អតីតប្រធាននាយកដ្ឋានគណនេយ្យ ហិរញ្ញវត្ថុ នៃក្រសួងកសិកម្ម រុក្ខាប្រមាញ់ និងនេសាទ ម្នាក់ គឺលោកស្រី គង់ សុធីរី ទទួលបានការតែងតាំងមុខតំណែងថ្មីជា អនុរដ្ឋលេខាធិការ នៃក្រសួងអភិវឌ្ឍន៍ជនបទ ដោយព្រះរាជក្រឹត្យលេខ នស/រកត/០១២៣/០៦២ ចុះថ្ងៃទី១០ ខែមករា ឆ្នាំ២០២៣ ពោលបានឡើងឋានៈជា « លោកជំទាវ » ខណៈស្វាមីរបស់លោកជំទាវ គឺឯកឧត្តម ភួង សោភា បាន និងកំពុងកាន់មុខតំណែងជា រដ្ឋលេខាធិការ នៃក្រសួងអភិវឌ្ឍន៍ជនបទ ហើយឯកឧត្តម ភួង សោភា ត្រូវជាប្អូនថ្លៃរបស់ឯកឧត្តម បណ្ឌិតសភាចារ្យ អ៊ុក រ៉ាប៊ុន ដែលជារដ្ឋមន្ដ្រីក្រសួងអភិវឌ្ឍន៍ជនបទ ព្រមទាំងមានឯកឧត្តម អ៊ុក ពញ្ញា ត្រូវជាកូនប្រុសរបស់ឯកឧត្តម បណ្ឌិតសភាចារ្យ អ៊ុក រ៉ាប៊ុន ក៏បាន និងកំពុងកាន់មុខតំណែងជា រដ្ឋលេខាធិការ នៃក្រសួងអភិវឌ្ឍន៍ជនបទ តាមរបៀប « មូលជុំគ្នានៅក្នុងក្រសួងតែមួយ » ផងដែរ ។
លោកស្រី គង់ សុធីរី ធ្លាប់ទទួលបានការតែងតាំងជា ប្រធាននាយកដ្ឋានគណនេយ្យ ហិរញ្ញវត្ថុ នៃក្រសួងកសិកម្ម រុក្ខាប្រមាញ់ និងនេសាទ តាំងពីសម័យឯកឧត្តម បណ្ឌិត អ៊ុក រ៉ាប៊ុន ( កាលណោះមិនទាន់ទទួលបានគោរមងារជា បណ្ឌិតសភាចារ្យ នៅឡើយ ) ធ្វើជារដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ នាដើមឆ្នាំ២០១៤មកម្ល៉េះ ដោយអនុក្រឹត្យលេខ ២៥៩អនក្រ.តត ចុះថ្ងៃទី១៣ ខែមីនា ឆ្នាំ២០១៤ ។
ប្រការគួរឲ្យចាប់អារម្មណ៍នោះ គឺចាប់តាំងពីលោកស្រី គង់ សុធីរី ឡើងកាន់មុខតំណែងជា ប្រធាននាយកដ្ឋានគណនេយ្យ ហិរញ្ញវត្ថុ នៃក្រសួងកសិកម្ម រុក្ខាប្រមាញ់ និងនេសាទ មក រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ ចំនួនពីររូបហើយមិនបានកាន់មុខតំណែងដល់ចប់អាណត្តិស្រួលបួលឡើយ ជាអាទិ៍ ៖ ឯកឧត្តម បណ្ឌិត អ៊ុក រ៉ាប៊ុន ( ឡើងកាន់តំណែងជា រដ្ឋមន្ដ្រី នាអំឡុងខែកញ្ញា ឆ្នាំ២០១៣ តែបានផ្លាស់ចេញនាខែមេសា ឆ្នាំ២០១៦ ដោយមកកាន់មុខតំណែងជា រដ្ឋមន្ដ្រី នៃក្រសួងអភិវឌ្ឍន៍ជនបទ វិញ ) និងឯកឧត្តម វេង សាខុន ( ឡើងកាន់មុខតំណែងជា រដ្ឋមន្ដ្រី អាណត្តិថ្មី សម្រាប់នីតិកាលទី៦ នៃរដ្ឋសភា នាខែកញ្ញា ឆ្នាំ២០១៨ តែត្រូវបានដកហូតមុខតំណែងវិញ នាខែតុលា ឆ្នាំ២០២២ ) ។
លុះក្រោយពេលក្រសួងកសិកម្ម រុក្ខាប្រមាញ់ និងនេសាទ មានឯកឧត្តម ឌិត ទីណា ឡើងកាន់មុខតំណែងជា រដ្ឋមន្ដ្រី ជំនួសឯកឧត្តម វេង សាខុន ដែលត្រូវបានដកហូតមុខតំណែងទាំងតក់ក្រហល់ បានប្រមាណ០៣ខែ លោកស្រី គង់ សុធីរី សម្រេចចិត្តចាកចេញពីក្រសួងកសិកម្ម រុក្ខាប្រមាញ់ និងនេសាទ ដោយទទួលបានការតែងតាំងមុខតំណែងថ្មីជា អនុរដ្ឋលេខាធិការ នៃក្រសួងអភិវឌ្ឍន៍ជនបទ មក « ជុំមូលគ្នា » ជាមួយបងថ្លៃ ជារដ្ឋមន្ដ្រី ជាមួយស្វាមី ជារដ្ឋលេខាធិការ និងជាមួយក្មួយ ជារដ្ឋលេខាធិការ តែម្ដង ( Sic! ) ។
មជ្ឈដ្ឋានអ្នកតាមដាន និងវិភាគកិច្ចការសង្គមនៅកម្ពុជា បានបញ្ចេញទស្សនៈថា ថ្វីដ្បិតក្រសួងកសិកម្ម រុក្ខាប្រមាញ់ និងនេសាទ ជាក្រសួងមានចំណូល ប៉ុន្តែក្រសួងនេះ មានខ្ទង់ចំណាយសម្រាប់ឆ្នាំ២០២៣ ត្រឹមចំនួន ៦៥០ ២៤០,៦លានរៀល ( ប្រមាណ ជាង១៦០លានដុល្លារអាមេរិក ) ប៉ុណ្ណោះ ខណៈក្រសួងអភិវឌ្ឍន៍ជនបទ មានខ្ទង់ចំណាយសម្រាប់ឆ្នាំ២០២៣ រហូតដល់ចំនួន ១ ០២៣ ៧៧៤លានរៀល ( ប្រមាណ ជាង២៥២លានដុល្លារអាមេរិក ) ឯណោះ ។ ដូច្នេះ លោកជំទាវ គង់ សុធីរី ទំនងជាមន្ដ្រីមានជំនាញចាយលុយ ទើបត្រូវរត់រកក្រសួង ដែលមានខ្ទង់ចំណាយធំ និងមានឱកាសចាយលុយបានច្រើនផង នៅក្រសួងអភិវឌ្ឍន៍ជនបទ ដ្បិតមានក្រុមគ្រួសារ សាច់ញាតិ ( បងថ្លៃ ស្វាមី និងក្មួយ ) ជារដ្ឋមន្ដ្រី និងជារដ្ឋលេខាធិការ ដែលជាថ្នាក់ដឹកនាំក្រសួងដ៏មានឥទ្ធិពល ជាប្រព័ន្ធស្រេច ( Resic! ) ៕