Views: 1
ដោយ: មុនីរ័ត្ន / ភ្នំពេញ: លោក ញឹក ប៊ុនឆៃ ប្រធានគណបក្សខ្មែររួបរួមជាតិ បានអញ្ជើញជាអធិបតីក្នុងពិធីសំណេះសំណាលទទួលស្វាគមន៍ ថ្នាក់ដឹកនាំខេត្តមកពីគណបក្សខ្មែរស្រឡាញ់ជាតិ និងគណបក្សអំណាចខ្មែរ ទូទាំងខេត្តតាកែវ មកចូលរួមជីវភាពនយោបាយជាមួយគណបក្សខ្មែររួបរួមជាតិនៅទីស្នាក់ការខេត្តតាកែវ កាលព្រឹកថ្ងៃទី១៧ ខែសីហា ឆ្នាំ២០២២។
លោក ញឹក ប៊ុនឆៃ បានប្រាប់រស្មីកម្ពុជា ឱ្យដឹងថា ថ្នាក់ដឹកនាំគណបក្សខ្មែរស្រឡាញ់ជាតិ មកចូលរួមជាមួយគណបក្សខ្មែររួបរួមជាតិ មានដូចជា សមាជិកគណៈកម្មាធិការនាយក និងជាប្រធានគណបក្សខេត្តសៀមរាប ខេត្តបាត់ដំបង ខេត្តបន្ទាយមានជ័យ ខេត្តកំពង់ឆ្នាំង និង អនុប្រធានគណបក្ស ខេត្តព្រះសីហនុ, ប្រធានបក្សក្រុងសិរីសោភ័ណ, ប្រធានបក្សស្រុកអូរជ្រៅ រួមទាំង សមាជិកអចិន្ត្រៃយ៍ ខេត្តកំពង់ធំ ខេត្តកំពង់ចាម ខេត្តបន្ទាយមានជ័យ ខេត្តសៀមរាប និង ខេត្តកំពង់ឆ្នាំង រួមទាំង មន្ត្រីជាន់ខ្ពស់ មួយចំនួនទៀត។
សូមជម្រាបថា ថ្នាក់ដឹកនាំគណបក្សខ្មែរស្រឡាញ់ជាតិ និងគណបក្សនយោបាយផ្សេងទៀតបានមកចូលរួមជាមួយគណបក្សខ្មែររួបរួមជាតិ ជាបន្តបន្ទប់ដូចជា នៅខេត្តសៀមរាប ឧត្តរមានជ័យ បន្ទាយមានជ័យ បាត់ដំបង កំពង់ធំ កំពង់ឆ្នាំង កណ្តាល តាកែវ រាជធានីភ្នំពេញ និងបណ្តាខេត្តមួយចំនួនទៀត បន្ទាប់ពីប្រធាន អនុប្រធាន រួមទាំងសមាជិកគណៈកម្មាធិការអចិន្ត្រៃយ៍ សរុប ៩រូប របស់គណបក្សខ្មែរស្រឡាញ់ជាតិ បានប្រកាសរំលាយគណបក្សរបស់ខ្លួន ចាប់ពីថ្ងៃទី២៩ ខែកក្កដា ឆ្នាំ២០២២៕