Views: 8
ប្រែសម្រួល : កញ្ញាដាលីស (ដេល្លីម៉េល) ៖ សេតវិមានបាននិយាយថា ប្រធានាធិបតីអាម៉េរិក ចូ បៃដិន បានអំពាវនាវឱ្យសភាអនុម័តការហាមឃាត់អាវុធវាយប្រហារបន្ទាប់ពីមនុស្សប្រាំមួយនាក់រួមទាំងកុមារបីនាក់ត្រូវបានសម្លាប់នៅក្នុងការបាញ់ប្រហារនៅសាលារៀននៅក្នុងទីក្រុងណាសវីល (Nashville) រដ្ឋថិនណេស៊ី (Tennessee) កាលពីថ្ងៃចន្ទទី២៧មីនា។ លោកបៃដិនបាននិយាយនៅឯសេតវិមានថា “យើងត្រូវធ្វើបន្ថែមទៀតដើម្បីបញ្ឈប់អំពើហិង្សាដោយកាំភ្លើង។ ខ្ញុំអំពាវនាវម្តងទៀតឱ្យសភាអនុម័តការហាមឃាត់អាវុធវាយប្រហាររបស់ខ្ញុំ”។
ប៉ូលិសបាននិយាយថា ខ្មាន់កាំភ្លើងនៅក្រុងណាសវីលអាយុ ២៨ ឆ្នាំដែលប៉ូលិសបាញ់ស្លាប់នៅកន្លែងកើតហេតុ មានកាំភ្លើងពាក់កណ្តាលស្វ័យប្រវត្តិចំនួនពីរដើមនិងកាំភ្លើងខ្លីមួយដើម។ ក្រោយមកប៉ូលិសបាននិយាយថា ខ្មាន់កាំភ្លើងមានកាំភ្លើងពាក់កណ្តាលស្វ័យប្រវត្តិមួយដើម និងកាំភ្លើងខ្លីពីរដើម។
លោកបៃដិន មកពីបក្សប្រជាធិបតេយ្យ បានអំពាវនាវម្តងហើយម្តងទៀតឱ្យមានការហាមឃាត់អាវុធវាយប្រហារជាថ្មី និងច្បាប់តឹងរ៉ឹងលើការលក់កាំភ្លើង ជាវិធានការដែលចាំបាច់ត្រូវអនុម័តនៅសភា។
សភាតំណាងត្រូវបានគ្រប់គ្រងដោយបក្សសាធារណរដ្ឋ ហើយសមាជិកសភាសំខាន់ៗបាននិយាយថា ច្បាប់សុវត្ថិភាពកាំភ្លើងថ្មីទំនងជាមិនចេញនៅឆ្នាំនេះទេ។
អ្នកនាំពាក្យសេតវិមាននាង ការីន ហ្សង់ព្យែរ (Karine Jean-Pierre) បានប្រាប់អ្នកសារព័ត៌មាន មុនពេលលោកបៃដិនថ្លែង យ៉ាងដូច្នេះថា “តើមានកុមារប៉ុន្មាននាក់ទៀតត្រូវគេសម្លាប់ មុនពេលដែលគណបក្សសាធារណរដ្ឋនៅក្នុងសភាចេញមុខធ្វើសកម្មភាពដើម្បីអនុម័តការហាមឃាត់អាវុធវាយប្រហារ ដើម្បីបិទចន្លោះប្រហោងនៅក្នុងប្រព័ន្ធត្រួតពិនិត្យប្រវត្តិរូបរបស់យើង ឬទាមទារឱ្យមានការរក្សាទុកកាំភ្លើងដោយសុវត្ថិភាព?”៕
លោកបៃដិនអំពាវនាវឱ្យហាមឃាត់អាវុធវាយប្រហារ
