រាជធានីភ្នំពេញ ៖ នាយ កៃដរ ស្វាមីតារាកំប្លែងនាង ខ្ញុង បានជួបអាការៈមិនស្រួលដោយរឹងថ្គាម គាំងនិយាយលេងចេញ ក្នុងពេលដែលអ្នកទាំងពីរកំពុងតែ live លក់ផលិតផលតាមអនឡាញកាលពីយប់មិញ។
មហាជន ជាពិសេសអ្នកដែលបានចូលមើលនាង ខ្ញុង និងស្វាមី ដែលកំពុង Live នោះ បានសម្តែងការភ្ញាក់ផ្អើល និងបង្ហាញក្តីរន្ធត់យ៉ាងខ្លាំង ក្នុងពេលដែលគេបានឃើញស្វាមីនាង ខ្ញុង ស្រាប់រឹងដៃរឹងជើង និងថ្គាមនិយាយលេងកើត និងបានដួលភ្លាមៗតែម្តង ។ គេនៅមិនដឹងទេថា អាការៈរបស់នាយ កៃដរ ស្វាមីនាងខ្ញុង នាពេលនេះ បណ្តាលមកពីមូលហេតុអ្វីឡើយ ខណៈពេលកន្លងមក លោកក៏មិនដែលបានបង្ហាញសញ្ញាឈឺអ្វីនោះដែរ។
យ៉ាងណាភ្លាមៗនោះ អ្នកនាង ខ្ញុង បានបញ្ជូនស្វាមីទៅកាន់មន្ទីរពេទ្យដើម្បីធ្វើការសង្គ្រោះ ខណៈពេលនាងបានយំស្រែងដោយក្តីរន្ធត់ មិនអាចជួយអ្វីបានក្រៅតែពីបន់ស្រន់អោយទេវតាជួយស្វាមីតែប៉ុណ្ណោះ។ ក្រោយហេតុការណ៍នេះ មហាជនបាននាំគ្នាសម្តែងក្តីបារម្ភ និងសាកសួរពីស្ថានភាពរបស់នាយ កៃដរ នាពេលនោះជាហូរហែ ប៉ុន្តែអ្នកនាង ខ្ញុង មិនបានឆ្លើយតបឡើយ។
ទោះជាយ៉ាងណា នៅព្រឹកថ្ងៃនេះ អ្នកនាង ខ្ញុង បានបញ្ចេញសារបង្ហាញពីស្ថានភាពស្វាមីនាពេលនេះថា «លូវប្តីខ្ញុំចេញពីសង្គ្រោះបន្ទាន់ហើយ អរគុណសំរាប់ការបារម្ភ នឹងសួរសុខទុក្ខ ព័ត៌មានលំអិតខ្ញុំនឹងប្រាប់ពេលក្រោយទៀត លូវគាត់នៅកាល់ម៉ែត រង់ចាំលទ្ធផលស្គេនខួរក្បាលម្តងទៀតសិន»។
យ៉ាងណា បើតាមការបញ្ជាក់សារចុងក្រោយរបស់អ្នកនាង ខ្ញុង ស្ថានភាពជំងឺស្វាមីរបស់នាងនាពេលនេះកំពុងតែស្ថិតក្នុងការព្រួយបារម្ភនៅឡើយ ដោយសារនាងភ័យខ្លាចអាចមានការវះកាត់ខួរក្បាល ខណៈពេលដែលនាងបានបន់ស្រន់មិនអោយមានរឿងនេះកើតឡើងឡើយ។
ដោយឡែកបើតាមការបង្ហោះជាឃ្លីបវីដេអូរបស់អាចារ្យធំ នៅលើបណ្តាញសង្គមបង្ហាញស្ថានភាពរបស់នាយ កៃដ នាពេលនេះ គឺបានវិលមករកភាពល្អប្រសើរខ្លះហើយ ដោយលោកបានដឹងខ្លួន និងអាចនិយាយបាន។ ក្នុងនោះដែរ បើតាមការបញ្ជាក់ពីអាចារ្យធំ មូលហេតុដែលធ្វើអោយនាយ កៃដ មានអាការៈបែបនេះ គឺដោយសារលោកខ្វះកាល់ស្យូម ខ្វះជាតិស្ករ និងលើសឈា.ម។
មហាជន ជាមិត្តភក្តិទាំងក្នុង និងក្រៅសិល្បៈ ក៏បានចូលរួមជូនពរអោយស្វាមីនាង ខ្ញុង បានឆាប់ជាសះស្បើយ និងមានសុខភាពល្អឡើងវិញផងដែរ។
ព័ត៌មានបន្ថែមនឹងមានផ្សាយជូនបន្តទៀតនៅពេលក្រោយ ៕