Views: 4
ប្រែសម្រួល : កញ្ញាដាលីស (ដេល្លីម៉េល) ៖ ប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គី បានព្រមានកាលពីថ្ងៃចន្ទទី៦មិថុនាថា កងទ័ពរបស់លោកចាញ់ប្រៀបលើសលប់ទល់នឹងភាគីរុស្ស៊ី”ដែលខ្លាំងជាង” ខណៈកងកម្លាំងរបស់ប្រទេសទាំងពីរកំពុងប្រយុទ្ធគ្នាដើម្បីគ្រប់គ្រងទីក្រុងស៊ីវីរ៉ូដូណិតស៍នៅភាគខាងកើត។
លោកហ្សេលេនស្គីបានប្រាប់អ្នកកាសែតក្នុងទីក្រុងគៀវ គឺតែមួយថ្ងៃបន្ទាប់ពីដំណើរដ៏ក្លាហានទៅកាន់ទីតាំងសរភូមិជួរមុខនៅទីក្រុងលីស៊ីចាន់ស៍ (Lysychansk)ដែលស្ថិតនៅត្រើយម្ខាងនៃទន្លេស៊ីវើស្គីដូណិតស៍ (Siverskyi Donets) ពីទីក្រុងស៊ីវីរ៉ូដូណិតស៍ យ៉ាងដូច្នេះថា “យើងកំពុងទប់ទល់” នៅក្នុងទីក្រុងសំខាន់នេះ ប៉ុន្តែ “ពួកគេមានគ្នាច្រើន ហើយពួកគេខ្លាំងជាងយើង”។
លោកហ្សេលេនស្គីបានធ្វើដំណើរដ៏ក្លាហានទៅកាន់ទីតាំងសរភូមិជួរមុខនៅទីក្រុងលីស៊ីចាន់ស៍
ទន្ទឹមនឹងនោះ ទីក្រុងមូស្គូបានរិះគន់បណ្តាប្រទេសអឺរ៉ុបដែលបដិសេធសិទ្ធិហោះហើរឆ្លងកាត់នៃយន្តហោះរបស់រដ្ឋមន្ត្រីការបរទេសរុស្ស៊ីលោក សឺហ្គេ ឡាវរ៉ូវ។
រុស្ស៊ីបានពង្រីកបញ្ជីឈ្មោះមន្ត្រីអាម៉េរិកដែលត្រូវបានហាមឃាត់មិនឱ្យចូលប្រទេស ខណៈក្រុងវ៉ាស៊ីនតោនបានចេញបញ្ជារឹបអូសយន្តហោះពីរគ្រឿងដែលជាកម្មសិទ្ធិរបស់មហាសេដ្ឋី រ៉ូម៉ាន់ អាប្រាម៉ូវិច ដោយបង្កើនការខូចខាតច្រើនថែមទៀតសម្រាប់អ្នកជំនួញនៅក្នុងរង្វង់ដឹកនាំរបស់ប្រធានាធិបតីរុស្ស៊ីលោក វ្ល៉ាឌីមៀ ពូទីន។
លោកហ្សេលេនស្គីរួមជាមួយនឹងរដ្ឋមន្ត្រីការបរទេសអាម៉េរិកលោក អានថូនី ប្លីងកិន ក៏បានព្រមានកាលពីថ្ងៃចន្ទផងដែរអំពីការរឹតបន្តឹងការផ្គត់ផ្គង់គ្រាប់ធញ្ញជាតិនៅលើទីផ្សារពិភពលោកដោយសារតែអ្វីដែលលោកប្លីងកិននិយាយថាជាយុទ្ធសាស្ត្ររបស់រុស្ស៊ីក្នុង “ការសម្លុតកំហែង”។
លោកប្លីងកិននិយាយថា “មានស្រូវសាលីប្រហែល ២០ លានតោនជាប់នៅក្នុងឃ្លាំងនៅជិតកំពង់ផែអូដេសសា (Odessa) និងនៅក្នុងកប៉ាល់ពោរពេញទៅដោយគ្រាប់ធញ្ញជាតិដែលបានជាប់គាំងនៅក្នុងកំពង់ផែអូដេសសា ដោយសារតែការបិទផ្លូវរបស់រុស្ស៊ី”៕
ការវាយប្រហារបានផ្តោតលើតំបន់ភាគខាងកើតអ៊ុយក្រែនចាប់តាំងពីខែមេសា