Views: 1
ប្រែសម្រួល : កញ្ញាដាលីស (ស្ត្រេតថែមស៍) ៖ អមដោយរថក្រោះនិងជើងទម្របាញ់មីស៊ីល ប្រមុខរបបយោធាមីយ៉ាន់ម៉ាកាលពីថ្ងៃចន្ទទី២៧មីនាបានប្តេជ្ញាមិនបោះបង់ចោលការបង្ក្រាបគូប្រជែង ហើយបានទទូចថា យោធានឹងរៀបចំការបោះឆ្នោត ពោលគឺតែប៉ុន្មានសប្តាហ៍បន្ទាប់ពីទទួលស្គាល់ថា ខ្លួនមិនបានគ្រប់គ្រងទឹកដីគ្រប់គ្រាន់ដើម្បីអនុញ្ញាតឱ្យមានការបោះឆ្នោត។
មីយ៉ាន់ម៉ាបានស្ថិតក្នុងភាពចលាចលចាប់តាំងពីយោធាបានទម្លាក់រដ្ឋាភិបាលស៊ីវិលរបស់លោកស្រី អ៊ុងសាន ស៊ូជី ក្នុងឆ្នាំ ២០២១បន្ទាប់ពីបានធ្វើការអះអាងដោយគ្មានហេតុផលអំពីការលួចបន្លំសន្លឹកឆ្នោត។
ការទម្លាក់នេះបានបង្កឱ្យមានការប្រយុទ្ធគ្នាជាថ្មីជាមួយក្រុមឧទ្ទាមជនជាតិភាគតិច និង បានបង្កើតឱ្យមានកងកម្លាំងការពារប្រជាជនប្រឆាំងរបបយោធា (PDFs) រាប់សិបក្រុមខណៈផ្នែកជាច្រើននៃប្រទេសឥឡូវនេះត្រូវបានបំផ្លិចបំផ្លាញដោយការប្រយុទ្ធគ្នានិងសេដ្ឋកិច្ចកំពុងធ្លាក់ចុះ។
ឧត្តមសេនីយ៍ មីន អ៊ុងហ្លាំង បានប្រាប់ទស្សនិកជនប្រហែល ៨.០០០ នាក់ដែលចូលរួមក្នុងក្បួនដង្ហែទិវាកងកម្លាំងប្រដាប់អាវុធប្រចាំឆ្នាំនៅក្នុងរដ្ឋធានីណៃពិដោ យ៉ាងដូច្នេះថាយោធានឹងចាត់វិធានការយ៉ាងម៉ឺងម៉ាត់ប្រឆាំងនឹងគូប្រជែងរបស់ខ្លួន និងក្រុមឧទ្ទាមជនជាតិភាគតិចដែលគាំទ្រពួកប្រឆាំង។
លោកបាននិយាយថា “អំពើភេរវកម្មរបស់រដ្ឋាភិបាលស្រមោល NUG និងពួកបាវបម្រើហៅថា PDFs នឹងត្រូវកម្ចាត់ឱ្យអស់ជារៀងរហូត”។ NUG គឺសំដៅទៅលើរដ្ឋាភិបាលរួបរួមជាតិជាស្ថាប័នគ្រប់គ្រងដោយសមាជិកសភាដែលត្រូវបានបណ្តេញចេញពីអំណាចដែលកំពុងធ្វើការប្រឆាំងរបបយោធាកើតចេញពីរដ្ឋប្រហារ។
លោកបានបន្តថា បន្ទាប់មករបបយោធានឹងរៀបចំការបោះឆ្នោតដោយសេរីនិងយុត្តិធម៌ នៅពេលបញ្ចប់ស្ថានភាពអាសន្ន។
កាលពីខែកុម្ភៈ យោធាបានប្រកាសបន្តដាក់ប្រទេសក្នុងស្ថានភាពអាសន្នរយៈពេលពីរឆ្នាំទៀត ហើយបានពន្យារពេលការបោះឆ្នោតដែលខ្លួនបានសន្យាថានឹងរៀបចំនៅខែសីហាដោយសារតែខ្លួនមិនបានគ្រប់គ្រងប្រទេសឱ្យបានគ្រប់គ្រាន់ដើម្បីឱ្យការបោះឆ្នោតអាចប្រព្រឹត្តទៅបាន។
ឧត្តមសេនីយ៍ មីន អ៊ុងហ្លាំង បានប្រាប់ក្បួនដង្ហែថា “ភាពស្ងប់ស្ងាត់និងស្ថិរភាពគឺមានសារៈសំខាន់” មុនពេលការបោះឆ្នោតណាមួយអាចដំណើរការទៅមុខបាន។
យន្តហោះបានហោះពីលើក្បាលដោយបញ្ចេញផ្សែងពណ៌លឿង ក្រហម និងបៃតងនៃទង់ជាតិ ហើយការហោះហើររបស់យន្តហោះចម្បាំង Sukoi Su-30ផលិតដោយរុស្ស៊ីចំនួនប្រាំគ្រឿងបានបន្លឺសំឡេងលាន់ទ្រហឹង។
រូបភាពនៅលើប្រព័ន្ធផ្សព្វផ្សាយរដ្ឋបានបង្ហាញស្ត្រីឈរតម្រង់ជួរតាមដងផ្លូវដែលនាំទៅដល់ទីលានដង្ហែក្បួន ដើម្បីហែក្បួនទាហានជាមួយនឹងផ្កា។
ទិវាកងកម្លាំងប្រដាប់អាវុធគឺរំលឹកដល់ការចាប់ផ្តើមនៃការតស៊ូក្នុងតំបន់ចំពោះការកាន់កាប់របស់ជប៉ុនក្នុងអំឡុងសង្គ្រាមលោកលើកទីពីរ ហើយជាធម្មតាមានក្បួនដង្ហែយោធា ដែលចូលរួមដោយមន្ត្រីនិងអ្នកការទូតបរទេស៕
លោកមីនអ៊ុងហ្លាំងប្តេជ្ញាបង្ក្រាបពួកប្រឆាំងឱ្យអស់គ្មានសល់ម្នាក់ នៅចំពោះមុខក្បួនដង្ហែទិវាកងកម្លាំងប្រដាប់អាវុធប្រចាំឆ្នាំនៅក្នុងរដ្ឋធានីណៃពិដោ
