Views: 6
ប្រែសម្រួល : កញ្ញាដាលីស (ឆានែលញូវអេស៊ា) ៖ នាយកប្រតិបត្តិក្រុមហ៊ុន Meta Platforms លោក ម៉ាក ហ្សាក់ឃើបឺក កាលពីថ្ងៃពុធបានបង្ហាញផលិតផល AI ថ្មីសម្រាប់អ្នកប្រើប្រាស់ រួមទាំងរ៉ូបូត ដែលបង្កើតរូបភាពស្តែងៗ និងវ៉ែនតាឆ្លាតវៃក៏ដូចជាកាសវីដេអូ VR ដែលបានធ្វើបច្ចុប្បន្នភាពផងដែរ។
លោកហ្សាក់ឃើបឺកបានពណ៌នាផលិតផលទាំងនេះថាជាការប្រមូលផ្តុំពិភពនិម្មិតនិងពិភពពិត ហើយបានគូសបញ្ជាក់ថាផ្នែកនៃអ្វីដែល Meta ផ្តល់ជូនគឺមានតម្លៃទាប ឬ AI ឥតគិតថ្លៃ ដែលអាចបញ្ចូលទៅក្នុងទម្លាប់ប្រចាំថ្ងៃ។ Meta’s Quest គឺជាកាស VR លក់ដាច់បំផុត ហើយនាយកប្រតិបត្តិរបស់ក្រុមហ៊ុនបានពណ៌នាវាមានតម្លៃល្អបំផុតនៅក្នុងឧស្សាហកម្មនេះ ជាការឆ្លើយតបមួយនៅមុនការចេញលក់កាស VR ដែលមានតម្លៃថ្លៃជាងនេះពី Apple ។
ថ្លែងពីទីធ្លាកណ្តាលនៅបរិវេណក្រុមហ៊ុនក្នុងតំបន់ស៊ីលីកូនវ៉ាល់លី (Silicon Valley) ដ៏ធំទូលាយរបស់ក្រុមហ៊ុន Meta លោកហ្សាក់ឃើបឺកបាននិយាយថា វ៉ែនតាឆ្លាតវៃ Ray-Ban ជំនាន់ថ្មីរបស់ Meta នឹងចាប់ផ្តើមនាំចេញនៅថ្ងៃទី ១៧ ខែតុលា ដែលមានតម្លៃ ២៩៩ ដុល្លារ។ ឧបករណ៍នេះនឹងរួមបញ្ចូលជំនួយការ Meta AI ថ្មី និងមានសមត្ថភាពផ្សាយបន្តផ្ទាល់នូវអ្វីដែលអ្នកប្រើកំពុងឃើញដោយផ្ទាល់ ទៅកាន់ Facebook និង Instagram ដែលជាការវិវឌ្ឍលើសមត្ថភាពថតរូបរបស់វ៉ែនតាជំនាន់មុន។
លោកហ្សាក់ឃើបឺកបាននិយាយបែបនេះនៅក្នុងសន្និសីទ Meta Connect ដែលជាព្រឹត្តិការណ៍ដ៏ធំបំផុតរបស់ក្រុមហ៊ុនបណ្តាញសង្គមប្រចាំឆ្នាំក៏ដូចជាសន្និសីទផ្ទាល់លើកដំបូងរបស់ខ្លួនចាប់តាំងពីការចាប់ផ្តើមនៃជំងឺរាតត្បាត។
គាត់ក៏បាននិយាយផងដែរថា កាសចម្រុះ Quest ចុងក្រោយបង្អស់នឹងចាប់ផ្តើមនាំចេញនៅថ្ងៃទី ១០ ខែតុលា ហើយបានណែនាំផលិតផល AI ជំនាន់ដំបូងៗជាច្រើនរបស់ក្រុមហ៊ុន។ ផលិតផលទាំងនោះរួមមានឆាតបុត (Chatbot) ហៅថា Meta AI ដែលអាចបង្កើតទាំងការឆ្លើយតបជាអក្សរនិងរូបភាពស្តែងៗ។
លោកហ្សាក់ឃើបឺកបាននិយាយថា “ពេលខ្លះយើងបង្កើតរបស់ថ្មីដោយបញ្ចេញនូវអ្វីដែលមិនដែលឃើញពីមុនមក។ ប៉ុន្តែពេលខ្លះយើងបង្កើតរបស់ថ្មីអស្ចារ្យ ប៉ុន្តែមានតម្លៃថ្លៃ ហើយធ្វើឱ្យវាអាចមានតម្លៃសមរម្យសម្រាប់មនុស្សគ្រប់គ្នាឬសូម្បីឥតគិតថ្លៃ។”
Meta AI នឹងត្រូវបានបង្កប់នៅក្នុងវ៉ែនតាឆ្លាតវៃក្នុងនាមជាជំនួយការ ដោយចាប់ផ្តើមជាមួយនឹងការដាក់ឱ្យប្រើប្រាស់ជាប្រភេទបេតា (Beta) នៅសហរដ្ឋអាម៉េរិក។ ការអាប់ដេតសូហ្វវែ ដែលបានគ្រោងទុកសម្រាប់ឆ្នាំក្រោយ នឹងផ្តល់ឱ្យជំនួយការនេះនូវសមត្ថភាពក្នុងការកំណត់អត្តសញ្ញាណទីកន្លែងនិងវត្ថុដែលមនុស្សកំពុងមើលឃើញ ក៏ដូចជាធ្វើការបកប្រែភាសាទាំងឡាយផងដែរ៕
វ៉ែនតាឆ្លាត កាស VR និងរ៉ូបូត AI ត្រូវបានបង្ហាញនៅសន្និសីទ Meta Connect
