Views: 8
ដោយ: ភ្នំខៀវ / បាត់ដំបង÷ មន្ត្រី និងតំណាងរបស់ស្ថាប័នអង្គភាពប្រឆាំងអំពើពុករលួយ ២០០នាក់ត្រៀមចូលរួមអង្កេតការក្នុងមណ្ឌលខេត្តបាត់ដំបង នាសម័យប្រឡងទុតិយភូមិឆ្នាំសិក្សា ២០២២នេះ។
ប្រធានមន្ទីរអប់រំយុវជន និងកីឡាខេត្តបាត់ដំបង លោក យី សុងគី បានបញ្ជាក់ប្រាប់ឲ្យដឹងនៅថ្ងៃទី០៤ ខែធ្នូ ឆ្នាំ ២០២២នេះថា÷ សមាសភាពនៃគណ:កម្មការការប្រឡងទុតិយភូមិឆ្នាំសិក្សា ២០២២- ២០២៣នេះស្ថាប័នអង្គភាពប្រឆាំងអំពើពុករលួយបានរៀបចំមន្ត្រី រួមទាំងតំណាងរបស់ខ្លួនចំនួន ២០០នាក់ឲ្យចូលរួមអង្កេតការនៅក្នុងការប្រឡងសញ្ញាប័ត្រមធ្យមសិក្សាកម្រិត ២ ឆ្នាំនេះ បន្ថែមពីលើមន្ត្រីគណ:កម្មការកណ្តាល មេប្រយោគអនុរក្ស មន្ត្រីត្រួតពិនិត្យអាគា កម្លាំងការពារសន្តិសុខសណ្តាប់ធ្នាប់ ក្រុមគ្រូពេទ្យត្រៀមបង្ការសង្គ្រោះ ព្រមទាំងកម្លាំងសហភាពសហព័ន្ធយុវជនកម្ពុជាជាច្រើននាក់ទៀតត្រូវដាក់ពង្រាយទទួលខុសត្រូវប្រចាំមណ្ឌលប្រឡងក្នុងទូទាំងខេត្តបាត់ដំបង។
លោក ប្រធានមន្ទីរអប់រំយុវជន និងកីឡាខេត្តបាត់ដំបងបានបន្តថា÷ ដំណើការ នៃការប្រឡងទុតិយភូមិឆ្នាំនេះដែរមន្ទីរបានបែងចែកមណ្ឌលប្រឡងចំនួន ១៤ មណ្ឌល កើនឡើងជាងឆ្នាំចាស់ចំនួន ៤មណ្ឌល ដោយស្មើនឹង ៣១៨បន្ទប់ ភាគច្រើនមានទីតាំងឋិតនៅក្នុងទីប្រជុំជនក្រុងទាំងអស់ដើម្បីងាយស្រួលក្នុងការគ្រប់គ្រង។
សម័យប្រឡងទុតិយភូមិឆ្នាំ ២០២២នេះទៀតសោតមានថ្នាក់វិទ្យាសាស្ត្រ ៦មណ្ឌល ថ្នាក់វិទ្យាសាស្ត្រសង្គមចំនួន ៨មណ្ឌល ហើយមានបេក្ខភាពមានសិទ្ធចូលរួមប្រឡងសរុបចំនួន ៨៩៩៧នាក់៕