Views: 7
ប្រែសម្រួល : កញ្ញាដាលីស (ដេល្លីម៉េល) ៖ រុស្សីបានវាយប្រហារទីក្រុងកំណើតរបស់ប្រធានាធិបតីអ៊ុយក្រែននិងគោលដៅផ្សេងទៀតដោយដ្រូនអត្តឃាតកាលពីថ្ងៃអាទិត្យទី២តុលាហើយអ៊ុយក្រែនបានវាយដណ្តើមយកមកវិញនូវការគ្រប់គ្រងទាំងស្រុងលើទីក្រុងយុទ្ធសាស្ត្រភាគខាងកើតគឺ លីម៉ាន់ (Lyman) ក្នុងខេត្តដូណិតសខ៍ និងទីប្រជុំជនពីរទៀតនៅខេត្តឃើសុន (Kherson) ភាគខាងត្បូងគឺអាខាន់ហែលស្កេ (Arkhanhelske) និង មីរ៉ូលីយូប៊ីវកា (Myrolyubivka) នៅក្នុងការវាយលុក ដែលបានកែប្រែរបត់សង្គ្រាមឡើងវិញ។
ការដែលរុស្ស៊ីបាត់បង់ទីក្រុងលីម៉ាន់ភាគខាងកើត ដែលខ្លួនប្រើប្រាស់ជាមជ្ឈមណ្ឌលដឹកជញ្ជូននិងភស្តុភារ គឺជាការវាយសំពងថ្មីមួយសម្រាប់វិមានក្រឹមឡាំងខណៈខ្លួនកំពុងព្យាយាមបង្កើនសង្គ្រាមដោយការកាត់យកតំបន់ចំនួនបួនរបស់អ៊ុយក្រែនដោយខុសច្បាប់ និងគំរាមកំហែងកាន់តែខ្លាំងឡើងក្នុងការប្រើប្រាស់អាវុធនុយក្លេអ៊ែរ។
ការដណ្តើមយកដីរបស់ប្រធានាធិបតីរុស្ស៊ី វ្ល៉ាឌីមៀ ពូទីន បានគំរាមរុញជម្លោះដល់កម្រិតថ្មីដ៏គ្រោះថ្នាក់។ វាក៏បានជំរុញឱ្យអ៊ុយក្រែនដាក់ពាក្យជាផ្លូវការសម្រាប់សមាជិកភាពណាតូដែលជាកិច្ចប្រឹងប្រែងមួយទទួលបានការគាំទ្រពីសមាជិកណាតូនៅអឺរ៉ុបកណ្តាលនិងខាងកើតចំនួនប្រាំបួន ដែលភ័យខ្លាចថា ការឈ្លានពានរបស់រុស្ស៊ីនៅទីបំផុតអាចកំណត់គោលដៅលើពួកគេផងដែរ។
ប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គី បានប្រកាសកាលពីថ្ងៃអាទិត្យថា កងកម្លាំងរបស់គាត់ឥឡូវនេះបានគ្រប់គ្រងទីក្រុងលីម៉ាន់ទាំងស្រុង។ លោកបាននិយាយក្នុងសុន្ទរកថាវីដេអូមួយថា “គិតត្រឹមម៉ោង ១២៖៣០ នាទីយប់ ទីក្រុងលីម៉ាន់ត្រូវបានដណ្តើមមកវិញទាំងស្រុង។ សូមអរគុណដល់កងទ័ពរបស់យើងនិងអ្នកចម្បាំងរបស់យើង”។
យោធារុស្ស៊ីមិនបានធ្វើអត្ថាធិប្បាយអំពីទីក្រុងលីម៉ាន់ទេ បន្ទាប់ពីបានប្រកាសកាលពីថ្ងៃសៅរ៍ថា ខ្លួនកំពុងដកកងកម្លាំងរបស់ខ្លួននៅទីនោះទៅកាន់អ្វីដែលខ្លួននិយាយថាជាទីតាំងអំណោយផលជាងនេះ។
យោធាអង់គ្លេសបានពណ៌នាអំពីការដណ្តើមយកទីក្រុងលីម៉ាន់មកវិញថាជា “បរាជ័យនយោបាយដ៏សំខាន់” សម្រាប់រដ្ឋាភិបាលក្រុងមូស្គូ ហើយអ៊ុយក្រែនហាក់យកឈ្នះក្នុងសង្គ្រាមយ៉ាងឆាប់រហ័ស។
ប៉ុន្មានម៉ោងបន្ទាប់ពីការប្រកាសរបស់លោកហ្សេលេនស្គីប្រព័ន្ធផ្សព្វផ្សាយអ៊ុយក្រែនបានចែករំលែករូបភាពនៃកងទ័ពអ៊ុយក្រែនកាន់ទង់ជាតិពណ៌លឿងនិងខៀវរបស់ប្រទេសនៅពីមុខរូបសំណាកដែលសម្គាល់ភូមិថ័រស្កេ (Torske) ស្ថិតនៅចម្ងាយ ១៥ គីឡូម៉ែត្រពីភាគខាងកើតទីក្រុងលីម៉ាន់ និងនៅទល់មុខនឹងតំបន់លូហានសខ៍ (Luhansk) ដែលកាន់កាប់ដោយរុស្ស៊ី។
បន្តិចក្រោយមក វីដេអូដែលបានបង្ហោះតាមអ៊ីនធឺណិត បានបង្ហាញទាហានអ៊ុយក្រែនម្នាក់និយាយថា កងកម្លាំងរបស់រដ្ឋាភិបាលក្រុងគៀវបានចាប់ផ្តើមកំណត់គោលដៅលើទីក្រុងក្រេមីនណា (Kreminna) ឆ្លងបន្តិចនៅក្នុងព្រំដែនខេត្តលូហានស៍។ ការបាញ់កាំភ្លើងធំអាចត្រូវបានស្តាប់ឮនៅក្នុងវីដេអូ។ អ្នកឆ្លើយឆ្លងព័ត៌មានយោធារុស្ស៊ីក៏បានទទួលស្គាល់ការវាយប្រហាររបស់អ៊ុយក្រែនគឺផ្តោតគោលដៅលើទីក្រុងក្រេមីនណាផងដែរ៕
ទាហានអ៊ុយក្រែនកំពុងសម្អាតកាំភ្លើងធំ D-30 នៅតំបន់ដូណិតសខ៍
ទាហានអ៊ុយក្រែនពិនិត្យយានយន្តនិងរថក្រោះរុស្ស៊ីខូចខាតនៅជាយក្រុងអ៊ីហ្ស៊ីយូម កាលពីថ្ងៃ១តុលាក្រោយទាហានរុស្ស៊ីដកថយ
