Views: 1
ប្រែសម្រួល : កញ្ញាដាលីស (ដេល្លីម៉េល) ៖ បារាំងបានប្រកាសកាលពីថ្ងៃសុក្រទី២៤មីនាថា ខ្លួននឹងហាមឃាត់ការប្រើប្រាស់កម្មវិធីកម្សាន្ត TikTok, Twitter, Instagramនិងកម្មវិធីផ្សេងទៀតនៅលើទូរស័ព្ទរបស់បុគ្គលិករដ្ឋាភិបាលដោយសារតែការព្រួយបារម្ភអំពីវិធានការសុវត្ថិភាពទិន្នន័យមិនគ្រប់គ្រាន់។
ចំណាត់ការនេះធ្វើឡើងបន្ទាប់ពីមានការរឹតបន្តឹងស្រដៀងគ្នាលើ TikTokនៅក្នុងបណ្តាប្រទេសប្រជាធិបតេយ្យចំពេលមានការបារម្ភអំពីការជាប់ទាក់ទងរបស់រដ្ឋចិនលើកម្មវិធីចែករំលែកវីដេអូដ៏ពេញនិយមនេះ។ ប៉ុន្តែការសម្រេចចិត្តរបស់បារាំងក៏បានគ្របដណ្តប់លើវេទិកាផ្សេងទៀតដែរដែលត្រូវបានប្រើប្រាស់យ៉ាងទូលំទូលាយដោយមន្ត្រីរដ្ឋាភិបាល សមាជិកសភា និងប្រធានាធិបតី អេមម៉ានុយអែល ម៉ាក្រុង ខ្លួនគាត់ផ្ទាល់។
រដ្ឋមន្ត្រីក្រសួងកំណែទម្រង់និងរដ្ឋបាលសាធារណៈបារាំង លោក ស្តានីស្លាស ហ្គេរីនី (Stanislas Guerini) បាននិយាយនៅក្នុងសេចក្តីថ្លែងការណ៍មួយថា កម្មវិធី “កម្សាន្ត” ទាំងនេះមិនមានសុវត្ថិភាពគ្រប់គ្រាន់សម្រាប់ប្រើប្រាស់ក្នុងសេវាកម្មរដ្ឋបាលរបស់រដ្ឋទេ ហើយ “អាចបង្ហាញហានិភ័យសម្រាប់ការការពារទិន្នន័យ”។
ការហាមឃាត់នេះនឹងត្រូវបានត្រួតពិនិត្យដោយទីភ្នាក់ងារសន្តិសុខអ៊ីនធឺណិតរបស់បារាំង។ សេចក្តីថ្លែងការណ៍មិនបានបញ្ជាក់ពីកម្មវិធីណាមួយដែលត្រូវបានហាមឃាត់នោះទេប៉ុន្តែបានកត់សម្គាល់ថាការសម្រេចចិត្តនេះបានកើតឡើងបន្ទាប់ពីរដ្ឋាភិបាលនៃប្រទេសផ្សេងទៀតបានចាត់វិធានការលើ TikTok ។
មន្ត្រីការិយាល័យរបស់លោកហ្គេរីនីបាននិយាយនៅក្នុងសារមួយទៅកាន់ទីភ្នាក់ងារសារព័ត៌មាន APថា ការហាមឃាត់ក៏នឹងរួមបញ្ចូល Twitter, Instagram, Netflix កម្មវិធីហ្គេមដូចជា Candy Crush និងកម្មវិធីណាត់ជួបផងដែរ។
ក៏មានករណីលើកលែងដែរ។ ប្រសិនបើមន្ត្រីចង់ប្រើកម្មវិធីហាមឃាត់សម្រាប់គោលបំណងវិជ្ជាជីវៈ ដូចជាការធ្វើទំនាក់ទំនងសាធារណៈ ពួកគេអាចស្នើសុំការអនុញ្ញាតដើម្បីធ្វើដូច្នេះបាន៕
