Views: 2
ប្រែសម្រួល : កញ្ញាដាលីស (អេស៊ាវ័ន) ៖ កិច្ចពិភាក្សារវាងទេសាភិបាលធនាគារកណ្តាលអាស៊ីអាគ្នេយ៍ និងរដ្ឋមន្ត្រីហិរញ្ញវត្ថុបានឈានចូលដល់ថ្ងៃចុងក្រោយរបស់ពួកគេកាលពីថ្ងៃសុក្រទី៣១មីនា ដោយមេដឹកនាំទាំងនោះផ្តោតលើការពង្រឹងភាពធន់របស់តំបន់ទល់នឹងហានិភ័យសកល។
ការប្រជុំមេដឹកនាំហិរញ្ញវត្ថុមកពីសមាគមប្រជាជាតិអាស៊ីអាគ្នេយ៍ (អាស៊ាន) បានកើតឡើងចំពេលមានកំពុងមានភាពចលាចលផ្នែកធនាគារលើពិភពលោកនាពេលថ្មីៗនេះបន្ទាប់ពីការដួលរលំនៃធនាគារ Silicon Valley និងការផ្តល់ថវិកាសង្គ្រោះនិងការកាន់កាប់ធនាគារ Credit Suisse ។
រដ្ឋមន្ត្រីហិរញ្ញវត្ថុលោកស្រី ស្រី មូលយ៉ានី អ៊ីដ្រាវ៉ាទី (Sri Mulyani Indrawati) នៃប្រទេសឥណ្ឌូនេស៊ីដែលធ្វើជាប្រធានអាស៊ាននៅឆ្នាំនេះ បាននិយាយថាទោះបីជាតំបន់នេះត្រូវបានព្យាករណ៍ដោយអង្គការអន្តរជាតិនានាថានឹងមានកំណើនជាវិជ្ជមាននៅឆ្នាំនេះក៏ដោយក៏ប៉ុន្តែអ្នកបង្កើតគោលនយោបាយគួរតែធ្វើបច្ចុប្បន្នភាពជាប្រចាំនូវគោលនយោបាយនានាដើម្បីឆ្លើយតបទៅនឹងថាមវន្តពិភពលោកដែលផ្លាស់ប្តូរយ៉ាងរហ័ស។
រដ្ឋមន្ត្រីហិរញ្ញវត្ថុលោកស្រី ស្រី មូលយ៉ានី អ៊ីដ្រាវ៉ាទី
លោកស្រីបាននិយាយថា “យើងទាំងអស់គ្នាត្រូវរក្សាការប្រុងប្រយ័ត្ន និងត្រៀមខ្លួនសម្រាប់បញ្ហាប្រឈមខាងក្រៅមួយចំនួនដែលអាចបង្កឱ្យមានចលាចលនៅក្នុងសេដ្ឋកិច្ចក្នុងតំបន់របស់យើង”។
លោក ភើរី វ៉ាជីយ៉ូ (Perry Warjiyo)ទេសាភិបាលធនាគារកណ្តាលរបស់ឥណ្ឌូនេស៊ីបានអំពាវនាវនៅលើវេទិកានេះឱ្យជំរុញការប្រើប្រាស់រូបិយវត្ថុក្នុងស្រុកសម្រាប់ការទូទាត់ដើម្បីកាត់បន្ថយការប្រែប្រួល និងការប៉ះពាល់ទៅនឹងរូបិយប័ណ្ណសំខាន់ៗ។
អភិបាលរងធនាគារកណ្តាលឥណ្ឌូនេស៊ីលោក ដូឌី ប៊ូឌី វ៉ាលូយ៉ូ (Dody Budi Waluyo) បាននិយាយកាលពីថ្ងៃព្រហស្បតិ៍ ទី៣០ មីនាថាមន្ត្រីនៅក្នុងកិច្ចប្រជុំនៅកោះបាលីក៏បានស្នើឱ្យពិភាក្សាអំពីមធ្យោបាយកែលម្អការតភ្ជាប់នៃប្រព័ន្ធទូទាត់ក្នុងតំបន់ផងដែរ បើទោះបីជាហេដ្ឋារចនាសម្ព័ន្ធពាក់ព័ន្ធនៅក្នុងប្រទេសអាស៊ានមួយចំនួនមិនទាន់ត្រូវបានអភិវឌ្ឍពេញលេញក៏ដោយ។
លោកបានបន្ថែមថា ពួកគេក៏បានពិភាក្សាអំពីរូបិយប័ណ្ណគ្រីបតូនិងរូបិយប័ណ្ណឌីជីថលរបស់ធនាគារកណ្តាលផងដែរ។
នៅក្នុងកិច្ចប្រជុំមួយនៅក្រៅព្រឹត្តិការណ៍នេះ ទេសាភិបាលធនាគារកណ្តាលនៃប្រទេសឥណ្ឌូនេស៊ីនិងហ្វីលីពីនបាននិយាយថា ប្រព័ន្ធធនាគាររបស់ពួកគេមានភាពធន់ហើយបទប្បញ្ញត្តិកាន់តែតឹងរ៉ឹងគឺដាក់នៅនឹងកន្លែងជាស្រេចដើម្បីទប់ស្កាត់ការកើតឡើងម្តងទៀតនៃវិបត្តិហិរញ្ញវត្ថុអាស៊ីដូចកាលពីចុងទសវត្សរ៍ឆ្នាំ១៩៩០៕
