Views: 1
ប្រែសម្រួល : កញ្ញាដាលីស (ដេល្លីម៉េល) ៖ បាតុករអាកាសធាតុជាង ១.៥០០ នាក់ត្រូវបានប៉ូលិសហូឡង់ចាប់ខ្លួនបន្ទាប់ពីបានបិទផ្លូវធំមួយក្នុងទីក្រុងឡាអេ។
ក្នុងអំឡុងការតវ៉ា ដែលរៀបចំដោយអង្គការ Extinction Rebellion សកម្មជនបានដើរលើផ្លូវ A12 ទាមទារឱ្យបញ្ចប់ការឧបត្ថម្ភធនឥន្ធនៈហ្វូស៊ីល។
ប៉ូលិសបានបាញ់កាណុងបាញ់ទឹកដើម្បីព្យាយាមបំបែកហ្វូងមនុស្ស ប៉ុន្តែមនុស្សជាច្រើនបានត្រៀមអាវភ្លៀងនិងឈុតហែលទឹករួចជាស្រេច។
អ្នកតវ៉ា ដែលត្រូវបានចាប់ខ្លួនភាគច្រើន ត្រូវបានដោះលែង ប៉ុន្តែប៉ូលិសនិយាយថា ៤០ នាក់នឹងត្រូវកាត់ទោស។
ក្នុងចំណោមអ្នកតវ៉ាកាលពីថ្ងៃសៅរ៍គឺមានតារាហូឡង់ល្បីៗជាច្រើននាក់ រួមទាំងតារាសម្ដែង នាង ខារ៉ាយ វ៉ាន់ ហូធិន (Carice van Houten) ដែលគេស្គាល់សម្រាប់ការសម្ដែងជាតួ Melisandre ក្នុងរឿងភាគទូរទស្សន៍ Game of Thrones។ ទីភ្នាក់ងារសារព័ត៌មានហូឡង់ ANP បាននិយាយថា នាងត្រូវបានចាប់ខ្លួន ប៉ុន្តែក្រោយមកត្រូវបានអនុញ្ញាតឱ្យត្រឡប់ទៅផ្ទះវិញ។
អង្គការ Extinction Rebellion បានចោទប្រកាន់ប៉ូលិសថាបានប្រើការបាញ់ទឹកបន្ទាប់ពីការបិទផ្លូវចាប់ផ្តើមបានតែ១៥នាទី ប៉ុន្តែប៉ូលិសបាននិយាយថាពួកគេបានសុំឱ្យសកម្មជនចាកចេញនិងផ្តល់ឱកាសឱ្យពួកគេធ្វើដូច្នេះ មុនពេលប្រើឡានបាញ់ទឹក។
មនុស្ស ១.៥៧៩ នាក់ ដែលបដិសេធមិនព្រមចាកចេញ ត្រូវបានចាប់ខ្លួន។
វេបសាយព័ត៌មានក្នុងស្រុក De Telegraaf បានរាយការណ៍ថា មនុស្សភាគច្រើនត្រូវបានសែងចេញនិងដឹកតាមឡានក្រុង។
សេវាអយ្យការរបស់ហូឡង់បាននិយាយថា ពួកគេភាគច្រើននឹងមិនត្រូវបានកាត់ទោសទេព្រោះវាជា “បទល្មើសតូចតាច” ហើយគោលបំណងសំខាន់នៃការចាប់ខ្លួនគឺដើម្បីបញ្ចប់ការបិទផ្លូវ។
ប៉ូលិសបាននិយាយថា មនុស្ស ៤០ នាក់នឹងនៅតែត្រូវកាត់ទោស បន្ទាប់ពីត្រូវបានចាប់ខ្លួនពីបទឧក្រិដ្ឋផ្សេងៗ ដូចជាការបំផ្លិចបំផ្លាញ និងការជំទាស់នឹងការចាប់ខ្លួន ដែលបណ្តាលឱ្យមានរបួស។
ការចាប់ខ្លួននេះបានកើតឡើងក្នុងរយៈពេលតែប៉ុន្មានម៉ោងប៉ុណ្ណោះ ហើយផ្លូវត្រូវបានបើកវិញនៅព្រឹកព្រលឹមថ្ងៃសៅរ៍។
អង្គការ Extinction Rebellion បាននិយាយថាយ៉ាងហោចណាស់មនុស្ស ៦.០០០ នាក់បានធ្វើបាតុកម្មនៅលើផ្លូវ A12 ឬនៅក្បែរវា រួមទាំងវង់តន្ត្រី “A12” ដែលមានតន្ត្រីករជាង ៨០ នាក់។
វាជាលើកទីប្រាំពីរហើយដែលក្រុមបាតុករ Extinction Rebellion បានបិទផ្លូវ A12។ ការតវ៉ានៅលើផ្លូវនេះត្រូវបានហាមឃាត់ក្រោមច្បាប់ដែលនាំមកដោយអភិបាលក្រុង៕
ប៉ូលិសហូឡង់ចាប់ខ្លួនបាតុករ ១.៥០០ នាក់ដែលបិទផ្លូវ A12
