Views: 1
ប្រែសម្រួល : កញ្ញាដាលីស (ដេល្លីម៉េល) ៖ ឧត្តមនាវីឯក លោក វីកទ័រ សូកូឡូវ (Viktor Sokolov) មេបញ្ជាការកងនាវាសមុទ្រខ្មៅរបស់រុស្ស៊ី ត្រូវបានបង្ហាញនៅលើកញ្ចក់ទូរទស្សន៍រដ្ឋរុស្ស៊ីកាលពីថ្ងៃអង្គារ ពេលលោកកំពុងចូលរួមកិច្ចប្រជុំរបស់មេដឹកនាំការពារជាតិពីចម្ងាយ ពោលគឺមួយថ្ងៃគត់បន្ទាប់ពីកងកម្លាំងពិសេសអ៊ុយក្រែនបាននិយាយថាពួកគេបានសម្លាប់រូបគាត់ហើយ។
នៅក្នុងវីដេអូនិងរូបថតដែលចេញផ្សាយដោយក្រសួងការពារជាតិ លោកសូកូឡូវត្រូវបានបង្ហាញជាមេបញ្ជាការកងនាវាក្នុងចំណោមមេបញ្ជាការកងនាវាជាច្រើនរូបទៀតនៅក្នុងវីដេអូ ដែលហាក់ចូលរួមក្នុងកិច្ចប្រជុំផ្ទាល់របស់រដ្ឋមន្ត្រីការពារជាតិលោក សឺហ្គេ សយហ្គូ (Sergei Shoigu) និងមេទ័ពផ្សេងទៀត ទោះបីជាមិនបាននិយាយស្តីអ្វីក៏ដោយ។ គេមិនដឹងច្បាស់ថាពេលណាវីដេអូនេះត្រូវបានថតនោះទេ។
កងកម្លាំងពិសេសរបស់អ៊ុយក្រែនបាននិយាយកាលពីថ្ងៃចន្ទថា លោកសូកូឡូវត្រូវបានសម្លាប់រួមជាមួយមន្ត្រី៣៣នាក់ផ្សេងទៀតនៅក្នុងការវាយប្រហារដោយមីស៊ីលកាលពីសប្តាហ៍មុនលើទីស្នាក់ការកណ្តាលនៃកងនាវាសមុទ្រខ្មៅរបស់រុស្ស៊ីនៅក្នុងទីក្រុងកំពង់ផែ សេវ៉ាស្តូប៉ូល (Sevastopol) ក្នុងតំបន់គ្រីម៉េ ដែលបានរឹបអូសពីអ៊ុយក្រែនក្នុងឆ្នាំ ២០១៤។
ជាការឆ្លើយតបទៅនឹងវីដេអូរបស់រុស្ស៊ី កងកម្លាំងពិសេសអ៊ុយក្រែនបាននិយាយនៅលើ Telegram ថា “ដោយហេតុថារុស្ស៊ីត្រូវបង្ខំចិត្តចាក់ផ្សាយជាបន្ទាន់នូវការឆ្លើយតបជាមួយលោកសូកូឡូវកំពុងនៅរស់ អង្គភាពរបស់យើងនឹងបំភ្លឺព័ត៌មាននេះ”។
អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov) បានបដិសេធមិនធ្វើអត្ថាធិប្បាយលើការអះអាងរបស់អ៊ុយក្រែនទេ ដោយបង្វែរអ្នកយកព័ត៌មានទៅសួរក្រសួងការពារជាតិ។
រដ្ឋមន្ត្រីការពារជាតិអ៊ុយក្រែន លោក រូស្តឹម អ៊ូមឺរ៉ូវ (Rustem Umerov) ដែលផ្តល់បទសម្ភាសន៍ដល់ CNN ក៏មិនបានបញ្ជាក់ឬបដិសេធចំពោះការស្លាប់របស់លោកសូកូឡូវដែរ ប៉ុន្តែបាននិយាយថា ការស្លាប់របស់គាត់អាចជារឿងល្អសម្រាប់អ្នកពាក់ព័ន្ធទាំងអស់៕
លោកសូកូឡូវបង្ហាញមុខលើកញ្ចក់ទូរទស្សន៍រុស្ស៊ី តែមិនបាននិយាយស្តីទេ
