Views: 2
ប្រែសម្រួល : កញ្ញាដាលីស (ស្ត្រេតថែមស៍) ៖ នាយករដ្ឋមន្ត្រីចិនថ្មី លោក លី ឈាង កាលពីថ្ងៃព្រហស្បតិ៍ទី៣០មីនា បាននិយាយថាសន្តិភាពប្រកបដោយនិរន្តរភាពនៅតែជាតម្រូវការជាមុនសម្រាប់ភាពរុងរឿងរបស់អាស៊ី ហើយបានជំរុញមេដឹកនាំក្នុងតំបន់កុំឱ្យចូលខាងភាគីក្នុងជម្លោះ ខណៈភាពតានតឹងនៅតែបន្តកើនឡើងរវាងចិននិងសហរដ្ឋអាម៉េរិក។
នៅក្នុងសុន្ទរកថាសំខាន់របស់លោកនៅក្នុងពិធីបើកសន្និសីទប្រចាំឆ្នាំនៃវេទិកា Boaoសម្រាប់អាស៊ី លោកលីក៏បានអំពាវនាវឱ្យប្រទេសនានាក្នុងទ្វីបអាស៊ីប្រុងប្រយ័ត្នចំពោះនិន្នាការនៃការបំបែកគ្នាជាបក្ខពួក ត្បិតមានភាពមិនច្បាស់លាស់មិនធ្លាប់មានពីមុនមកនៅក្នុងបរិយាកាសពិភពលោកក៏ដោយ។
វេទិកានេះត្រូវបានរៀបចំឡើងដំបូងនៅទីក្រុងប៉ូអាវ (Boao)ក្នុងឆ្នាំ ២០០២។
លោកលីបាននិយាយថា ចិននៅតែប្តេជ្ញាចិត្តក្នុងការបើកទូលាយ មិនថាស្ថានភាពពិភពលោកវិវត្តទៅជាយ៉ាងណានោះឡើយ។
ដោយថ្លែងទៅកាន់ទស្សនិកជនអន្តរជាតិដ៏ធំបំផុតរបស់គាត់ ចាប់តាំងពីចូលកាន់តំណែងជានាយករដ្ឋមន្ត្រីចិនកាលពីដើមខែមីនា លោកលីបានបន្ថែមថា “ដើម្បីសម្រេចបាននូវភាពជោគជ័យកាន់តែខ្លាំង ចលាចលនិងជម្លោះមិនត្រូវអនុញ្ញាតឱ្យកើតឡើងនៅអាស៊ីដាច់ខាត បើមិនដូច្នេះទេ អនាគតនឹងត្រូវបាត់បង់”
នាយករដ្ឋមន្ត្រីសិង្ហបុរីលោក លី សៀនឡុង នាយករដ្ឋមន្ត្រីម៉ាឡេស៊ីលោក អាន់វ៉ា អ៊ីប្រាហ៊ីម និងនាយករដ្ឋមន្ត្រីអេស្ប៉ាញលោក ផេដ្រូ សាន់ឆេស (Pedro Sanchez)បានស្ថិតក្នុងចំណោមមេដឹកនាំរដ្ឋាភិបាលបរទេសដែលចូលរួមក្នុងវេទិកាឆ្នាំនេះនៅទីក្រុងប៉ូអាវ ក្នុងខេត្តហៃណាន ប្រទេសចិន។
ការព្យាករណ៍របស់អង្គការមូលនិធិរូបិយវត្ថុអន្តរជាតិ (IMF)បានប៉ាន់ប្រមាណថា សេដ្ឋកិច្ចរបស់អាស៊ីគ្រោងនឹងកើនឡើង ៤,៥ ភាគរយក្នុងឆ្នាំ ២០២៣ គឺកើនឡើងពី ៤,២ ភាគរយក្នុងឆ្នាំ ២០២២ និងខ្ពស់ជាងការព្យាករណ៍អំពីអត្រាកំណើនពិភពលោក ២,៩ ភាគរយ ទោះបីជាតម្រូវការខាងក្រៅចុះខ្សោយនិងមានក្តីកង្វល់អំពីអតិផរណាក៏ដោយ៕
នាយករដ្ឋមន្ត្រីចិនថ្មី លោក លី ឈាង ក្នុងពិធីបើកសន្និសីទប្រចាំឆ្នាំនៃវេទិកា Boao សម្រាប់អាស៊ី
