Views: 4
ប្រែសម្រួលៈបំណង(ប៊ីប៊ីស៊ី)៖ សភាឥណ្ឌាបានដកសិទ្ធិកាន់កាប់អាសនៈសភាសំរាប់មេដឹកនាំប្រឆាំងជាន់ខ្ពស់លោកលោក រ៉ាហ៊ុល គន្ធីរ(Rahul Gandhi)នៅមួយថ្ងៃក្រោយលោកត្រូវបានតុលាការកាត់ទោសដាក់គុកពីរឆ្នាំចំពោះការនិយាយបង្ខូចឈ្មោះអ្នកដទៃក្នុងអំឡុងពេលឃោសនាបោះឆ្នោតកាលពីឆ្នាំ២០១៩។
សេចក្តីជូនដំណឹងមួយរបស់សភាបាននិយាយថា លោកគន្ធីរលែងមានសិទ្ធិកាន់កាប់អាសនៈសភាជាន់ទាបតទៅទៀត។
លោកគន្ធីរ ជាសមាជិកសភាមកពីគណបក្សខុនក្រេស(Congress)ប្រចាំមណ្ឌលមួយក្នុងរដ្ឋកេរ៉ាឡា។លោកត្រូវបានតុលាការដាក់ទោសចំពោះការលើកឡើងបែបបញ្ឆិតបញ្ឆៀងវាយប្រហារទៅកាន់បេក្ខជនប្រជែងណារ៉េនដ្រា ម៉ូឌីក្នុងពេលជួបជុំឃោសនាបោះឆ្នោតឆ្នាំ២០១៩ថា «ហេតុអ្វីបានជាពួកចោរអស់នេះមានត្រកូល ម៉ូឌី ដូចជា នីរ៉ាវ ម៉ូឌី,ឡាលីត ម៉ូឌី,ណារ៉េនដ្រា ម៉ូឌី»។
នីរ៉ាវ ម៉ូឌី(Nirav Modi)ជាសេដ្ឋីត្បូងពេជ្រឥណ្ឌាដែលរត់គេចខ្លួនម្នាក់ ហើយឡាលីត ម៉ូឌី(Lalit Modi)ជាអតីតប្រធានក្រុមកីឡាIndian Premier Leagueដែលត្រូវហាមឃាត់អស់មួយជីវិតពីគណៈកម្មាធិការកីឡាគ្រីឃីតឥណ្ឌា ចំណែកណារ៉េនដ្រា ម៉ូឌី ជានាយករដ្ឋមន្ត្រីឥណ្ឌាបច្ចុប្បន្ន។
ការបោះឆ្នោតត្រូវធ្វើនៅឆ្នាំក្រោយ ដូច្នេះទោសជាប់គុកពីរឆ្នាំមានន័យថា គន្ធីរនឹងមិនអាចចូលរួមការបោះឆ្នោតសកលនៅឆ្នាំ២០២៤បានទេ។ទោះជាយ៉ាងណាលោកគន្ធីរ អាចនៅក្រៅឃុំបាន៣០ថ្ងៃនិងអាចប្តឹងឧទ្ធរណ៍ប្រឆាំងការសំរេចនេះ។
អ្នកនាំពាក្យរបស់គណបក្សខុនក្រេស បាននិយាយថា ការសំរេចក្តីនេះពោរពេញដោយ«ការសន្និដ្ឋានដែលមិនអាចទទួលយកបានតាមផ្លូវច្បាប់»និងថាពួកអ្នកនយោបាយរបស់ខ្លួននឹងមិននៅស្ងៀមទេ។ប្រធានគណបក្សខុនក្រេស លោកម៉ាលីកាជូន ខាហ្គេ(Mallikarjun Kharge)បានចោទប្រកាន់ថាចំណាត់ការប្រឆាំងលោកគន្លឺរជាផលមកពីលោកទាមទារអោយមានការស៊ើបអង្កេតពីគណៈកម្មាធិការសភារួមមួយលើការចោទប្រកាន់ប្រឆាំងក្រុមហ៊ុនធំមួយ។
លោកថា«ពួកគេមិនចង់ទុកនរណាដែលនិយាយការពិតទេ។តែយើងនឹងបន្តនិយាយការពិត»។
កាលពីថ្ងៃសុក្រ គណបក្សខុនក្រេស ដឹកនាំដោយមេដឹកនាំបក្សសំខាន់ៗបានធ្វើការដង្ហែក្បួនតវ៉ាមួយនៅទីក្រុងញូវដេល្លី ក្រោមការឃ្លាំមើលពីសន្តិសុខយ៉ាងក្រាស់ក្រែល។អ្នកយកព័ត៌មានប្រចាំទូរទស្សន៍បាននិយាយថា សមាជិកសភាប្រឆាំងមួយចំនួនត្រូវបានឃាត់ខ្លួន ដោយសារបំពានបំរាមបាតុកម្ម។
គណបក្សខុនក្រេស និយាយថា ខ្លួនមានផែនការធ្វើការតវ៉ាប្រឆាំងជាច្រើននៅនៅប៉ុន្មានថ្ងៃខាងមុខ៕
ប្រធានគណបក្សខុនក្រេស លោកម៉ាលីកាជូន ខាហ្គេ(កណ្តាល) ជាមួយសមាជិកសភាបក្សខុនក្រេសដទៃទៀត ធ្វើការដើរបង្ហែតវ៉ានៅក្រុងញូវ ដេល្លីកាលពីថ្ងៃសុក្រ
គន្ធីរនឹងមិនត្រូវអនុញ្ញាតអោយចូលរួមការបោះឆ្នោតនៅឆ្នាំក្រោយទេ ទាល់តែទោសរបស់លោកត្រូវព្យួរឬត្រូវលើកលែងចោល