Views: 1
ប្រែសម្រួល : កញ្ញាដាលីស (ដេល្លីម៉េល) ៖ មនុស្សជាង ១លាននាក់បានធ្វើបាតុកម្មនៅទូទាំងប្រទេសបារាំងកាលពីថ្ងៃព្រហស្បតិ៍ទី២៣មីនាប្រឆាំងនឹងកំណែទម្រង់ប្រាក់សោធននិវត្តន៍ដ៏គ្មានប្រជាប្រិយភាព ហើយអំពើហិង្សាបានផ្ទុះឡើងនៅកន្លែងខ្លះ ខណៈសហជីពនានាអំពាវនាវឱ្យមានកូដកម្មនិងការតវ៉ាទូទាំងប្រទេសជាថ្មីនៅសប្តាហ៍ក្រោយគាប់ជួនពេលដែលស្តេចឆាលទីបីគ្រោងនឹងយាងមកប្រទេសបារាំង។
ក្រសួងមហាផ្ទៃបាននិយាយថា ការដើរដង្ហែក្បួនតវ៉ានៅទីក្រុងប៉ារីស ដែលត្រូវបានបង្អាក់ដោយអំពើហិង្សាដូចការដង្ហែក្បួនជាច្រើនកន្លែងផ្សេងទៀតដែរនោះ បានទាក់ទាញមនុស្សចូលរួមចំនួន ១១៩.០០០ នាក់ ដែលជាកំណត់ត្រាមួយសម្រាប់រដ្ឋធានីនេះក្នុងអំឡុងការតវ៉ាប្រាក់សោធននិវត្តន៍។ ការស្ទង់មតិនានានិយាយថា ប្រជាជនបារាំងភាគច្រើនប្រឆាំងនឹងច្បាប់របស់ប្រធានាធិបតី អេមម៉ានុយអែល ម៉ាក្រុង ក្នុងការបង្កើនអាយុចូលនិវត្តន៍ពី ៦២ ទៅ ៦៤ ឆ្នាំ ដែលគាត់និយាយថាចាំបាច់ដើម្បីរក្សាប្រព័ន្ធនេះឱ្យនៅដំណើរការ។
ដោយអាងមានអ្នកចូលរួមខ្លាំងក្លា សហជីពនានាភ្លាមៗបានអំពាវនាវឱ្យមានការតវ៉ានិងកូដកម្មជាថ្មីនៅថ្ងៃអង្គារក្រោយ នៅពេលដែលស្តេចអង់គ្លេសគ្រោងនឹងយាងទៅទីក្រុងប័រដូ (Bordeaux) នៅថ្ងៃទីពីរនៃព្រះរាជទស្សនកិច្ចរបស់ទ្រង់មកកាន់ប្រទេសបារាំង។ កាសែត Sud Ouest បាននិយាយថាទ្វារឈើប្រណីតដ៏ធ្ងន់នៃសាលាក្រុងប័រដូរត្រូវបានដុតបំផ្លាញខ្ទេចខ្ទីកាលពីល្ងាចថ្ងៃព្រហស្បតិ៍ដោយសមាជិកនៃបាតុកម្មដែលគ្មានការអនុញ្ញាត។
ក្រសួងបាននិយាយថា នៅទូទាំងប្រទេស មនុស្សជាងមួយលាននាក់បានចូលរួមការដង្ហែក្បួនតវ៉ាដែលបានធ្វើឡើងនៅក្នុងទីក្រុងនិងទីប្រជុំជនទូទាំងប្រទេសកាលពីថ្ងៃព្រហស្បតិ៍។
រដ្ឋមន្ត្រីមហាផ្ទៃលោក ហ្សេរ៉ាល់ ដាម៉ាណង់ (Gerald Darmanin) ដែលចុះទៅមើលទីស្នាក់ការប៉ូលិសកាលពីយប់ថ្ងៃព្រហស្បតិ៍ខណៈភ្លើងនៅតែឆេះនៅក្នុងសង្កាត់មួយចំនួននៅទីក្រុងប៉ារីស បានផ្តល់ការធានាថា សន្តិសុខ “មិនមានបញ្ហាទេ” ហើយព្រះមហាក្សត្រអង់គ្លេសនឹងត្រូវបាន “ស្វាគមន៍យ៉ាងកក់ក្តៅ”។
លោកបាននិយាយថាមានការខូចខាតអគារសាធារណៈនិងពាណិជ្ជកម្មកាលពីថ្ងៃព្រហស្បតិ៍ធ្ងន់ធ្ងរជាងបាតុកម្មពីមុនៗឆ្ងាយណាស់។
លោករដ្ឋមន្ត្រីបាននិយាយថា “តែងតែមានពួកបង្ករឿង ដែលភាគច្រើនជាពួកឆ្វេងនិយមជ្រុល ដែលចង់ផ្តួលរំលំរដ្ឋនិងសម្លាប់ប៉ូលិស ហើយទីបំផុតកាន់កាប់ស្ថាប័ននានា”៕
បាតុករជាង១លាននាក់តវ៉ាប្រឆាំងច្បាប់សោធននិវត្តន៍នៅបារាំងយ៉ាងហិង្សាកាលពីថ្ងៃព្រហស្បតិ៍
