Views: 4
ប្រែសម្រួលៈបំណង(រ៉យទ័រ)៖ មេដឹកនាំកូរ៉េខាងជើងលោកគីម ជុងអ៊ុន បានអំពាវនាវអោយប្រទេសលោកត្រៀមខ្លួនធ្វើការវាយប្រហារដោយគ្រាប់បែកនុយគ្លេអ៊េរនៅពេលណាមួយដើម្បីទប់ស្កាត់សង្គ្រាមនិងបានចោទប្រកាន់អាម៉េរិកនិងកូរ៉េខាងត្បូងថាពង្រីកសមយុទ្ធយោធារួមគ្នា ដោយមានការចូលរួមពីទ្រព្យនុយគ្លេអ៊ែររបស់អាម៉េរិកផងដែរ នេះបើតាមការផ្សាយរបស់ទីភ្នាក់ងារសារព័ត៌មានរដ្ឋកូរ៉េខាងជើង KCNAកាលពីថ្ងៃចន្ទទី២០មីនា។
ការអំពាវនាវរបស់គីមបានកើតឡើងនៅពេលប្រទេសឯកោមួយនេះបានធ្វើអ្វីដែលប្រព័ន្ធឃោសនាKCNAបានហៅថា សមយុទ្ធយោធាក្នុងគោលបំណងទ្រោល«សមត្ថភាពរារាំងនិងវាយបកដោយប្រើនុយគ្លេអ៊ែរ»របស់កូរ៉េខាងជើងកាលពីថ្ងៃសៅរ៍និងថ្ងៃអាទិត្យ ដើម្បីបញ្ជូនសញ្ញាព្រមានខ្លាំងៗទៅកាន់សត្រូវទាំងពីរខាងលើ។
KCNAបាននិយាយថា ក្នុងសមយុទ្ធ កាំជ្រួចផ្លោងបំពាក់ក្បាលនុយគ្លេអ៊ែរក្លែងក្លាយមួយបានហោះបានចម្ងាយ៨០០គីឡូម៉ែត្រមុនធ្លាក់ចំគោលដៅមួយនៅរយៈកំពស់៨០០ម៉ែត្រក្រោមសេណារីយ៉ូនៃការវាយប្រហារដោយសព្វាវុធនុយគ្លេអ៊ែរកលយុទ្ធមួយ។
លោកគីម បានត្រួតមើលការបាញ់បង្ហោះនេះ និងបាននិយាយថា ការរៀបចំធ្វើសមយុទ្ធនេះក្នុងគោលបំណងធ្វើអោយប្រសើរសមត្ថភាពសង្គ្រាមជាក់ស្តែងរបស់យោធាកូរ៉េខាងជើង និងរំលេចអំពីការត្រៀមខ្លួនសំរាប់«ការវាយបកដោយប្រើនុយគ្លេអ៊ែរដ៏លើសលប់ភ្លាមៗ»តាមរយៈការហ្វឹកហាត់ដូច្នេះ។
KCNAបានស្រង់សម្តីរបស់គីម ដែលថា«ស្ថានការណ៍បច្ចុប្បន្ន ដែលសត្រូវកាន់តែចាត់វិធានការឈ្លានពានរបស់គេលើកូរ៉េខាងជើង ទាមទារអោយសាធារណរដ្ឋប្រជាមានិតប្រជាធិបតេយ្យកូរ៉េពង្រឹងសមត្ធភាពរារាំងសង្គ្រាមនុយគ្លេអ៊ែររបស់ខ្លួន»។
«កងកម្លាំងនុយគ្លេអ៊ែររបស់សាធារណរដ្ឋប្រជាមានិតប្រជាធិបតេយ្យកូរ៉េនឹងរារាំង គ្រប់គ្រងហើយចាត់ចែងលើចំណាត់ការដ៏ធ្វេសប្រហែសនិងការបង្ករឿងរបស់សត្រូវ ជាមួយនឹងការត្រៀមធ្វើសង្គ្រាមដ៏ខ្ពស់របស់ខ្លួន ហើយអនុវត្តបេសកកម្មដ៏សំខាន់របស់ខ្លួនដោយគ្មានស្ទាក់ស្ទើរក្នុងករណីសភាពការណ៍ចាំបាច់ណាមួយ»។
KCNAក៏បានបង្ហាញរូបភាពលោកគីម ចូលរួមការសាកល្បងកាំជ្រួច ជាថ្មីជាមួយកូនស្រី នៅពេលអណ្តាតភ្លើងបាញ់ចេញពីកន្ទុយកាំជ្រួចហោះចូលក្នុងអាកាស។
កូរ៉េខាងត្បូងនិងជប៉ុនបានរាយការណ៍អំពីការបាញ់កាំជ្រួចផ្លោងចម្ងាយខ្លីមួយនៅឯនាយឆ្នេរខាងកើតកាលពីថ្ងៃអាទិត្យចំពេលកូរ៉េខាងត្បូងនិងអាម៉េរិកធ្វើសមយុទ្ធធំបំផុតរបស់គេដោយមានការចូលរួមពីកងទ័ពជើងគោក អាកាស ជើងទឹក និងចូលរួមដោយយន្តហោះទម្លាក់គ្រាប់បែកចម្ងាយឆ្ងាយ B-1Bរបស់កងទ័ពអាកាសអាម៉េរិក។
ក្នុងសេចក្តីថ្លែងការណ៍មួយទៀត KCNA បានននិយាយថា ប្រជាជនកូរ៉េជាង១,៤លាននាក់បានស្ម័គ្រចិត្តចូលបំរើកងទ័ពដើម្បីប្រយុទ្ធទល់នឹងកងកម្លាំងរវបស់កូរ៉េខាងត្បូងនិងអាម៉េរិក ដោយកើនពីចំនួន៨០០.០០០នាក់ដែលខ្លួនបានរាយការណ៍កាលពីពេលមុន៕
លោកគីម ចូលរួមការសាកល្បងកាំជ្រួច ជាថ្មីជាមួយកូនស្រី នៅពេលអណ្តាតភ្លើងបាញ់ចេញពីកន្ទុយកាំជ្រួចហោះចូលក្នុងអាកាស