនៅឆ្នាំ២០២២នេះ គឺថ្មីសម្រាប់គេក្នុងការបង្កើតនូវប្រវត្តិសាស្ត្រសម្រាប់ខ្លួនឯងនៅក្នុងការចូលរួមព្រឹត្តិការណ៍អាស៊ានប៉ារ៉ាហ្គេម។
កត្តាដែលនាំឲ្យ យ៉ុន មួយ មានការប្តេជ្ញាចិត្តរហូតដល់ឈ្នះមេដាយនេះ សំខាន់ជាងគេទី១ គឺក្រុមគ្រួសារ ដែលតែងតែលើកទឹកចិត្ត, ទី២ គឺថ្នាក់ដឹកនាំ, ទី៣ សហព័ន្ធខ្មែរកីឡាហែលទឹក តែងតែផ្ដល់គ្រូជម្រើសជាតិដែលមានបច្ចេកទេស និងបទពិសោធន៍ច្រើនឆ្នាំ និងទី៤ គឺមិត្តភ័ក្តិ ដែលតែងតែផ្ដល់កម្លាំងចិត្តដល់រូបខ្លួន។
សម្រាប់អាស៊ានហ្គេមឆ្នាំ២០២៣យ៉ុនមួយបានតាំងចិត្តរួចហើយហើយនឹងខំប្រឹងហ្វឹកហាត់បន្ថែមទៀតដើម្បីគ្រងមេដាយច្រើនជាងការទៅប្រកួតនៅឥណ្ឌូនេស៊ី។នៅឆ្នាំ២០២៣នេះ គេប្ដេជ្ញាថាអាច នឹងយកមេដាយមាសឲ្យបាន។
កីឡាកររូបនេះកើតនៅថ្ងៃទី០៧ ខែកុម្ភៈ ឆ្នាំ១៩៩៣ នៅភូមិពន្លៃ ឃុំកក់ ស្រុកពញាក្រែក ខេត្តត្បូងឃ្មុំ។ កីឡាកររូបនេះចាប់ផ្ដើមដំបូងឡើយ ជាកីឡាករអត្តពលកម្ម រយៈពេល៤ឆ្នាំ (២០១២-២០១៦) លុះចូលដល់ឆ្នាំ២០១៨ រូបគេបានចូលរួមលេងលើប្រភេទកីឡាហែលទឹក។ហ្វឹកហាត់បាន ៦ខែ ក៏បានចេញទៅប្រកួតជើងឯកយុវជន (Youth Para Sports Camp) នៅប្រទេសកូរ៉េខាងត្បូង ដោយទទួលបានមេដាយមាស។ ចូលដល់ឆ្នាំ២០១៩ ក៏បានជាប់ជម្រើសជាតិឈុតធំ និងទើបតែបានចេញទៅប្រកួតអាស៊ានប៉ារ៉ាហ្គេម លើកដំបូងឆ្នាំ២០២២នេះ៕
