Views: 1
ប្រែសម្រួល : កញ្ញាដាលីស (ស្ពុតនិក) ៖ អនុប្រធានក្រុមប្រឹក្សាសន្តិសុខនៃសហព័ន្ធរុស្ស៊ី លោក ឌីមីទ្រី មេតវេដេវ (Dmitry Medvedev)បាននិយាយនៅក្នុងបទសម្ភាសន៍ជាមួយប្រព័ន្ធផ្សព្វផ្សាយរុស្ស៊ីឈានមុខគេ រួមទាំង Sputnik ផងដែរថា សម្ពន្ធភាពសន្ធិសញ្ញាអាត្លង់ទិកខាងជើង (ណាតូ) បានជាប់ពាក់ព័ន្ធដោយផ្ទាល់នៅក្នុងវិបត្តិអ៊ុយក្រែន។
លោកបាននិយាយថា “ខ្ញុំនឹងនិយាយតែរឿងមួយប៉ុណ្ណោះ ជាអ្វីដែលឃើញជាក់ស្តែងរួចហើយ គឺ សហព័ន្ធរុស្ស៊ីមិនមែនធ្វើសង្គ្រាមជាមួយអ៊ុយក្រែន មិនមែនធ្វើសង្គ្រាមជាមួយរបបពាក់កណ្តាលណាស៊ីឬរបបណាស៊ីនៅអ៊ុយក្រែនទេ ប្រទេសរបស់យើងកំពុងមានសង្គ្រាមជាមួយកងទ័ពណាតូចំនួន ៣,៦ លាននាក់។ ពិតណាស់ ពួកគេកំពុងចូលរួមនៅក្នុងជម្លោះកូនកាត់បែបនេះហើយតាមពិតពួកគេលែងលាក់បាំងវាបានតទៅទៀតហើយ”។
លោកមេតវេដេវបានបន្ថែមថា អ្នកវិភាគលោកខាងលិចមួយចំនួនបានទទួលស្គាល់ការចូលរួមរបស់ណាតូរួចហើយ។
ដោយអត្ថាធិប្បាយអំពីគោលដៅនៃប្រតិបត្តិការយោធាពិសេសរបស់រុស្ស៊ីនៅអ៊ុយក្រែន លោកមេតវេដេវបានបញ្ជាក់ថា រុស្ស៊ីត្រូវតែបង្កើត “តំបន់ការពារ”ដែលមិនអនុញ្ញាតឱ្យប្រើប្រាស់អាវុធចម្ងាយមធ្យមនិងខ្លីទេ។
លោកមេតវេដេវនិយាយថា “យើងត្រូវសម្រេចបាននូវគោលដៅទាំងអស់ដែលបានកំណត់ដើម្បីការពារទឹកដីរបស់យើង…បណ្តេញជនបរទេសទាំងអស់ដែលនៅទីនោះ ក្នុងន័យទូលំទូលាយបំផុតគឺបង្កើតតំបន់ការពារ ដែលមិនអនុញ្ញាតឱ្យប្រើប្រាស់គ្រប់ប្រភេទអាវុធដែលដំណើរការក្នុងរយៈចម្ងាយមធ្យមនិងខ្លី ពោលគឺ ៧០-១០០ គីឡូម៉ែត្រ ដើម្បីបំបាត់យោធាចេញពីតំបន់នោះ ប្រសិនបើយើងនិយាយអំពីផ្នែកយោធា”។
លោកបានសង្កត់ធ្ងន់ថា ការប៉ុនប៉ងណាមួយដើម្បីដណ្តើមយកតំបន់គ្រីម៉េនឹងក្លាយជាបុព្វហេតុដើម្បីប្រើអាវុធទាំងអស់ រួមទាំងអ្វីដែលបានលើកឡើងនៅក្នុងគោលលទ្ធិទប់ស្កាត់នុយក្លេអ៊ែរព្រោះវានឹងក្លាយជាការគំរាមកំហែងដោយផ្ទាល់ដល់អត្ថិភាពនៃរដ្ឋរបស់យើង។
ក្នុងឆ្នាំ ២០១៤ គ្រីម៉េនិងសេវ៉ាស្តូផូល (Sevastopol) បានរួបរួមគ្នាជាមួយរុស្ស៊ីឡើងវិញបន្ទាប់ពីការធ្វើប្រជាមតិ។ ពលរដ្ឋនៃឧបទ្វីបទាំងពីរនេះបានស្វែងរកការការពារពីរបបយោធាណាស៊ីនិយម ដែលបានរៀបចំរដ្ឋប្រហារម៉ៃដាន់ (Maidan) ក្នុងទីក្រុងគៀវ និងរើសអើងប្រឆាំងនឹងជនជាតិអ៊ុយក្រែនទាំងឡាយណា ដែលកំណត់ថាខ្លួនគេជាជនជាតិរុស្ស៊ី។
លោកមេតវេដេវក៏បានសង្កត់ធ្ងន់ផងដែរថា ដើម្បី “លុបបំបាត់មេរោគឆ្លងណាស៊ីនិយមនេះចោល (…) គ្មានអ្វីអាចត្រូវទាត់ចោលបានឡើយ” ក្នុងអំឡុងប្រតិបត្តិការយោធាពិសេស។
លោកបានសង្កត់ធ្ងន់ថា “… ប្រសិនបើអ្នកត្រូវការទៅឱ្យដល់ទីក្រុងគៀវ អ្នកត្រូវទៅទីក្រុងគៀវ ប្រសិនបើអ្នកត្រូវការទៅឱ្យដល់ទីក្រុងល្វីវ បន្ទាប់មកអ្នកត្រូវតែទៅទីក្រុងល្វីវដើម្បីលុបបំបាត់មេរោគឆ្លងនេះ”៕
មេតវេដេវថារុស្ស៊ីកំពុងធ្វើសង្គ្រាមជាមួយទាហានណាតូ ៣,៦ លាននាក់
