Views: 4
ដោយៈ សុវណ្ណកុម្ភៈ / ភ្នំពេញៈ គ្រូបង្វឹកតេក្វាន់ដូ WT (World Taekwondo) លោក Choi Yong Sok បានដាក់ក្ដីសង្ឃឹមថា ស៊ីហ្គេមលើកទី៤២ ដែលនឹងដំណើរការ ពីថ្ងៃទី៥ ដល់ ១៧ ខែឧសភា ឆ្នាំ២០២៣ កម្ពុជាមានក្ដីសង្ឃឹមខ្ពស់ ក្នុងការដណ្ដើមមេដាយបានច្រើន។
ក្រុមតេក្វាន់ដូ ដែលកំពុងបោះជម្រំហ្វឹកហាត់ សព្វថ្ងៃ មានចំនួន ៣៦ នាក់ ក្នុងនោះ កីឡាករ កីឡាការិនី ត្រៀមស៊ីហ្គេម ចំនួន ២៨ នាក់ គឺ ១៦ នាក់ លេងវិញ្ញាសាប្រយុទ្ធ និង ១២ នាក់ត្រៀមវិញ្ញាសាសម្ដែង។
គ្រូបង្វឹកជនជាតិកូរ៉េខាងត្បូង រូបនេះ បានធ្វើការប្រៀបធៀបថាៈ ពួកគេត្រៀមខ្លួនបានល្អ ជាងលើកមុនៗ ព្រោះកម្ពុជា ពេលនេះជាម្ចាស់ផ្ទះ ហេតុនេះ ម្នាក់ៗសុទ្ធតែបង្កើនការហ្វឹកហាត់ ដើម្បីរកមេដាយឲ្យបានច្រើន សក្តិសមជាម្ចាស់ផ្ទះ នៃព្រឹត្តិការណ៍តំបន់នេះ។
នាខែមីនា ខាងមុខនេះ នឹងបញ្ជូនកីឡាករ កីឡាការិនី ទៅបង្កើនបច្ចេកទេស នៅសាធារណរដ្ឋកូរ៉េ ហើយនៅដើមខែមីនា កម្ពុជា នឹងចូលរួមប្រកួតជើងឯកអាស៊ីអាគ្នេយ៍ ដើម្បីប្រជែងមេដាយផង និងធ្វើតេស្តសមត្ថភាពផង។
លោក Choi Yong Sok ធ្វើការកត់សម្គាល់ថាៈ ការហាត់នៅក្នុងស្រុកនិងនៅកូរ៉េ ខាងត្បូង ស្ថានភាពខុសគ្នា ព្រោះក្នុងស្រុក ហាត់ប្រហាក់ប្រហែលគ្នា តែហាត់នៅកូរ៉េ ផ្ដោតលើកម្លាំង និងបច្ចេកទេស ពិសេសមានការប្រកួត សាកល្បងបច្ចេកទេស ជាមួយកីឡាករ កីឡាការិនីខ្លាំងៗ របស់កូរ៉េ ដែលជាម្ចាស់ក្បាច់គុននេះ។
សូមបញ្ជាក់ថា កាលស៊ីហ្គេមលើកទី៣១ នៅវៀតណាម តេក្វាន់ដូ WT ដណ្ដើមបាន មេដាយ ៥ គ្រឿង គឺមេដាយមាស ១គ្រឿង រកបានដោយកីឡាករ វ៉ា មិថុនា លើវិញ្ញាសា បុរស Kyorugi ទម្ងន់ ៧៤ គីឡូក្រាម មេដាយប្រាក់ បានដោយកីឡាករ សំ យូដេត វិញ្ញាសាប្រយុទ្ធទម្ងន់ ៥៨ គីឡូក្រាម និងសំរិទ្ធ ៣ គ្រឿង រកបានដោយកីឡាករ ឈុន
សុខឡុង កីឡាការិនី ឈឿង អាលីហ្សា និងកីឡាការិនី ថិប កាសាន់ទ្រេនីកូល៕/V-PC
