Views: 1
ប្រែសម្រួល : កញ្ញាដាលីស (ដេល្លីម៉េល) ៖ នៅក្នុងអត្ថបទមួយដែលបានចេញផ្សាយកាលពីថ្ងៃអាទិត្យទី១៩មីនានៅមួយថ្ងៃមុនដំណើរទស្សនកិច្ចរបស់សមភាគីចិនលោក ស៊ី ជីនពីង ប្រធានាធិបតីរុស្ស៊ីលោក វ្ល៉ាឌីមៀ ពូទីន បានស្វាគមន៍ចំពោះឆន្ទៈរបស់ចិនក្នុងការដើរតួនាទីស្ថាបនាក្នុងការដោះស្រាយវិបត្តិអ៊ុយក្រែន។
នៅក្នុងអ្វីដែលវិមានក្រឹមឡាំងនិយាយថាជាអត្ថបទដែលសរសេរសម្រាប់កាសែតចិន លោកពូទីនបានហៅលោកស៊ីថា “មិត្តចាស់ដ៏ល្អ” ហើយនិយាយថារុស្ស៊ីមានក្តីសង្ឃឹមខ្ពស់សម្រាប់ដំណើរទស្សនកិច្ចរបស់គាត់ ដែលជាមេដឹកនាំចិនដំបូងគេមកកាន់ប្រទេសរុស្ស៊ីចាប់តាំងពីលោកពូទីនបានចាប់ផ្តើម “ប្រតិបត្តិការយោធាពិសេស” កាលពីឆ្នាំមុន។
លោកពូទីនបាននិយាយថា “យើងមានអំណរអរគុណចំពោះជំហរតុល្យភាពរបស់ចិនទាក់ទងនឹងព្រឹត្តិការណ៍ដែលកើតឡើងនៅអ៊ុយក្រែនសម្រាប់ការយល់ដឹងពីសាវតារនិងមូលហេតុពិតរបស់វា។យើងស្វាគមន៍ឆន្ទៈរបស់ចិនក្នុងការដើរតួនាទីស្ថាបនាក្នុងការដោះស្រាយវិបត្តិ”។
លោកស៊ីនិងលោកពូទីនបានចុះហត្ថលេខាលើកិច្ចព្រមព្រៀងភាពជាដៃគូ “គ្មានដែនកំណត់” នៅប៉ុន្មានសប្តាហ៍មុនពេលការឈ្លានពានកាលពីឆ្នាំមុន។ចិនបានរក្សាអព្យាក្រឹតជាសាធារណៈនៅក្នុងជម្លោះអ៊ុយក្រែន ខណៈរិះគន់ការដាក់ទណ្ឌកម្មរបស់លោកខាងលិចប្រឆាំងនឹងរុស្ស៊ីនិងបញ្ជាក់ឡើងវិញនូវទំនាក់ទំនងជិតស្និទ្ធរបស់ខ្លួនជាមួយរដ្ឋាភិបាលក្រុងមូស្គូ។
រដ្ឋាភិបាលក្រុងប៉េកាំងកាលពីខែមុនបានចេញផ្សាយឯកសារ ១២ ចំណុចដែលអំពាវនាវឱ្យមានការសន្ទនានិងការដោះស្រាយបញ្ហានៅអ៊ុយក្រែន ប៉ុន្តែវាមានតែសេចក្តីថ្លែងការណ៍ទូទៅនិងមិនមានសំណើជាក់ស្តែងសម្រាប់របៀបដែលសង្គ្រាមរយៈពេលមួយឆ្នាំអាចនឹងបញ្ចប់នោះទេ។
អ៊ុយក្រែន ដែលនិយាយថារាល់ការដោះស្រាយបញ្ហាណាមួយនឹងតម្រូវឱ្យរុស្ស៊ីដកចេញពីទឹកដីទាំងអស់ដែលពួកគេបានដណ្តើមយករួមទាំងឧបទ្វីបគ្រីម៉េ ដែលរុស្ស៊ីបានកាត់យកក្នុងឆ្នាំ ២០១៤ បានស្វាគមន៍យ៉ាងប្រុងប្រយ័ត្នចំពោះសំណើរបស់ចិន។
សហរដ្ឋអាម៉េរិកបានបញ្ចេញប្រតិកម្មជាមួយនឹងមន្ទិលសង្ស័យយ៉ាងខ្លាំង ដោយហេតុថាចិនបានបដិសេធមិនព្រមថ្កោលទោសការឈ្លានពានរបស់រុស្ស៊ីហើយនិយាយថាបទឈប់បាញ់ឥឡូវនឹងបានត្រឹមឱ្យរុស្ស៊ីចំណេញទឹកដីនិងផ្តល់ពេលវេលាបន្ថែមសម្រាប់កងទ័ពរបស់ពូទីនប្រមូលផ្តុំឡើងវិញប៉ុណ្ណោះ។
រដ្ឋាភិបាលក្រុងវ៉ាស៊ីនតោនបាននិយាយតាំងពីខែមុនថា ខ្លួនព្រួយបារម្ភថាចិនអាចនឹងផ្តល់អាវុធដល់រុស្ស៊ី ដែលរដ្ឋាភិបាលក្រុងប៉េកាំងបានបដិសេធ៕
លោកពូទីនបាននិយាយថា ទំនាក់ទំនងរុស្ស៊ី-ចិនកំពុងស្ថិតក្នុងកម្រិតខ្ពស់ជាប្រវត្តិសាស្ត្រ ហើយពួកគេកំពុងសម្របសម្រួលគោលនយោបាយការបរទេសរបស់ពួកគេដើម្បីប្រយុទ្ធប្រឆាំងនឹងការគំរាមកំហែងរួមគ្នា ខណៈការប៉ុនប៉ងរបស់អាម៉េរិកដើម្បីទប់ស្កាត់ប្រទេសទាំងពីរមាន “ចរិតកាន់តែក្លៀវក្លានិងមុតមាំជាងមុន”
