Views: 1
ប្រែសម្រួលៈបំណង(ដេល្លីម៉េល,វ៉េអិនអិចស្ព្រេស)៖ នៅមួយថ្ងៃក្រោយរដ្ឋាភិបាលទីក្រុងហាណូយបានទាមទារអោយចាកចេញ នាវាសិក្សាស្រាវជ្រាវមួយរបស់ចិននិងនាវាអមចំនួនប្រាំគ្រឿងបានស្ថិតនៅក្នុងដែនទឹកដែលវៀតណាមអះអាងថាជាតំបន់សេដ្ឋកិច្ចពិសេស(EEZ)របស់ខ្លួននៅឡើយកាលពីថ្ងៃសុក្រទី២៦ឧសភា នៅក្បែរនឹងតំបន់ធ្វើអាជីវកម្មឧស្ម័នធម្មជាតិក្នុងសមុទ្រចិនខាងត្បូងដែលវៀតណាមអនុញ្ញាតអោយក្រុមហ៊ុនរុស្ស៊ីធ្វើអាជីវកម្ម។
នាវាចិន ស៊ាង យ៉ាង ហុង ១០(Xiang Yang Hong 10)បានចាប់ផ្តើមធ្វើប្រតិបត្តិការនៅក្នុងតំបន់EEZរបស់វៀតណាមកាលពីថ្ងៃ៧ឧសភា ដែលតំណាងអោយការជ្រៀតចូលធំបំផុតគិតចាប់តាំងពីឆ្នាំ២០១៩ នេះបើតាមលោក រេយ ផោវ៉ែល (Ray Powell)ដែលដឹកនាំគំរោងមួយស្តីពីសមុទ្រចិនខាងត្បូង។លោកបាននិយាយថា អំពើរបស់ចិននិងប្រតិកម្មរបស់វៀតណាមជាការបង្កើនភាពតានតឹងគួរអោយព្រួយបារម្ភមួយ។
កាលពីឆ្នាំ២០១៩ មានការប្រឈមមុខគ្នាអស់ជាងបីខែនិងភាគច្រើនផ្តោតលើប្លុកមួយដែលធ្វើអាជីវកម្មដោយក្រុមហ៊ុនរដ្ឋរុស្ស៊ីRosneft។នៅជាងមួយឆ្នាំក្រោយ Rosneftបានលក់ទ្រព្យរបស់ខ្លួននៅសមុទ្រចិនខាងត្បូងអោយក្រុមហ៊ុនZarubezhneftរបស់រដ្ឋរុស្ស៊ីដែលធ្វើអាជីវកម្មលើតំបន់ឧស្ម័នធម្មជាតិ ដែលកំពុងមានជម្លោះ។
នៅប៉ុន្មានសប្តាហ៍ចុងក្រោយនេះចាប់តាំងពីថ្ងៃ៧ឧសភា នាវាសិក្សាស្រាវជ្រាវចិន អមដោយនាវាជាច្រើនគ្រឿង បានធ្វើដំណើរកាត់ប្លុកឧស្ម័ន04-03 ដែលក្រុមហ៊ុនVietsovpetrកំពុងធ្វើអាជីវកម្ម។Vietsovpetrជាក្រុមហ៊ុនរកស៊ីរួមគ្នារវាងក្រុមហ៊ុនវៀតណាមPetroVietnamនិងក្រុមហ៊ុនរុស្ស៊ីZarubezhneft។
នាវាចិនក៏បើកកាត់ប្លុក 132 និង 131ដែលអាជ្ញាធរវៀតណាមអនុញ្ញាតអោយក្រុមហ៊ុនVietgazpromធ្វើអាជីវកម្មផងដែរ។Vietgazpromជាក្រុមហ៊ុនរួមគ្នារវាងក្រុមហ៊ុនPetroVietnamនិងក្រុមហ៊ុនGazpromរបស់រុស្ស៊ី។
សូមបញ្ជាក់ថា ចិនក៏ផ្តល់អាជ្ញាបណ្ណធ្វើអាជីវកម្មឧស្ម័នធម្មជាតិលើប្លុកទាំងពីរនេះដែរ ដោយសំអាងថាពួកវាស្ថិតក្នុងដែនទឹករបស់ខ្លួន។
កាលពីថ្ងៃព្រហស្បតិ៍ ពេលវៀតណាមទាមទារអោយចាកចេញ នាវាចិនស្ថិតនៅម្តុំប្លុក129 ដែលក៏ស្ថិតក្រោមប្រតិបត្តិការរបស់ក្រុមហ៊ុនVietgazprom។ការទាមទារនេះ ធ្វើឡើងក្រោយដំណើរទស្សនកិច្ចរបស់អតីតប្រធានាធិបតីរុស្ស៊ីនិងជាអនុប្រធានក្រុមប្រឹក្សាសន្តិសុខរុស្ស៊ីលោក ឌីមីទ្រី ម៉េតវ៉េដេវ នៅក្រុងហាណូយ។
នាវានេសាទចិនពីរកាលពីថ្ងៃសុក្របានស្ថិតនៅចម្ងាយតែ២០០ទៅ៣០០ម៉ែត្រពីនាវាចិន។
សូមបញ្ជាក់ថា ចិនអះអាងដែនទឹកធំល្វឹងល្វើយក្នុងសមុទ្រចិនខាងត្បូងដែលសំបូរធនធានថាមពល រួមទាំងដែនទឹកក្នុងតំបន់EEZរបស់វៀតណាម៕
វៀតណាមកាលពីថ្ងៃ២៥ឧសភា បានប្រាប់អោយចិនដកនាវាសិក្សាស្រាវជ្រាវ Xiangyanghong 10 និងនាវាដទៃទៀតចេញពីតំបន់EEZរបស់វៀតណាម តែនាវាទាំងនោះមិនអើពើ
